Ukufuma 5 - IBAYIBOLO 2024

U Mozesi nu Aloni pamaso pa Falabo

¹ Pisinda pache u Mozesi nu Aloni bakabuka kwa Falabo nukumubuzya ukuti, “U Mwene, u Chala uwa Izilayeli akuti, ‘Itikizya abantu bane babukaye, umwakuti bangaba nu lusekelo ulwakunchindika nalo munkolongo.’ ”

² Po u Falabo akamula akati, “Nkimba u Mwene yunuyu wewenu? Nkimba choni chicho imwivwilaye pakubitikizya aba Izilayeli ukuti babukaye? Ntamumenye u Mwene yunuyu, po ntakwiza pakubitikizya aba Izilayeli ukuti babukaye.”

³ U Mozesi nu Aloni bakamwamula bakati, “U Chala uwa ba Hebeli ivumbula mwene kukwitu. Utwitikizye ukuti tubukaye munkolongo amasiku matatu pakubika ivyakwiyipa kwa Mwene u Chala witu. Nanti tutakubukako kokuti akwiza pakutughogha nu bubine pamo nu bwite.”

⁴ Loli u mwene uwamu Ijiputi akamulalusya u Mozesi nu Aloni akati, “Nkimba choni chicho mukubakanizya abantu pakubomba imbombo zyabo. Nyokela ku mbombo zyinyu?”

⁵ U Falabo akati, “Abantu banaba babala nkani ukuchila aba Ijiputi. Po nkimba choni chicho mukubakanizya pakubomba imbombo?”

⁶ Pisiku linilyo u Falabo akabalamula abasongo aba pambombo na bakapitawa aba ba Izilayeli ukuti,

⁷ “Mutakabapanje nalumo abantu banaba isote ilya kukomela injelwa. Mubaleke bilondelaye bene.

⁸ Loli ubwinji ubwa njelwa bubanje bulo bo bulabula bubo mukumatagha bwila, mutakisyeko napo panandi. Abantu banaba bakata nkani. Cho chifukwa bakundaba ukuti, ‘Twitikizye ukuti tubukaye pakubika ivyakwiyipa kwa Chala witu.’

⁹ Babombezye nkani imbombo abantu aba nukubakolezannya ni mbombo, umwakuti batakabuteghelezyanje ubumyasi bunubu.”

¹⁰ Po abasongo aba pambombo na bakapitawa aba ba Izilayeli bakubuka nukubabuzya abantu bala ukuti, “U Falabo ati, ‘Ntakwiza pakubapa nalumo isote.

¹¹ Mwilondele mwebene isote kosi kuko mungalyagha. Loli ubwinji ubwa njelwa bubaghiye pakuba bulo bo bulabula bubo mukumatagha bwila.’ ”

¹² Po abantu bala bakasata muchisu chosi icha Ijiputi pakulondelezya isote.

¹³ Loli abasongo aba bazya bala bakendelela pakubafyenga abakapitawa aba ba Izilayeli nukuti, “Ubwinji ubwa njelwa bubaghiye pakuba bulo bo bulabula bubo mukumatagha bwila, bo bakubapa isote.”

¹⁴ Abasongo aba pambombo bala bakabakoma abakapitawa aba ba Izilayeli bala nukubalalusya ukuti, “Nkimba choni chicho ilelo mwapotwa pakukoma ubwinji ubwa njelwa bubo mukumatagha bwila?”

¹⁵ Po abakapitawa aba ba Izilayeli bala bakabuka kwa Falabo nukwilumbusya ukuti, “Wee mwene, nkimba choni chicho wababombela bunubu abambombo bako?

¹⁶ Isote batakutupa nalumo, loli pope bulo bakutulamula bakuti, ‘Endelela pakukoma injelwa!’ Abantu bako bakutukoma, loli abantu bako bo babo bakunanga.”

¹⁷ U Falabo akabamula akati, “Amwe mwe bakata, mwe bakata nkani! Cho chifukwa mukundaba ukuti, ‘Twitikizye ukuti tubukaye pakubika ivyakwiyipa kwa Mwene.’

¹⁸ Losi ulu nyokela ku mbombo zyinyu. Batakwiza pakubapa nalumo isote, loli ubwinji ubwa njelwa bubaghiye pakuba bulo bo bulabula, bubo mukumatagha bwila.”

¹⁹ Abakapitawa aba ba Izilayeli bala bakazyaghannya ukuti bakipalaghulila intamyo, bo u Falabo ababuzya ukuti, “Ubwinji ubwa njelwa bubaghiye pakuba bulo bo bulabula bubo mukumatagha bwila.”

²⁰ Bo bakwepapo pamaso pa Falabo, bakakomana nu Mozesi nu Aloni babo bakabalindililagha.

²¹ Po bakababuzya bakati, “U Mwene ennya zizyo mwatubombela, po abafunde pakuti mwamupela u Falabo na makambala ghache pakuba balwani bitu. Amwe mwabapa upanga ukuti batughoghe.”

Mozesi akwilumbusya kwa Mwene

²² Po u Mozesi akiputa sona kwa Mwene akati, “Wee Mwene, nkimba choni chicho ukubayivya abantu bako? Nkimba cho chifukwa ukantumila kuno?

²³ Ukwandila pakabalilo kako nkabukagha kwa Falabo pakumubuzya amazyu ghako, utalekitepo pakubayivya abantu bako, sona utabombitepo nachimochimo pakubapoka abantu bako.”