Ukufuma 6 - IBAYIBOLO 2024

¹ Po u Mwene akamubuzya u Mozesi akati, “Losi ulu ukwiza pakwennya zizyo nkwiza pakumubombela u Falabo. Nkwiza pakumufyenga ukuti abitikizye abantu bane pakubuka. Pachifukwa icha maka ghane amakulu, naloli akwiza pakubachimbizyamo abantu bane muchisu chache.”

U Chala akumwitizya sona u Mozesi

² U Chala akamubuzya sona u Mozesi akati, “Ane ne Mwene.

³ Ane ne Chala Uwamaka Ghosi. Nkamubonekela u Abulahamu nu Yisaki sona nu Yakobo, loli intakitambula itabwa lyane ukuti ne Mwene.

⁴ Nkafingana nabo ulufingo nukubalayizya pakubapa ichisu icha Kenani, mumo bakikalagha ngati bayeni.

⁵ Losi ulu nivwa ukukoloma ukwa ba Izilayeli, babo aba Ijiputi bakubapela pakuba bazya, sona nalukumbuka ulufingo lwane.

⁶ “Polelo ubabuzye aba Izilayeli amazyu ghane aghakuti, ‘Ane ne Mwene, nkwiza pakubatabula kubuzya ubwa ba Ijiputi pakubombezya amaka ghane amakulu, sona ni viswigho ivyamaka.

⁷ Amwe mukwiza pakuba mwe bantu bane, nane nkwiza pakuba ne Chala winyu. Po mukwiza pakumanya ukuti ane ne Mwene, u Chala winyu, ne nkababula kumbombo inkafu zizyo aba Ijiputi bakabafyenga pakubomba.

⁸ Nkwiza pakubinjizya muchisu chicho nkalapa nu Abulahamu nu Yisaki, sona nu Yakobo. Nkwiza pakubapacho pakuba chisu chinyu ni chinyu. Ane ne Mwene.’ ”

⁹ U Mozesi akababuzya zinizi aba Izilayeli, loli batakamuteghelezya pachifukwa ichakuti amoyo ghabo ghakavulala nkani ni mbombo izya buzya inkafu zila.

¹⁰ Po u Mwene akamubuzya u Mozesi akati,

¹¹ “Buka umubuzye u Falabo u mwene uwamu Ijiputi ukuti abitikizye aba Izilayeli ukwepamo muchisu chache.”

¹² Loli u Mozesi akamwamula u Mwene akati, “Nanti aba Izilayeli abenecho batakunteghelezya, nkimba u Falabo anganteghelezya bulibuli? Pakuti ane ne muntu uwachilita.”

¹³ Loli u Mwene akamulamula u Mozesi nu Aloni ukuti, “Ubabuzye aba Izilayeli nu mwene uwamu Ijiputi ukuti nabalamula aba Izilayeli pakwepamo muchisu icha Ijiputi.”

Nizya banyenya aba Mozesi nu Aloni

¹⁴ Aba bakaba bo banyenya abaluko ulwa ba Izilayeli: Abana aba Lubeni, ukatote uwa Izilayeli bo aba: U Hanoki nu Palu nu Heziloni nu Kalimi. Banaba bakaba bamunyumba iya Lubeni.

¹⁵ Abana aba Simiyoni bo aba: U Yemuweli nu Yamini nu Ohadi nu Yakini nu Zohala nu Shabuli, umwana yuyo akapapa nu mukolo umu Kenani. Banaba bakaba bamunyumba iya Simiyoni.

¹⁶ Amatabwa agha bana aba Levi poka na baluko lwache gho agha: U Gelishoni nu Kohati nu Melali. U Levi akikala amaka 137.

¹⁷ Abana aba Gelishoni bo aba: U Libini nu Shimeyi poka na baluko lwache.

¹⁸ Abana aba Kohati bakaba bo aba: U Amulamu nu Izihali nu Hebuloni nu Uziyeli. U Kohati akikala amaka 133.

¹⁹ Abana aba Melali bo aba: U Mahili nu Mushi. Banaba bakaba bamunyumba iya Levi poka na baluko lwache.

²⁰ U Amulamu akamusenda u Yokebedi, umuyemba uwa wise, yuyo akapapa nawe u Aloni nu Mozesi. U Amulamu akikala amaka 137.

²¹ Abana aba Izihali bakaba bo aba: U Kola nu Nefegi nu Zikili.

²² Abana aba Uziyeli bakaba bo aba: U Mishayeli nu Elizafani nu Sitili.

²³ U Aloni akamusenda u Elishiba umwana uwa Aminadabu, umuyemba uwa Nashoni. Po akapapa nawe abana aba: U Nadabu nu Abihu nu Eleyazala nu Itamali.

²⁴ Abana aba Kola bakaba bo aba: U Asili nu Elikana nu Abiyasafu. Banaba bakaba banyenya abaluko ulwa Kola.

²⁵ U Eleyazala umwana uwa Aloni akamusenda umwana weka uwa bana abalindu aba Putiyeli pakuba muchi wache nukupapa nawe u Finehasi. Banaba bakaba balongozi aba ba Levi, ukuyana nuluko lwabo.

²⁶ Akaba we Aloni nu Mozesi babo u Mwene akababuzya ukuti, “Mubefyemo aba Izilayeli muchisu icha Ijiputi umwakuyana nu tubukatila twabo.”

²⁷ Loli banaba bakaba banavuli babo bakamubuzya u Falabo u mwene uwamu Ijiputi ukuti abefyemo aba Izilayeli muchisu icha Ijiputi.

U Mwene akumulamula u Mozesi nu Aloni

²⁸ Bo u Mwene anena nu Mozesi muchisu icha Ijiputi,

²⁹ akamubuzya akati, “Ane ne Mwene. Umubuzye u mwene uwa Ijiputi amazyu ghosi ghagho nkukubuzya.”

³⁰ Loli u Mozesi akamwamula u Mwene akati, “Wee Mwene, uzimenye akiza bulo ukuti ane ne wachilita. Po nkimba u Falabo anganteghelezya bulibuli?”