Ukufuma 38 - IBAYIBOLO 2024

Ukupanga ichighemo icha vyakwiyipa ivyakocha

¹ Bakazenga ichighemo ichakochelapo ichakwiyipa ichakocha icha matabwa agha mungwina. Ichighemo chinichi chikaba chakuyana bulo, mubutali chikaba amamita mabili nu hafu mububaba chikaba amasentimita mabili nu hafu, sona mumwanya chikaba imita lyoka nu hafu.

² Bakapanga impembe pamwanya pankuto zyache zyosi folo umwakuti impembe zila zimamatiziwe kuchighemo pakuba chintu choka sona bakachipaka nu mukuba.

³ Bakachipangila ivyela ivyakuyolela itoyi na mafosholo na mabeseni na mafoloko amakulu ni sonta sona ni chela ichakupembela umoto. Ivibombelo vyosi vinivi vikaba vya mukuba.

⁴ Po bakapanga ichela icha mukuba icha tudobozitudobozi. Munkuto zyosi izya chela chila upangemo impete izya mukuba izyakunyamulila.

⁵ Bakapanga impete folo izyakunyamulila nukukomela kunkuto folo.

⁶ Bakapanga amakwi aghakunyamulila agha matabwa agha mungwina, po bakaghapaka nu mukuba.

⁷ Bakinjizya amakwi ghala mumpete kumbazu zyosi zibili izyakunyamulila ichighemo chila. Bakapanga ichighemo pakuba bwazi bulo sona chikapangiwa na matabwa.

Ukumata isonta iyakusukusulila

⁸ Bakapanga ibeseni ilyakusukusulila ilya mukuba poka nu bwikalilo bwache ubwa mukuba. Akayikazya pakasi pa Chisakasa icha Mwene na pachighemo, sona akapungulilamo amizi.

Ibalaza ilya chisakasa icha Mwene

⁹ Bakachipangila ichisakasa ulubinjilo ulwa mwenda umutonte, mubutali ghukaba amamita 46, kulubazu ulwakuntende.

¹⁰ Impanda zyache izya mukuba zikaba 20 nu bwikalilo ubwa mukuba 20 nu tulemelo, poka ni ntatikilo izya siliva.

¹¹ Umwakuyana bulo, kulubazu ulwa kumitu ulwa lupaso akabikako umwenda uwakuzighila, mubutali ghukaba amamita 46, ni mpanda izya mukuba 20 nu bwikalilo ubwa mukuba 20 nu tulemelo utwa siliva, poka ni ntatikilo izya siliva.

¹² Kulubazu ulwa kubwinjililo bwizuba kukaba amenda aghakuzighila, mubutali ghakaba amamita 25, impanda zyache zikaba 10, sona nu bwikalilo bwache vikaba 10. Utulemelo poka ni ntatikilo vikaba vya siliva.

¹³ Umwenda uwa kubufumilo bwizuba, kuko kuli umulyango, mububaba ghukaba amamita 25.

¹⁴ Umwenda uwakuzighila kumulyango, mubutali ghukaba amamita 7, ni mpanda zitatu, sona nu bwikalilo butatu.

¹⁵ Umwakuyana bulo, kulubazu ulwakuntende ulwa lupaso akabikako umwenda uwakuzighila, mubutali ghukaba amamita 7, ni mpanda zitatu, sona nu bwikalilo butatu.

¹⁶ Amenda ghosi aghakuzighila ghala ukuzyungulila ibalaza ghakaba matonte, ghagho ghalabiwe akiza nkani.

¹⁷ Ubwikalilo bosi ubwa mpanda bukaba bwa mukuba. Utulemelo ni mpete vikaba vya siliva, sona pamwanya chikapakiwa nu siliva, impanda zyosi izya pabalaza zikaba zya siliva.

¹⁸ Pamulyango uwa lupaso akabikapo umwenda umutonte uwakuzighila uwa buluu nu muchesamile, sona nu muchesamu, mubutali ghukaba amamita 9, ghugho ghulabiwe akiza nkani, ni mpanda folo, sona nu bwikalilo folo.

¹⁹ Impanda zyache zikaba folo sona nu bwikalilo bwache bukaba bwa mukuba. Utulemelo ni mpete zyache vikaba vya siliva, pamwanya pakapakiwa nu siliva.

²⁰ Ivibombelo vyosi ivya mu Buzilo Ubuzelu nu tukwi tosi utwa pabalaza tukaba twa mukuba.

Ivyela ivyakubombela mu Chisakasa icha Mwene

²¹ Ubu bo bwinji ubwa vibombelo vivyo bakabombela pakuzenga Ichisakasa icha Mwene, chicho chipinda ichipaghuliwa icha bokosi ilya Ndaghilo ngati mumo u Mozesi akabalamulila aba Levi pasi pabulongozi ubwa Itamali, umwana uwa Aloni Umuputi.

²² U Bezaleli umwana uwa Uli sona umwizukulu uwa Huli, uwaluko ulwa Yuda, akabomba vyosi vivyo u Mwene akamulamula u Mozesi.

²³ Akaba poka nu Oholiyabu umwana uwa Ahisamaki uwaluko ulwa Dani, abafundi abenecho sona umuntu umumanyi pakulukila nu buzi ubwa buluu nu buchesamile nu buchesamu, sona nu butonte nkani ubwakulukiwa akiza.

²⁴ Ugolide wesi yuyo bakabombezyanga imbombo mu Buzilo Ubuzelu bula ukufuma muchakwiyipa ichakuzyunguzya mumwanya ubung'wamu bwache bukaba amakilogalamu 1,000 ukuyana ni chipimilo icha mu Buzilo Ubuzelu.

²⁵ Usiliva yuyo akafuma ku bantu bosi babo bakabelengiwa akaba amakilogalamu 3,430 ukuyana ni chipimilo icha mu Buzilo Ubuzelu ubwa Chala.

²⁶ Umuntu weka akabika indalama iya beka yoka ukuyana bulo nu hafu uwa shekeli, ni chipimilo icha Ubuzilo Ubuzelu ubwa Chala, ichi cho chicho chikaba chakwiyipa icha muntu wesi yuyo abelengiwe, abantu bosi babo bakabelengiwa bakaba bamaka 20 nukuchilapo, bosi poka bakabapo 603,550.

²⁷ Bakabombezya usiliva pakuzenga ubwikalilo 100 ubwa Ubuzilo Ubuzelu uwakukwana amakilogalamu 3,400, sona poka na menda aghakuzighila mu Chisakasa mula.

²⁸ Amakilogalamu 30 ghagho ghakasyalako ghala bakabombezya pakupanga utulemelo utwa mpanda sona ni ntatikilo zyache.

²⁹ U mukuba yuyo akapaghuliliwa kwa Mwene akaba makilogalamu 2,425,

³⁰ bakabombezya pakupanga ivyakwimapo ivya mulyango uwa Chisakasa icha Mwene. Ichighemo icha mukuba ni chakupembelapo umoto, sona ni vibombelo vyosi ivya chighemo,

³¹ ubwikalilo ubwakuzyungulila ibalaza, na pamulyango uwa lupaso nu tukwi utwa Chisakasa, sona nukuzyungulila ibalaza.