Ukufuma 36 - IBAYIBOLO 2024

¹ “Po u Bezaleli nu Oholiyabu, poka na bafundi abanji bo babo u Mwene akabapa amahala agha bwafundi ubwa mumo bangazengela Ubuzilo Ubuzelu, bapangaye vyosi ngati mumo u Mwene alamulila.”

Abantu bakwiza ni vyabupi ivyinji nkani

² U Mozesi akamwitizya u Bezaleli nu Oholiyabu, poka na bafundi bosi babo u Mwene akabapa amahala agha bwafundi, sona na babo bakaba nu moyo uwakwavwa pambombo, po u Mozesi akababuzya ukuti bande imbombo.

³ Bakapokela ivyabupi vyosi kwa Mozesi vivyo aba Izilayeli bababika ukuti vibombaye imbombo iyakuzenga Ubuzilo Ubuzelu. Loli aba Izilayeli bakendelela pakwiza nivyakwiyipa mubwighane bwabo indabindabi yosi.

⁴ Po abafundi bosi babo bakabombagha imbombo yosi iyakuzenga Ubuzilo Ubuzelu bakazileka imbombo zyabo

⁵ nukumubuzya u Mozesi ukuti, “Abantu bakwiza ni vyabupi ivyinji nkani ukuchila namumo u Mwene akalamulila.”

⁶ Po u Mozesi akabalamula abantu muvisakasa vyosi vila ukuti, “Patakabepo nayumo umuntu uwakwendelela pakwiza ni vyakwiyipa ivyakuzengela Ubuzilo Ubuzelu.” Po abantu bakaleka pakwiza navyo ivyakwiyipa.

⁷ Pakuti ivyabupi vivyo abantu bakiza navyo vikaba vyinji nkani ukuchilapo pakumalizya imbombo yosi yila.

Ukuzenga Ichisakasa icha Mwene

⁸ Abanavuli abafundi bosi pakasi pabantu babo bakabombagha imbombo iya buzengi bakachizenga Ichisakasa ichizelu icha menda 10 amatonte agha buluu na machesamile na machesamu sona aghakulukiwa ni chifwani icha bakelubi.

⁹ Amenda ghosi aghakuzighila ghakayana bulo, mubutali ghakaba amamita 12 sona mububaba ghakaba amamita mabili.

¹⁰ Bakaghasonannya poka amenda fayivi pakuba mwenda ghoka umukulu, sona bakabomba bunubu na menda aghanji fayivi ghala.

¹¹ Muntende mulubazu ulwa mwenda uwakwanda umukulu bakapanga ingulusu izya mwenda uwa buluu, sona bakabomba bunubu nu mwenda uwabumalilo umukulu ghula.

¹² Bakabika ingulusu 50 ku mwenda uwakwanda, sona bakabomba bunubu nu mwenda uwabumalilo umwakuti zyenannye.

¹³ Po bakapanga utulemelo 50 utwa golide utwakulemenkannya amenda mabili amakulu ghala, umwakuti ghukaba Chisakasa choka.

¹⁴ Bakapanga amenda 11 aghakupangiwa na meya agha mbuzi, ukuti ghabanje ghakuvwinka Ichisakasa pamwanya.

¹⁵ Amenda ghosi 11 ghakayana bulo, mubutali ghakaba amamita 13, sona mububaba ghakaba amamita mabili.

¹⁶ Bakaghasonannya poka amenda fayivi ukuti ghubanje mwenda ghoka umukulu, sona bakabomba bunubu na menda aghanji sikisi ghala pakuba mwenda ghoka umukulu.

¹⁷ Po bakapanga sona ingulusu 50 mulubazu ulwa mwenda ghoka umukulu uwabumalilo, nukubika sona ingulusu 50 mulubazu ulwa mwenda ughunji uwabumalilo.

¹⁸ Bakapanga utulemelo 50 utwa mukuba nukwinjizyamo ingulusu pakughalemenkannya poka amenda mabili amakulu ghala pakuba chisakasa choka.

¹⁹ Bakachipangila Ichisakasa ivikupikizyo ivinji vibili, choka chikaba cha makwela agha dubi amadwibike mu inki inchesamu ichinji chikaba cha mwenda umutonte ukuti vibanje vyakuvwinka pamwanya.

²⁰ Bakachipangila Ichisakasa amafulemu aghakwima agha matabwa agha mungwina.

²¹ Ifulemu lyosi mubutali likaba amamita folo, sona mububaba likaba amasemita 66.

²² Ifulemu lyosi likaba nu tulemelo tubili, umwakuti amafulemu ghalemenkane akiza. Amafulemu ghosi mabili ghakaba nu tulemelo.

²³ Bakapanga amafulemu 20 agha kulubazu ulwakuntende ukwa Chisakasa chila

²⁴ nu bwikalilo 40 ubwa siliva, ifulemu lyoka libanje pabwikalilo bubili, umwakuti ghaleme utulemelo tula.

²⁵ Bakapanga amafulemu 20 agha kulubazu ulwa kumitu ukwa Chisakasa chila.

²⁶ Sona ni vyakwimapo vyache 40 ivya siliva, vibili kuntende kufulemu yoka.

²⁷ Bakapanga amafulemu sikisi ukuti ghabanje kwisinda kubwinjililo bwizuba ubwa Chisakasa.

²⁸ Munkuto izya Chisakasa bakapangilamo amafulemu mabili.

²⁹ Amafulemu mabili ghanagha munkuto ghakamamatiziwa poka ukwandila pasi mupaka pamwanya. Amafulemu mabili ghanagha, ghagho ghakapanga inkuto zibili, ghosi ghanagha ghakapangiwa umwakuyana bulo.

³⁰ Po pakabapo amafulemu eyiti nu bwikalilo 16 ubwa siliva, ifulemu lyoka likaba nubwikalilo bubili.

³¹ Bakapanga sona intatikilo 15 izya matabwa agha mungwina: Intatikilo fayivi zikaba kulubazu loka ulwa chisakasa chila,

³² intatikilo izyamwabo fayivi zikaba kulubazu ulwamwabo ulwa chisakasa, sona intatikilo izyamwabo fayivi zikaba kwisinda ukwa chisakasa.

³³ Ululatikilo ulwa pakasi lukadumusannya pakasi pa mafulemu ukwandila kubumalilo mupaka kubumalilo.

³⁴ Bakaghapaka amafulemu nu golide nukughinjizya mumpete izya golide ukuti zileme. Zyope intatikilo bakazipaka nu golide.

³⁵ Bakasona umwenda umutonte uwakuzighila uwa buluu nu muchesamile, sona nu muchesamu, ghugho ghulabiwe akiza nkani ni chifwani icha bakelubi.

³⁶ Bakachipangila impanda folo izya matabwa agha mungwina, ghagho ghakapakiwa nu golide, sona ghagho ghakaba nu tulemelo nu bwikalilo folo ubwa siliva.

³⁷ Bakabikapo umwenda umutonte uwa buluu nu muchesamile, sona nu muchesamu uwakuzighila pamulyango uwa Chisakasa, ghugho ghulabiwe akiza nkani.

³⁸ Bakachipangila Ichisakasa umwenda uwakuzighila impanda fayivi izya matabwa agha mungwina, izyakupakiwa nu golide, zizyo zikaba nu tulemelo utwa golide. Bakazipangila impanda zinizi ubwikalilo fayivi ubwa mukuba.