Ukufuma 33 - IBAYIBOLO 2024

U Mwene akubalamula aba Izilayeli ukwepapo pighamba ilya Sinayi

¹ Po u Mwene akamubuzya u Mozesi akati, “Epapo pabuzilo ubu poka na bantu babo ukabefya mu Ijiputi mubuke kuchisu chicho nkamulayizya u Abulahamu nu Yisaki nu Yakobo, poka na baluko lwako.

² Nkwiza pakumutuma uwantumi wane pantazi papinyu pakubachimbizyamo aba Kenani naba Amoli naba Hiti naba Pelezi naba Hivi sona naba Yebusi.

³ Bukagha kuchisu icha mboto. Loli ane nemwene ntakubuka namwe, lumo ningabanangannya bulo muzila pachifukwa ichakuti amoyo ghinyu makafu nkani.”

⁴ Bo abantu bivwa amazyu amapalapala ghanagha, bakanda pakulila, sona patakabapo nayumoyumo umuntu uwakuvwala ivyakwibonesekezya akiza.

⁵ Pakuti u Mwene akamubuzya u Mozesi akati, “Ubabuzye aba Izilayeli uti, ‘Amwe mwe bantu aba moyo amakafu nkani. Nanti nkabukagha namwe, napapo po pakabalilo kanandi bulo ngali nabanangannya. Losi ulu vula ivyakwibonesekezya akiza, po nkwiza pakumanya ichakuti imbombe namwe.’ ”

⁶ Po ukwandila pakabalilo kako aba Izilayeli bakepela pighamba ilya Sinayi, batakavwala sona ivyakwibonesekezya akiza.

Nizya Chisakasa icha Mwene

⁷ U Mozesi akizubila pakuchinyamula ichisakasa nukukomela pabutalipo ni visakasa ivya bantu nukuchita ukuti, “Ichisakasa icha Mwene.” Po umuntu wesi yuyo akalondagha pakubuzikizya ichintu chimo kwa Mwene akabukagha kulakula.

⁸ Akabalilo kosi kako u Mozesi bo akubuka ku Chisakasa icha Mwene, umuntu wesi akanyamukagha nukwimilila pamulyango uwa chisakasa chache pakumwenelezya mupaka injile muchisakasa.

⁹ Bo u Mozesi akwinjila muchisakasa impanda iya libingu yikikagha nukwighalila pamulyango, po u Mwene akanenagha nu Mozesi mwibingu lila.

¹⁰ Bo abantu bosi balyennya ibingu lila pamulyango uwa Chisakasa, bakimililagha nukumwiputa, umuntu wesi pamulyango uwa chisakasa chache.

¹¹ U Mwene akanenezannyanga nu Mozesi ngati mumo umuntu akunenezannya nu mumanyani wache. Pisinda pache u Mozesi akanyokela kuvisakasa, loli umwavwilizi wache u Yoshwa umwana uwa Nuni atakapemo muchisakasa mula.

U Mwene akubalayizya pakuba na bantu bache

¹² U Mozesi akamubuzya u Mwene akati, “Wambuzya ukuti, ‘Ubalongolele abantu aba ukubuka nabo kuchisu chila,’ loli utambuzizye umuntu yuyo ukwiza pakumutuma nane. Loli wanena ukuti, ‘Ummenye akiza nkani, sona uhobokite nane.’

¹³ Nanti uhobokite nane, nalamba undanjizye izila zyako umwakuti ningakumanya nukwendelela pakukuhobosya. Ukumbuke sona ukuti uluko ulusaliwa ulu lo luko lwako nu lwako.”

¹⁴ Po u Mwene akamula akati, “Ane nemwene nkwiza pakubuka nawe, sona nkwiza pakubapa umutende.”

¹⁵ U Mozesi akamula akati, “Nanti utakubuka poka naswe, utakatwitikizye ukuti twepepo pabuzilo ubu.

¹⁶ Nkimba abantu bangamanya bulibuli ukuti uhobokite na bantu bako, poka nane nanti utakubuka poka naswe? Ububapo bwako bukwiza pakulesannya pakasi pabantu bako na bantu abanji bosi aba muchisu ichapasi.”

¹⁷ U Mwene akamubuzya u Mozesi akati, “Nkwiza pakuvibomba vivyo wandaba, pachifukwa ichakuti nkumenye nkani, sona nukuti inhobokite nawe.”

¹⁸ Po u Mozesi akamulaba u Mwene akati, “Nalamba, undanjizye ubuchindamu bwako.”

¹⁹ U Mwene akamula akati, “Nkwiza pakukulanjizya ubuchindamu bwane bosi, sona nkwiza pakulitambula itabwa lyane pantazi papako. Nkwiza pakuba ni chisa pa muntu wesi yuyo nkumulonda, sona nkwiza pakuba nichililizi nu muntu wesi yuyo nkumulonda.”

²⁰ U Mwene akati, “Utangachennya icheni chane, pakuti nayumo umuntu anganyennya nukuba mumi.”

²¹ U Mwene akati, “Imilila pilyalabwe lilyo lili papipi nane.

²² Bo ubuchindamu bwane bukudumusannya, nkwiza pakukubika mumpako iya lyalabwe lila nukukuzigha ni nyobe yane mupaka idumusannye.

²³ Nkwiza pakwefya inyobe yane, po ukwiza pakwennya inyuma yane, loli utakwiza pakuchennya icheni chane.”