Ukufuma 31 - IBAYIBOLO 2024

Abafundi abakuzenga Ichisakasa icha Mwene

¹ Po u Mwene akamubuzya u Mozesi akati,

² “Ivwa kuno, namusala u Bezaleli umwana uwa Uli, umwizukulu uwa Huli uwaluko ulwa Yuda.

³ Namwizuzya nu muzimu wane, sona namupa ubumanyi na mahala nu bwafundi ubwa mbombo izya nyobe

⁴ umwakuti abombaye imbombo iyakubatika ivintu ivya golide nu siliva, sona nu mukuba,

⁵ nukubiza amabwe, na makwi, sona nukubomba imbombo zyosi izya nyobe.

⁶ Namusala sona u Oholiyabu umwana uwa Ahisamaki uwaluko ulwa Dani, ukuti abombaye poka nawe. Nabapa sona amahala abafundi abanji bosi aghapangila ivintu vyosi ukuyana namumo nakubuzizya.

⁷ Bapange Ichisakasa icha Mwene, ni Bokosi ilya Lufingo ni chikupikizyo chache, sona ni vibombelo vyosi ivya muchisakasa,

⁸ ni tebulo poka ni vibombelo vyache, ichakubikapo inyale icha golide umwenecho poka ni vibombelo vyache vyosi, ni chighemo ichakufukizizyapo utwakununkila,

⁹ ni chighemo ichakochelapo ichakwiyipa ichakocha, poka ni vibombela vyache vyosi, ni beseni ilyakusukusulila poka nu bwikalilo bwache,

¹⁰ na menda aghakulukiwa akiza amapaghuliwa agha muputi u Aloni na bana bache, bo bakubomba imbombo iya buputi,

¹¹ na mafuta aghakupakazya nu twakufukizya utwakununkila utwa mu Chipinda Ichizelu. Bapange ivintu vyosi vinivi ukuyana namumo nakulamulila.”

Nizya Isiku Ilyakutuzya

¹² Po u Mwene akamubuzya u Mozesi akati,

¹³ “Ubabuzye aba Izilayeli uti, ‘Mulikumbukaye Isiku Ilyakutuzya, pakuti cho chimanyilo pakasi papinyu nane mupaka inkulilo zyosi izya muntazi ichakulanjizya ukuti ane ne Mwene ne nabapela amwe pakuba mwe bantu bazelu.

¹⁴ “ ‘Mulikumbukaye Isiku Ilyakutuzya pakuba lipaghuliwa. Umuntu wesi yuyo akulinyazya aghoghiwanje, sona umuntu wesi yuyo akubomba imbombo pisiku lilalila epusiwanjepo pakasi pabantu bache.

¹⁵ Mubombaye imbombo amasiku sikisi, loli isiku ilyaseveni lyo Lisiku Ilyakutuzya, lilyo lisiku lipaghuliwa ilya Mwene. Umuntu wesi yuyo akubomba imbombo pisiku linili aghoghiwanje.

¹⁶ Aba Izilayeli balikumbukaye Isiku Ilyakutuzya inkulilo zyabo zyosi pakuba chimanyilo icha lufingo ulwa bwila na bwila.

¹⁷ “ ‘Chikwiza pakuba chimanyilo icha bwila na bwila pakasi papane naba Izilayeli pachifukwa ichakuti ane ne Mwene nene nkapela kumwanya ni chisu ichapasi amasiku sikisi, loli pisiku ilyaseveni nkaleka pakubomba, po nkatuzya.’ ”

¹⁸ Bo u Mwene amala pakunena nu Mozesi pighamba ilya Sinayi, akamupa amabwe amapapate mabili, papo u Chala umwenecho akasimbapo amalamulo ni nyobe yache.