Ukufuma 32 - IBAYIBOLO 2024

Ichifwani icha ngwata iya golide

¹ Bo abantu bennya ukuti u Mozesi akabila nkani pakwika pighamba bakamuzyungulila u Aloni nukumubuzya ukuti, “Tutazimenye zizyo zyamuwila u Mozesi yunuyu, umuntu yuyo akatwefya mu Ijiputi. Po utupangile uchala uyunji uwakuti atulongozye.”

² U Aloni akabamula akati, “Vula indelebele izya golide zizyo abachi binyu na bana binyu abalumendo, sona na bana binyu abalindu bavwalite nukumpazyo.”

³ Po abantu bala bakavula indelebele zyabo nukumupa u Aloni.

⁴ U Aloni akapokela indelebele zila, akazisungunula nukumata ichifwani icha ngwata icha golide. Abantu bala bakati, “Mwee ba Izilayeli, uyu we chala witu, yuyo akatwefya mu Ijiputi.”

⁵ Bo u Aloni azyennya zinizi, akazenga ichighemo kuntazi kwa chifwani icha ngwata icha golide chila nukufumusya ukuti, “Indabi kukwiza pakuba ulusekelo ulwa Mwene.”

⁶ Pandabindabi nkani abantu bakabika ivyakwiyipa ivyakocha nukubika ivyakwiyipa ivyabupoka. Abantu bala bakalya nukung'wela, po bakanda pakwimba nukwisamula bene.

⁷ Po u Mwene akamulamula u Mozesi akati, “Ika, nyokela lubilo, pakuti abantu babo ukabalongolela ukwepamo mu Ijiputi binyazya bene.

⁸ Bavileka umwalubilolubilo vyosi vivyo nkabalamula ukuti babombaye. Bipangila bene ichifwani icha ngwata icha golide, sona bakuchiputa nukubika ivyakwiyipa nukuti, ‘Mwee ba Izilayeli, aba bo bachala bitu babo bakatwefya mu Ijiputi.’ ”

⁹ U Mwene akati, “Inzimenye ukuti abantu banaba amoyo ghabo makafu nkani.

¹⁰ Polelo undeke bulo umwakuti imbanangannye pachifukwa ichakuti imbakalaliye nkani. Po nkwiza pakukupela awe na baluko lwako pakuba luko ulukulu nkani.”

¹¹ Loli u Mozesi akamulambilizya u Mwene u Chala wache akati, “Wee Mwene, nkimba choni chicho ukubakalalila abantu bako, babo ukabefyamo mu Ijiputi na maka ghako amakulu nkani sona nu bulaghili bwako ubukulu?

¹² Nkimba ukulonda ukuti aba Ijiputi banenaye ukuti, ‘Akabefyamo abantu bache mu Ijiputi nu lubatiko ulwakuti abaghoghele mumaghamba nukubazimizya?’ Utakabakalalilaye abantu bako, utakabanangannye.

¹³ Kumbuka ukuti ukalapa ku mubombi wako u Abulahamu nu Yisaki nu Izilayeli ukuti, ‘Nkwiza pakubalizya abaluko lwinyu ngati zyo ntondwa, sona nkwiza pakubapa abaluko lwabo ichisu chosi chinichi ukuti chibanje chabo ni chabo bwila na bwila.’ ”

¹⁴ Po u Mwene akatonta umoyo, sona atakabanangannya abantu bache ukuyana namumo akabatikila.

¹⁵ U Mozesi akaghalabuka nukwika pighamba pala, bo anyamuye amabwe amapapate mabili ghagho ghakasimbiwapo amalamulo kosi na kosi.

¹⁶ U Chala umwenecho weyuyo akapanga amabwe amapapate ghala nukusimbapo amalamulo ghache.

¹⁷ Bo u Yoshwa ivwa abantu bakukolomoka, akamubuzya u Mozesi akati, “Nkwivwa ichongo icha bwite muvisakasa.”

¹⁸ U Mozesi akamula akati, “Ichongo chicho nkwivwa te chongo chabupoti pamo ichongo ichakupotwa, awe, loli chongo icha lusekelo.”

¹⁹ Bo u Mozesi apalamila ku visakasa nukwennya ichifwani icha ngwata chila sona abantu bakwimba, akakalala nkani. Palapala muntende mwighamba akaghasumbila pasi amabwe amapapate ghagho akanyamula munyobe zyache, po ghakamenyunkana.

²⁰ Akasenda ichifwani icha ngwata yiyo bakapanga nukuyocha, sona akayisya pakuba litoyi nukulyongannya na mizi. Po akabang'wesya aba Izilayeli.

²¹ Pisinda pache u Mozesi akamulalusya u Aloni akati, “Nkimba abantu banaba bakakubombela choni ukuti ubapele pakunanga bunubu?”

²² U Aloni akamwamula akati, “Utakankalalilaye. Awe uzimenye bulo namumo abantu banaba bakwilaghila pakubomba imbibi.”

²³ Bakambuzya bakati, “Tutazimenye zizyo zyamuwila u Mozesi, umuntu yuyo akatulongolela pakwepamo mu Ijiputi. Po utupangile abachala abanji abakuti batulongozyanje.”

²⁴ Po nkababuzya nkati, “Umuntu wesi yuyo ali ni ndelebele izya golide avule nukumpa. Nkazisumbila mumoto, po zikanduka chifwani icha ngwata iyi.”

²⁵ U Mozesi akazimanya ukuti abantu bakabomba ivya bupunganu, wepe nu Aloni akabaleka bulo ukuti babombaye ivya bupunganu pamaso pa balwani babo.

²⁶ U Mozesi akimilila pamulyango uwakwinjilila muvisakasa nukukolomoka ukuti, “Umuntu wesi yuyo wa Mwene, ize kuno.” Po Aba Levi bosi bakamuzyungulila.

²⁷ Akababuzya akati, “U Mwene u Chala uwa ba Izilayeli ati, ‘Umuntu wesi asende upanga nukunyokela muvisakasa ukwandila kumulyango ghoka mupaka kughunji, pakumughogha umukamu wache, umumanyani wache, sona nu mupalamani wache.’ ”

²⁸ Aba Levi bala bakabomba zizyo u Mozesi akabalamula, po bakabaghogha abantu 3,000 pisiku lilalila.

²⁹ U Mozesi akati, “Umusanya ughu mwipaghula mwebene pakuba mwe baputi aba Mwene pakubaghogha abana binyu, na bakamu binyu bulo, po umusanya ughu u Mwene abasaya.”

³⁰ Indabi yache u Mozesi akababuzya abantu bala akati, “Amwe mwananga nkani. Loli losi ulu nkukwela sona pighamba ilya Mwene pakubiputila, lumo angabahobokela imbibi zyinyu.”

³¹ Po u Mozesi akanyokela nukuti, “Wee Mwene, abantu aba bananga nkani. Bipangila bene ichifwani icha golide pakuba we chala wabo nukuchiputa.

³² Nalamba ubahobokele imbibi zyabo. Loli nanti utakubahokela chizapo pakuzimya itabwa lyane mwibuku mumo usimbitemo amatabwa agha bantu bako.”

³³ Loli u Mwene akamwamula u Mozesi akati, “Umuntu wesi yuyo anangila, weyuyo nkwiza pakulizimya itabwa lyache mwibuku lyane.

³⁴ Losi ulu bukagha pakubalongozezya abantu kubuzilo bubo nkakubuzya. Ukumbuke ukuti uwantumi wane akwiza pakubalongolela. Loli isiku likwiza lilyo nkwiza pakubafunda abantu banaba pachifukwa icha mbibi zyabo.”

³⁵ Po u Mwene akabafunda ni chiwaya abantu bala, pachifukwa ichakuti bakamufyenga bulo u Aloni ukuti abapangile ichifwani icha ngwata icha golide.