Ukufuma 4 - IBAYIBOLO 2024

U Chala akumupa u Mozesi amaka aghakupelela iviswigho

¹ U Mozesi akamwamula u Mwene akati, “Buli nanti aba Izilayeli batakunsubila, pamo ukunteghelezya. Nkimba imbombe ichoni nanti bakuti, ‘U Mwene atakakubonekela’?”

² Po u Mwene akamulalusya u Mozesi akati, “Nkimba ulemite choni munyobe?” U Mozesi akamula akati, “Yo ndisa.”

³ U Mwene akati, “Yisumbile pasi.” Bo u Mozesi ayisumbila pasi, indisa yila yikanduka pakuba njoka, po akayichimbila.

⁴ U Mwene akamubuzya u Mozesi akati, “Yileme umusinda.” Po yikanduka sona pakuba ndisa. U Mozesi akabomba zizyo u Mwene akamulamula.

⁵ U Mwene akati, “Bomba zinizi, po aba Izilayeli bakwiza pakusubila ukuti u Mwene, u Chala uwa banyenya babo nu Chala uwa Abulahamu nu Chala uwa Yisaki, sona nu Chala uwa Yakobo naloli akubonekela.”

⁶ U Mwene akamubuzya sona u Mozesi akati, “Injizya inyobe munkazo yako.” Po u Mozesi akayinjizya, loli bo ayefyamo inyobe yila yikaba na mambombo, yikaba bulo swee ngati we kabefu.

⁷ Po u Mwene akati, “Injizya sona inyobe munkazo yako.” U Mozesi akayinjizya, loli bo ayefyamo yikaba akiza bulo ngati mumo umubili ghosi ghukabela.

⁸ U Mwene akati, “Nanti batakukusubila pamo ukuteghelezya ichiswigho ichakwanda, bakwiza pakukusubila ni chiswigho ichabubili ichi.

⁹ Loli nanti batakusubila iviswigho vyosi vibili vinivi, pamo ukuteghelezya zizyo ukwiza pakubabuzya, semba amizi panandi mulusoko ulwa Nayilo nukughakupulila pachisu ichumizu. Amizi ghala ghakwiza pakwanduka pakuba libanda.”

¹⁰ U Mozesi akati, “Wee Mwene nalamba, utakantume ane. Ane te ne muneni umwiza ukwanda kale, pamo ukwandila pakabalilo kako ukanda pakunena nane ne mubombi wako. Ululumi lwane lung'wamite, sona ne muntu uwachilita.”

¹¹ U Mwene akamulalusya akati, “Nkimba wewenu yuyo akumupa umuntu umulomo? Nkimba wewenu yuyo akumupela umuntu pakuba wamapuli pamo we chinunu? Nkimba wewenu yuyo akumupa umuntu amaso pamo pakumupela pakuba mufwamaso? Nkimba inte ne Mwene?

¹² Losi ulu, bukagha! Nkwiza pakukwavwa pakunena, sona nkwiza pakukubuzya amazyu aghakunena.”

¹³ Loli u Mozesi akamula akati, “Wee Mwene, nalamba tumako umuntu uyunji bulo.”

¹⁴ Panapo u Mwene akamukalalila nkani u Mozesi akati, “Buli uwamwinyu u Aloni, umu Levi yula? Inzimenye ukuti anganena akiza bulo. U Aloni akwiza pakukomana nawe, sona akwiza pakuhoboka nanti akwennya.

¹⁵ Nena nawe nukumubuzya amazyu aghakuti anene. Nkwiza pakubavwa pakunena na mwebosi babili, sona nkwiza pakubabuzya izyakubomba.

¹⁶ U Aloni akwiza pakuba muneni wako, sona akwiza pakunena na bantu mubuzilo bwako. Po bunubu ukwiza pakuba ngati po we Chala, ukumubuzya amazyu aghakuti anene.

¹⁷ Nyamula indisa yiyo yili munyobe zyako, ni ndisa yiniyi ukwiza pakupelagha iviswigho.”

U Mozesi akunyokela kuchisu icha Ijiputi

¹⁸ Po u Mozesi akanyokela kwa wisevyala u Yetulo nukumubuzya ukuti, “Leka inyokele ku bakamu bane ku Ijiputi pakubennya nanti bachili bumi.” U Yetulo akamwitikizya akati, “Bukagha, wende akiza.”

¹⁹ Bo u Mozesi achili ali mu Midiyani, u Mwene akamubuzya akati, “Losi ulu nyokela ku Ijiputi, pakuti abantu bosi babo bakalondagha pakukughogha bafuye.”

²⁰ Po u Mozesi akamusenda umuchi wache na bana bache, akabakwezya pampunda nukunyokela ku Ijiputi, bo anyamuye indisa yiyo u Chala akamulamula ukuti anyamule.

²¹ U Mwene akamulamula sona u Mozesi akati, “Bo wanyokela ku Ijiputi, bukagha pamaso pa Falabo nukubomba iviswigho vyosi vinivi. Loli nkwiza pakughupela umoyo uwa Falabo pakuba mukafu nkani, umwakuti atakwiza pakubitikizya abantu ukuti babukaye.

²² Po umubuzye u Falabo uti, ‘Ane ne Mwene nkuti u Izilayeli we mwana wane umulumendo ukatote.

²³ Losi ulu nkukulamula ukuti umwitikizye umwana wane ukuti abukaye, umwakuti anganyiputa, loli ukumukanizya pakubuka. Po nkwiza pakumughogha umwana wako umulumendo ukatote.’ ”

²⁴ Bo u Mozesi ali muzila akubuka ku Ijiputi, akafika pabuzilo bumo bubo akaghonapo, po u Mwene akakomana nu Mozesi nukuyezya pakumughogha.

²⁵ Po umuchi u Zipola akaseba ibwe lilyo likwete nukumusilimula umwana wache umulumendo nukumupalamasizya inyayo izya Mozesi. U Zipola akati, “Naloli we mulume wane uwa libanda.”

²⁶ Po u Mwene akamuleka u Mozesi pakuba mumi. Pachifukwa icha kusilimula kula u Zipola akati, “Naloli we mulume wane uwa libanda.”

²⁷ Pakabalilo kanaka u Mwene akamulamula u Aloni akati, “Bukagha pakukomana nu Mozesi munkolongo.” Po u Aloni akabuka pakukomana nawe pighamba ilya Chala nukumukukila.

²⁸ U Mozesi akamulingannya u Aloni vyosi vivyo u Mwene akamubuzya pakabalilo kako akamutuma. Akamubuzya sona nizya viswigho vivyo akamulamula pakubomba.

²⁹ U Mozesi nu Aloni bakabuka pakubabungannya poka abalongozi aba ba Izilayeli.

³⁰ U Aloni akababuzya abantu vyosi vivyo u Mwene akamulamula u Mozesi, po u Mozesi akabomba iviswigho pamaso pabantu bala.

³¹ Aba Izilayeli bala bakasubila, sona bo bivwa ukuti u Mwene aghennya amayimba ghabo, sona nukuti akaba ni chitima nabo, bakafughama nukumwiputa.