Ukufuma 39 - IBAYIBOLO 2024

Ukusona inkazo izya baputi

¹ Bakasona amenda amiza nkani agha buluu na machesamile sona na machesamu pakuba menda agha muputi, bo akubomba mu Buzilo Ubuzelu. Bakamusonela u Aloni amenda amapaghuliwa ukuyana namumo u Mwene akamulamulila u Mozesi.

² Bakabombezya akiza nkani u efodi uwa golide uwa mwenda umutonte uwa buluu nu muchesamile sona nu muchesamu, vinivi vikasoniwa nabafundi abenecho.

³ Bakatiza nkani utwela utwa golide pakuba tupapate nukuluka nu buzi ubwa buluu nu buchesamile, sona nu buzi ubuchesamu sona numwenda umutonte.

⁴ Bakasona pa efodi utwenda tubili ututonte pavipunko, tuto tukasoneleliwa munkuto zyache zibili.

⁵ Bakasona sona ulamba umulabannye uwa mwenda umutonte uwa buluu nu muchesamile, sona nu muchesamu, yuyo apangiwe akiza nkani ukuti apinyililiwe ku efodi umwakuti ghukaba mwenda ghoka ukuyana namumo u Mwene akamulamulila u Mozesi.

⁶ Bakayannya amabwe agha onikisi nukughabika muvyakubikilamo ivya golide, nukubizapo amatabwa agha bana aba Izilayeli.

⁷ Bakaghasonelela mutwenda utwa efodi pavipunko pakwimilila inko 12 izya ba Izilayeli, ukuyana namumo u Mwene akamulamulila u Mozesi.

Ukusona icha pachifuba

⁸ Bakasona akiza nkani akanyambi akakuvwala pachifuba. Bakasona ukuyana namumo bakusonela u efodi uwa mwenda umutonte uwa golide, nuwa buluu nu muchesamile nu muchesamu, yuyo alukiwe akiza nkani.

⁹ Kanaka ubukulu bwache bukayana bulo nu mwenda, ghugho wapetekiwa kabili, mubutali ghukaba amasentimita 22, sona mububaba ghukaba amasentimita 22.

¹⁰ Bakasonelamo imizele folo iya mabwe aghamutengo. Mumuzele uwakwanda bakabikamo utumabwe utwamutengo utwa lubi nutwa topazi sona nutwa galaneti.

¹¹ Mumuzele uwabubili bakabikamo amabwe agha emeladi nagha safile sona nagha dayimondi.

¹² Mumuzele uwabutatu bakabikamo utumabwe utwamutengo utwa yakinti, nutwa agate, sona nutwa ametisiti.

¹³ Mumuzele uwafolo bakabikamo utumabwe utwamutengo utwa belili nutwa onikisi sona nutwa yasipala. Bakatubika utumabwe tunutu muvyakubikamo ivya golide.

¹⁴ Utumabwe tunutu tukabapo 12 ukuyana na matabwa agha bana aba Yakobo. Pibwe lyoka bakabizapo itabwa lyoka ilya luko ulwa Izilayeli.

¹⁵ Bakachipangila icha pachifuba iminyololo iya golide umwenecho, yiyo yili ngati mpote.

¹⁶ Bakapanga ivyakubikamo ivya golide vibili, ni mpete zibili izya golide nukuzipinyilila kunkuto izya mumwanya izya akakuvwala akapachifuba.

¹⁷ Bakapinyilila iminyololo mibili iya golide yila kumpete zibili zila kunkuto izya akakuvwala akapachifuba.

¹⁸ Upinyilile ubumalilo bubili ubunji ubwa minyololo ku vyakubikilamo amabwe vibili ivya pavipunko vila, vivyo vili kuntazi kwa efodi.

¹⁹ Bakapanga impete zibili izya golide, po bakazipinyilila muntende kunkuto izya akakuvwala akapachifuba mulubazu ulwa mukasi papipi nu efodi.

²⁰ Bakapanga impete izinji zibili izya golide, po bakazipinyilila muntende kuntazi ukwa twenda tubili utwa efodi pavipunko kupipi nu busone pamwanya pa lamba uwakulukiwa akiza nkani yula.

²¹ Bakapinyilila impete izya akakuvwala akapachifuba kumpete izya efodi ni mpote izya buluu umwakuti akakuvwala akapachifuba kakaba pamwanya palamba ukuti katakazebaye, ukuyana namumo u Mwene akamulamulila u Mozesi.

Ukusona amenda aghanji agha buputi

²² Bakasona inkazo iya efodi iya mwenda uwa buluu umwenecho.

²³ Inkazo yiniyi yikaba nu bwazi ubwakwinjizyamo umutu, ghugho ghukasoniwa na kamwenda akakupeteka mulubazu lwache umwakuti ghutakazepukaye.

²⁴ Ukuzyungulila mubupeteke muntende munkazo yila, bakalabannyamo ni vifwani ivya vikomwa ivya manyele agha buluu, na machesamile, sona na machesamu nu twa belu utwa golide pakasi, ukuyana namumo u Mwene akamulamulila u Mozesi.

²⁵ Bakapanga utwa belu utwa golide umwenecho pakasi pa vifwani vila nukuvisonelela umwakuzyungulila.

²⁶ Umwakuzyungulila mubupeteke bosi bula bakabikamo amanyele agha buluu na machesamile na machesamu naka belu aka golide, ngati mumo u Mwene akamulamulila u Mozesi.

²⁷ Bakamusonela u Aloni na bana bache amalaya amantonte, ghagho ghakasoniwa akiza nkani.

²⁸ Bakamusonela sona impumpu iya mwenda umutonte nu lamba umutonte, sona na bakabuntu abatonte abakusoniwa akiza nkani.

²⁹ Bakapanga sona ulamba umutonte yuyo alabiwe akiza nkani uwa mwenda uwa buluu nu muchesamile, sona nu muchesamu ukuyana namumo u Mwene akamulamulila u Mozesi.

³⁰ Bakapanga imbale iya mpumpu izelu iya golide umwenecho, po bakabizapo amazyu aghakuti, “Yapaghuliliwa kwa Mwene.”

³¹ Bakakapinya kuntazi ukwa mpumpu nu lupote ulwa buluu, ukuyana namumo u Mwene akamulamulila u Mozesi.

Ukumalizya imbombo

³² Po imbombo yosi iyakuzenga Ichisakasa icha Mwene yikamala. Aba Izilayeli bakabomba vyosi ukuyana namumo u Mwene akamulamulila u Mozesi.

³³ Po bakiza nacho kwa Mozesi, poka ni vibombelo vyache vyosi nu tulemelo na mafulemu ni ntatikilo ni mpanda sona nubwikalilo bwache

³⁴ na makwela agha dubi amadwibike mu inki inchesamu nagha mbuzi aghakuvwinkila na menda aghakuzighila

³⁵ ni Bokosi ilya Lufingo na makwi aghakunyamulila sona ni chikupikizyo chache

³⁶ ni tebulo poka ni vibombelo vyache vyosi sona ni chibama ichakupeghiwa kwa Chala

³⁷ ni chakubikapo inyale icha golide umwenecho ni nyale poka ni vibombelo vyache vyosi sona na mafuta agha nyale

³⁸ ni chighemo icha golide na mafuta aghakupakazya nu twakufukizya utwakununkila, sona nu mwenda uwakuzighila pamulyango uwa Chisakasa

³⁹ ni chighemo icha mukuba ni chakupembelapo umoto icha mukuba na makwi ghache aghakunyamulila sona ni vibombelo vyache vyosi ni beseni ilyakusukusulila, poka nu bwikalilo bwache

⁴⁰ na menda aghakuzighila pabalaza ni mpanda zyache poka nu bwikalilo bwache nu mwenda uwakuzighila pamulyango uwa pabalaza poka ninkusa zyache nu tukwi utusongole sona ni vibombelo vyosi ivyakuzengela Ichisakasa

⁴¹ na menda aghakulukiwa akiza nkani ghagho abaputi bavwalaye, bo bakubomba mu Buzilo Ubuzelu. Ghanagha gho menda agha muputi u Aloni na bana bache.

⁴² Aba Izilayeli bakabomba imbombo yosi ukuyana namumo u Mwene akamulamulila u Mozesi.

⁴³ U Mozesi akendela imbombo yosi yiyo bakabomba nukwagha ukuti bakabomba vyosi ukuyana namumo u Mwene akamulamulila, po u Mozesi akabasaya.