Ukufuma 40 - IBAYIBOLO 2024

Ukwimikiwa nukupaghuliwa ukwa Chisakasa icha Mwene

¹ Po u Mwene akamulamula u Mozesi akati,

² “Pisiku ilyakwanda ilya mwezi uwakwanda, wimike Ichisakasa icha Mwene.

³ Mu Chisakasa mula ubikemo Ibokosi ilya Lufingo, nukulivwinka nu mwenda.

⁴ Ubikemo itebulo nukubika ivibombelo vyache pamwanya. Wikazyepo ichakubikapo inyale nukubikapo inyale.

⁵ Ubikemo ichighemo icha golide ichakufukizizyapo utwakununkila umwakwenannya ni Bokosi ilya Lufingo, nukupayika umwenda uwakuzighila pamulyango uwa Chisakasa.

⁶ Ubike ichighemo ichakochelapo ichakwiyipa ichakocha mukasi kuntazi ukwa Chisakasa.

⁷ Ubikemo ibeseni ilyakusukusulila pakasi pa Chisakasa ni chighemo nukwizuzyamo amizi.

⁸ Upange ulubinjilo, nukupayika umwenda uwakuzighila pamulyango uwa lubinjilo lula.

⁹ “Uchipaghule Ichisakasa, poka ni vibombelo vyache vyosi pakuvipakazya na mafuta amapaghuliwa, po chikwiza pakuba chizelu.

¹⁰ Pisinda pache uchipaghule sona ichighemo ichakochelapo ichakwiyipa ichakocha, poka ni vibombelo vyache vyosi pakuvipakazya na mafuta, po ichighemo chikwiza pakuba chizelu nkani.

¹¹ Ulipakazye na mafuta ibeseni ilyakusukusulila, poka nu bwikalilo bwache ukuti lipaghuliwe.

¹² “Wize nu Aloni na bana bache pamulyango uwa Chisakasa nukubasukuzya na mizi.

¹³ Po umuvwike u Aloni amenda amapaghuliwa, umwimike pakumupakazya amafuta gha syunguti ukuti abanje muputi wane.

¹⁴ Wize na bana bache, nukubavwika amalaya.

¹⁵ Ubapakazye na mafuta ngati mumo ukamupakazizya uwise, ukuti babanje baputi bane. Ukupakazya kunuku kukwiza pakubapela ukuti babanje baputi bane mupaka inkulilo zyosi izya muntazi.”

¹⁶ U Mozesi akabomba zyosi ngati mumo u Mwene akamulamulila.

¹⁷ Po pisiku ilyakwanda mumwezi uwabubili, mumwaka uwabubuli, bo bepamo muchisu icha Ijiputi, Ichisakasa icha Mwene chikimikiwa.

¹⁸ U Mozesi akabwikazya ubwikalilo ubwa Chisakasa chila, akasimika amafulemu, akapinya intatikilo nukusimika impanda.

¹⁹ Po akazungulula umwenda uwakuvwinka Ichisakasa nukuchikupikila, ngati mumo u Mwene akamulamulila u Mozesi.

²⁰ Akasenda amabwe amapapate mabili nukughabika mwi Bokosi ilya Lufingo. Akabika amakwi mumpete izya bokosi nukulikupikila ni chikupikizyo.

²¹ Po akalibika Ibokosi lila mu Chisakasa mula, nukupayika umwenda uwakuzighila, pakubomba bunubu akazighila Ibokosi ilya Lufingo, ngati mumo u Mwene akamulamulila.

²² Akabikamo itebulo mu Chisakasa mula, kulubazu ulwa kumitu, kuzi ukwa mwenda uwakuzighila ghula,

²³ nukubikapo ichibama ichakubikiwa kwa Mwene, ngati mumo u Mwene akamulamulila.

²⁴ Akabikamo ichakubikapo inyale mu Chisakasa, umwakwenannya ni tebulo kulubazu ulwakuntende.

²⁵ Akakozya inyale zila pamaso pa Mwene ngati mumo u Mwene akamulamulila.

²⁶ Akabikamo ichighemo icha golide mu Chisakasa kuntazi ukwa mwenda uwakuzighila ghula,

²⁷ nukufukizyapo utwakununkila, ngati mumo u Mwene akamulamulila.

²⁸ Akapayika umwenda uwakuzighila pamulyango uwa Chisakasa.

²⁹ Akabika ichighemo ichakochelapo ivyakwiyipa ivyakocha papipi na pamulyango uwa Chisakasa chila. Pachighemo palapala akabikapo ivyakwiyipa ivyakocha, ni chakwiyipa icha busu, ngati mumo u Mwene akamulamulila u Mozesi.

³⁰ Akabika ibeseni ilyakusukusulila pakasi pa Chisakasa ni chighemo nukwizuzyamo amizi.

³¹ U Mozesi nu Aloni, poka na bana bache bakasukusulilaghamo munyobe na munyayo zyabo.

³² Bo binjila mu Chisakasa mula, sona bo bapalamila papipi ni chighemo bakasukusulagha ukuyana namumo u Mwene akamulamulila u Mozesi.

³³ Akazenga ulubinjilo ukuzyungulila Ichisakasa ni chighemo, akapayika umwenda uwakuzighila pamulyango uwa lubinjilo. Po u Mozesi akamalizya imbombo yosi.

Ibingu nu buchindamu ubwa Mwene

³⁴ Po ibingu likavwinka Ichisakasa chila, sona ubuchindamu ubwa Mwene bukizula mu Chisakasa mula.

³⁵ U Mozesi akapotwa pakwinjilamo mu Chisakasa mula pachifukwa ichakuti ibingu likaba pamwanya pachisakasa chilachila, sona ubuchindamu ubwa Mwene bukizula mulamula.

³⁶ Nanti ibingu likwepapo pa Chisakasa palapala, bope aba Izilayeli bakepaghapo ni visakasa vyabo nukulikonka ibingu lila.

³⁷ Loli nanti ibingu litakwepapo, bope aba Izilayeli batakanyamukagha ubulendo bwabo, bakalindililagha ukuti lyepepo.

³⁸ Ibingu ilya Mwene likavwinkagha ichisakasa pamusanya, sona pabusiku bakawennyanga umoto uwakwaka mwibingu lilalila.