Ukufuma 37 - IBAYIBOLO 2024

Ukupanga Ibokosi ilya Lufingo

¹ U Bezaleli akapanga Ibokosi ilya Lufingo ilya matabwa agha mungwina. Mubutali likaba amasentimita 110, mububaba likaba amasentimita 66, sona mumwanya likaba amasentimita 66.

² Akalipaka nu golide umwenecho, mukasi na kuzi. Akalilaba nu muzele uwa golide umwakuzyungulila.

³ Akalipangila impete folo izya golide izyakunyamulila, nukuzipinyilila kuvinama vyache folo, impete zibili kulubazu loka, sona zibili kulubazu ulunji.

⁴ Akapanga amakwi mabili aghakunyamulila agha mungwina, nukughapaka nu golide.

⁵ Po akinjizya amakwi mabili ghala mumpete zizyo zili kumbazu zyosi zibili izya bokosi, ukuti zibanje zyakunyamulila.

⁶ Akapanga ichikupikizyo icha golide umwenecho, mubutali chikaba amasentimita 110, sona mububaba chikaba amasentimita 66.

⁷ Akasyana abakelubi babili aba golide kumbazu zyosi zibili izya chikupikizyo chila.

⁸ Akapanga ukelubi weka kulubazu loka, sona uyunji kulubazu ulwamwabo ulwa chikupikizyo chila. Akabamamatizya abakelubi bala kuchikupikizyo.

⁹ Abakelubi bala bakakuzulila mumwanya ivipapande vyabo, nukuchikupikila ichikupikizyo chila. Abakelubi bala bakenannya, bo ivyeni vyabo vyenizye ku chikupikizyo.

Ukukomela itebulo

¹⁰ Akapanga itebulo ilya matabwa agha mungwina. Mubutali likaba amasentimita 88, mububaba likaba amasentimita 44, sona mumwanya likaba amasentimita 66.

¹¹ Akalipaka nu golide umwenecho nukulilabannya nu muzele uwa golide umwakuzyungulila.

¹² Akapanga sona ifulemu ipapate, mububaba likaba amasentimita eyiti, nukulilabannya nu muzele uwa golide umwakuzyungulila.

¹³ Akapanga impete folo izya golide, nukuzipinyilila ku nkuto folo kuvinama ivya tebulo.

¹⁴ Impete zila zikaba papipi nu tumatabwa utupapate tula ukuti tuleme amakwi aghakunyamulila itebulo.

¹⁵ Akapanga amakwi agha matabwa agha mungwina, po ghakapakiwa nu golide ukuti ghabanje ghakunyamulila itebulo.

¹⁶ Akapanga imbale ni mbako ni sonta sona na mabeseni aghakubikila ichakwiyipa ichakung'wela. Vyosi vinivi vikaba vya golide umwenecho.

Nizya chakubikapo inyale

¹⁷ Akapanga ichakubikapo inyale icha golide umwenecho. Mubwikalilo bwache na mubulemelo bwache vikaba vya golide uwakusyana bulo. Ubwezya bwache ubwakulabannya, na mani ghache, sona na mani ghache vibanje vyakulemenkana.

¹⁸ Isamba sikisi zikadobosannya mulubazu ulwa chakubikapo inyale. Isamba zitatu zibanje kulubazu loka, sona zitatu kulubazu ulunji.

¹⁹ Patusamba tosi pakaba imbako zitatu zizyo zikaba ngati bwezya ubwa mposya, amani nu bwezya bwache vikaba pakasamba koka. Imbako zitatu zikaba patusamba utunji, isamba sikisi zyosi zila zikadobosannya pachakubikapo inyale.

²⁰ Pa chakubikapo inyale pakabapo imbako folo izyakuyana bulo nu bwezya ubwa mposya sona na mani nu bwezya bwache.

²¹ Ubwezya boka bukaba muntende musamba zibili izyakwanda zizyo zikadobosannya ichakubikapo inyale. Ubwezya ubwabubili bukaba muntende musamba zibili izyabubili, ubwabutatu bukaba muntende musamba zibili izyabutatu.

²² Ubwezya poka ni samba zila vikaba vyakulemenkana ni chakubikapo inyale, ichakusyaniwa nu golide umwenecho.

²³ Akapanga inyale seveni nu tulemelo, ni vyakuyolela itoyi ivya golide umwenecho.

²⁴ Ichakubikapo inyale ni vibombelo vyosi akavipanga nu golide umwenecho uwakung'wama amakilogalamu 34.

Ukupanga ichighemo ichakufukizizya utwakununkila

²⁵ Akapanga ichighemo ichakochelapo ivyakununkila icha matabwa agha mungwina. Chikayana bulo, mubutali chikaba amasentimita 45, mububaba mope chikaba amasentimita 45, po sona mumwanya chikaba amasentimita 90. Impembe zyache zikamamatilana poka ni chighemo.

²⁶ Akachipaka nu golide umwenecho pamwanya ni mbazu zyosi folo sona ni mpembe zyache, akalabannya akamuzele aka golide umwakuzyungulila.

²⁷ Akapanga impete zibili izya golide izyakunyamulila nukuzimamatizya kuntende kuchighemo kumbazu zibili umwakuti zileme amakwi aghakunyamulila.

²⁸ Akapanga amakwi mabili aghakunyamulila agha mungwina nukughapaka nu golide.

Ukwenga amafuta aghakupakazya nutwakununkila

²⁹ Akenga sona amafuta amapaghuliwa aghakupakazya poka nutwakununkila akiza ngati mumo akubombela ufundi pakupanga ivyakununkila.