Ukufuma 32 - IBAYIBOLO 2024Ichifwani icha ngwata iya golide ( Ukk. 9.6-29 ) 1 Bo abantu bennya ukuti u Mozesi akabila nkani pakwika pighamba bakamuzyungulila u Aloni nukumubuzya ukuti, “Tutazimenye zizyo zyamuwila u Mozesi yunuyu, umuntu yuyo akatwefya mu Ijiputi. Po utupangile uchala uyunji uwakuti atulongozye.” 2 U Aloni akabamula akati, “Vula indelebele izya golide zizyo abachi binyu na bana binyu abalumendo, sona na bana binyu abalindu bavwalite nukumpazyo.” 3 Po abantu bala bakavula indelebele zyabo nukumupa u Aloni. 4 U Aloni akapokela indelebele zila, akazisungunula nukumata ichifwani icha ngwata icha golide. Abantu bala bakati, “Mwee ba Izilayeli, uyu we chala witu, yuyo akatwefya mu Ijiputi.” 5 Bo u Aloni azyennya zinizi, akazenga ichighemo kuntazi kwa chifwani icha ngwata icha golide chila nukufumusya ukuti, “Indabi kukwiza pakuba ulusekelo ulwa Mwene.” 6 Pandabindabi nkani abantu bakabika ivyakwiyipa ivyakocha nukubika ivyakwiyipa ivyabupoka. Abantu bala bakalya nukung'wela, po bakanda pakwimba nukwisamula bene. 7 Po u Mwene akamulamula u Mozesi akati, “Ika, nyokela lubilo, pakuti abantu babo ukabalongolela ukwepamo mu Ijiputi binyazya bene. 8 Bavileka umwalubilolubilo vyosi vivyo nkabalamula ukuti babombaye. Bipangila bene ichifwani icha ngwata icha golide, sona bakuchiputa nukubika ivyakwiyipa nukuti, ‘Mwee ba Izilayeli, aba bo bachala bitu babo bakatwefya mu Ijiputi.’ ” 9 U Mwene akati, “Inzimenye ukuti abantu banaba amoyo ghabo makafu nkani. 10 Polelo undeke bulo umwakuti imbanangannye pachifukwa ichakuti imbakalaliye nkani. Po nkwiza pakukupela awe na baluko lwako pakuba luko ulukulu nkani.” 11 Loli u Mozesi akamulambilizya u Mwene u Chala wache akati, “Wee Mwene, nkimba choni chicho ukubakalalila abantu bako, babo ukabefyamo mu Ijiputi na maka ghako amakulu nkani sona nu bulaghili bwako ubukulu? 12 Nkimba ukulonda ukuti aba Ijiputi banenaye ukuti, ‘Akabefyamo abantu bache mu Ijiputi nu lubatiko ulwakuti abaghoghele mumaghamba nukubazimizya?’ Utakabakalalilaye abantu bako, utakabanangannye. 13 Kumbuka ukuti ukalapa ku mubombi wako u Abulahamu nu Yisaki nu Izilayeli ukuti, ‘Nkwiza pakubalizya abaluko lwinyu ngati zyo ntondwa, sona nkwiza pakubapa abaluko lwabo ichisu chosi chinichi ukuti chibanje chabo ni chabo bwila na bwila.’ ” 14 Po u Mwene akatonta umoyo, sona atakabanangannya abantu bache ukuyana namumo akabatikila. 15 U Mozesi akaghalabuka nukwika pighamba pala, bo anyamuye amabwe amapapate mabili ghagho ghakasimbiwapo amalamulo kosi na kosi. 16 U Chala umwenecho weyuyo akapanga amabwe amapapate ghala nukusimbapo amalamulo ghache. 17 Bo u Yoshwa ivwa abantu bakukolomoka, akamubuzya u Mozesi akati, “Nkwivwa ichongo icha bwite muvisakasa.” 18 U Mozesi akamula akati, “Ichongo chicho nkwivwa te chongo chabupoti pamo ichongo ichakupotwa, awe, loli chongo icha lusekelo.” 19 Bo u Mozesi apalamila ku visakasa nukwennya ichifwani icha ngwata chila sona abantu bakwimba, akakalala nkani. Palapala muntende mwighamba akaghasumbila pasi amabwe amapapate ghagho akanyamula munyobe zyache, po ghakamenyunkana. 20 Akasenda ichifwani icha ngwata yiyo bakapanga nukuyocha, sona akayisya pakuba litoyi nukulyongannya na mizi. Po akabang'wesya aba Izilayeli. 21 Pisinda pache u Mozesi akamulalusya u Aloni akati, “Nkimba abantu banaba bakakubombela choni ukuti ubapele pakunanga bunubu?” 22 U Aloni akamwamula akati, “Utakankalalilaye. Awe uzimenye bulo namumo abantu banaba bakwilaghila pakubomba imbibi.” 23 Bakambuzya bakati, “Tutazimenye zizyo zyamuwila u Mozesi, umuntu yuyo akatulongolela pakwepamo mu Ijiputi. Po utupangile abachala abanji abakuti batulongozyanje.” 24 Po nkababuzya nkati, “Umuntu wesi yuyo ali ni ndelebele izya golide avule nukumpa. Nkazisumbila mumoto, po zikanduka chifwani icha ngwata iyi.” 25 U Mozesi akazimanya ukuti abantu bakabomba ivya bupunganu, wepe nu Aloni akabaleka bulo ukuti babombaye ivya bupunganu pamaso pa balwani babo. 26 U Mozesi akimilila pamulyango uwakwinjilila muvisakasa nukukolomoka ukuti, “Umuntu wesi yuyo wa Mwene, ize kuno.” Po Aba Levi bosi bakamuzyungulila. 27 Akababuzya akati, “U Mwene u Chala uwa ba Izilayeli ati, ‘Umuntu wesi asende upanga nukunyokela muvisakasa ukwandila kumulyango ghoka mupaka kughunji, pakumughogha umukamu wache, umumanyani wache, sona nu mupalamani wache.’ ” 28 Aba Levi bala bakabomba zizyo u Mozesi akabalamula, po bakabaghogha abantu 3,000 pisiku lilalila. 29 U Mozesi akati, “Umusanya ughu mwipaghula mwebene pakuba mwe baputi aba Mwene pakubaghogha abana binyu, na bakamu binyu bulo, po umusanya ughu u Mwene abasaya.” 30 Indabi yache u Mozesi akababuzya abantu bala akati, “Amwe mwananga nkani. Loli losi ulu nkukwela sona pighamba ilya Mwene pakubiputila, lumo angabahobokela imbibi zyinyu.” 31 Po u Mozesi akanyokela nukuti, “Wee Mwene, abantu aba bananga nkani. Bipangila bene ichifwani icha golide pakuba we chala wabo nukuchiputa. 32 Nalamba ubahobokele imbibi zyabo. Loli nanti utakubahokela chizapo pakuzimya itabwa lyane mwibuku mumo usimbitemo amatabwa agha bantu bako.” 33 Loli u Mwene akamwamula u Mozesi akati, “Umuntu wesi yuyo anangila, weyuyo nkwiza pakulizimya itabwa lyache mwibuku lyane. 34 Losi ulu bukagha pakubalongozezya abantu kubuzilo bubo nkakubuzya. Ukumbuke ukuti uwantumi wane akwiza pakubalongolela. Loli isiku likwiza lilyo nkwiza pakubafunda abantu banaba pachifukwa icha mbibi zyabo.” 35 Po u Mwene akabafunda ni chiwaya abantu bala, pachifukwa ichakuti bakamufyenga bulo u Aloni ukuti abapangile ichifwani icha ngwata icha golide. |
Lambya Bible © Bible Society of Malawi, 2024.
Bible Society of Malawi