Ukufuma 7 - IBAYIBOLO 2024

¹ Po u Mwene akamubuzya u Mozesi akati, “Ivwa kuno, nakupela pakuba ngati we Chala pamaso pa Falabo, sona uwamwinyu u Aloni akwiza pakuba mulaghuzi wako.

² Mubuzye u Aloni amazyu ghosi ghagho nakulamula, po u Aloni amulamule u Falabo ukuti abitikizye aba Izilayeli pakwepamo muchisu chache.

³ Loli nkwiza pakughupela umoyo uwa Falabo pakuba mukafu. Napapo nkwiza pakupela ivyika ni viswigho ivyinji nkani mu Ijiputi,

⁴ pope bulo u Falabo atakwiza pakubateghelezya. Panapo nkwiza pakuwisya intamyo inyinji nkani mu Ijiputi. Pisinda pache nkwiza pakubalongolela abantu bane mutubukatilatubukatila pakubefyamo mu Ijiputi.

⁵ Aba Ijiputi bakwiza pakummanya ane ukuti ne Mwene bo nabafunda tasi na maka amakulu. Pisinda pache nkwiza pakubefyamo aba Izilayeli muchisu chabo.”

⁶ U Mozesi nu Aloni bakabomba bulo vivyo u Mwene akabalamula.

⁷ Pakabalilo kako bakanenagha nu Falabo, u Mozesi akaba na maka 80, sona u Aloni akaba na maka 83.

Nizya ndisa iya Aloni

⁸ U Mwene akamubuzya u Mozesi nu Aloni akati,

⁹ “Nanti u Falabo abalamula ukuti, ‘Pela ichiswigho, umwakuti tubasubile,’ po awe we Mozesi mulamule u Aloni ukuti, ‘Sumbila pasi indisa pamaso pa Falabo, ukuti yanduke pakuba njoka.’ ”

¹⁰ Po u Mozesi nu Aloni bakabuka kwa Falabo nukubomba vivyo u Mwene akabalamula. U Aloni akayisumbila pasi indisa pamaso pa Falabo na makambala ghache, po yikanduka pakuba njoka.

¹¹ Bunubo u Falabo akabitizya abantu bache abamahala na bamayele, umwakuti bope bakabomba bulabula.

¹² Bope bakazisumbila pasi indisa zyabo, po indisa zila zikanduka pakuba njoka. Loli indisa iya Aloni yikamila indisa zyabo zila.

¹³ Pope bulo umoyo uwa Falabo ghukaba mukafu nkani ukuyana namumo u Mwene akanenela, umwakuti atakamuteghelezya u Mozesi nu Aloni.

Iviwaya mu Ijiputi Ichiwaya icha libanda

¹⁴ Po u Mwene akamubuzya u Mozesi akati, “Umoyo uwa Falabo mukafu nkani umwakuti akukana pakubitikizya abantu ukuti babukaye.

¹⁵ Buka kakomane nawe pandabindabi, bo akubuka kulusoko ulwa Nayilo nukumulindilila mulubazu ulwa lusoko. Usende indisa yiyo yikanduka pakuba njoka.

¹⁶ Umubuzye u Falabo uti u Mwene, u Chala uwa ba Hebeli antumite pakukulamula ukuti, ‘Itikizya abantu bane ukuti babukaye, umwakuti banganyiputa munkolongo. Loli mupaka nilelo bulo utakunteghelezya.’

¹⁷ Wee mwene, losi ulu u Mwene akuti, ‘Ukwiza pakummanya ane ukuti ne Mwene nanti wazyennya na maso ghako zizyo nkwiza pakuzibomba. Ni ndisa yiyo indemite munyobe zyane, nkwiza pakulukoma ulusoko ulwa Nayilo, po amizi ghakwiza pakwanduka libanda.

¹⁸ Iswi zyosi zikwiza pakufwa, ulusoko lukwiza pakununka nkani, umwakuti aba Ijiputi bakwiza pakupotwa pakung'wela amizi ghache.’ ”

¹⁹ U Mwene akamulamula sona u Mozesi akati, “Umubuzye u Aloni uti, ‘Sontezya indisa yako pa soko ni viziba, sona nu tusoko tosi utwa mu Ijiputi.’ Amizi ghakwiza pakwanduka libanda, umwakuti posi na posi, mumakwi, na mumabwe bulo mukwiza pakuba libanda.”

²⁰ Po u Mozesi nu Aloni bakabomba zizyo u Mwene akabalamula. Pamaso pa Falabo na makambala ghache, u Aloni akinusya indisa yache nukukoma amizi agha lusoko ulwa Nayilo, po amizi ghosi ghakanduka libanda.

²¹ Iswi zyosi mulusoko lula zikafwa, ulusoko lula lukanunka akabibi nkani, umwakuti aba Ijiputi bakapotwa pakung'wela amizi ghache. Ibanda likaba posi na posi mu Ijiputi.

²² Loli abamayele aba mu Ijiputi bakabomba bunubu pakubombezya amayele ghabo. Pope bulo umoyo uwa Falabo ghukaba mukafu nkani, ukuyana namumo u Mwene akanenela, umwakuti atakamuteghelezya u Mozesi nu Aloni.

²³ U Falabo akaghalabuka nukunyokela kunyumba yache iya bumwene, sona atakabikilako nu moyo.

²⁴ Aba Ijiputi bosi bakakumba iviziba mulubazu ulwa lusoko ulwa Nayilo pakulonda amizi aghakung'wela, pachifukwa ichakuti bakapotwa pakung'wela amizi agha mulusoko lula.

²⁵ Ghakachilapo amasiku seveni, bo u Mwene akoma amizi agha mulusoko ulwa Nayilo.