Ukufuma 30 - IBAYIBOLO 2024

Nizya chighemo ichakufukizizyapo utwakununkila

¹ “Upange ichighemo ichakufukizizyapo utwakununkila icha matabwa agha mungwina.

² Chibanje chakuyana bulo, mubutali chibanje amasentimita 45, mububaba chibanje amasentimita 45, sona mumwanya chibanje amasentimita 90. Impembe zyache uzimamatizye kuchighemo.

³ Uchipake nu golide umwenecho pamwanya ni mbazu zyosi folo, sona ni mpembe zyache nukulabannya akamuzele aka golide umwakuzyungulila.

⁴ Upange impete zibili izya golide izyakunyamulila nukuzimamatizya kuntende kuchighemo kumbazu zibili umwakuti zileme amakwi aghakunyamulila.

⁵ Upange amakwi mabili aghakunyamulila agha mungwina nukughapaka nu golide.

⁶ Uchibike ichighemo chinichi kuzi ukwa mwenda uwakuzighila, ghugho ghuli kuntazi ukwa Bokosi ilya Lufingo. Pabuzilo bunubu po papo nkwiza pakukomana namwe.

⁷ “Indabindabi yosi, bo u Aloni akukozya inyale, afukizyanje utwakununkila pachighemo.

⁸ Bo akukozya inyale pachamabwila, afukizyanje utwakununkila. Ichakwiyipa icha twakununkila chinichi chibanje pamaso pa Mwene mupaka inkulilo izya muntazi.

⁹ Utakabikaye pachighemo chinichi utwakufukizya utwakununkila tuto tunyazu, pamo ichakwiyipa ichakocha icha chinyamana, pamo ichakwiyipa icha busu, pamo ichakwiyipa icha vinyo.

¹⁰ Koka pamwaka, u Aloni abombaye inyiho izya kuchiswefya ichighemo pakupaka impembe folo pakubombezya ibanda ilya chinyamana chicho chakwiyipa ichakupepesezya imbibi. Inyiho zinizi zibombiwanje umwaka nu mwaka mupaka inkulilo zyosi izya muntazi. Ichighemo chinichi chibanje chizelu nkani, sona ichipaghuliwa kwa Mwene.”

Nizya musonko uwa Chisakasa icha Mwene

¹¹ U Mwene akamubuzya u Mozesi akati,

¹² “Bo ukubabelenga aba Izilayeli, umuntu wesi asonkele kwa Mwene ichakwiyipa ichakutabulila ubumi bwache umwakuti ichiwaya chitakabawile abantu, bo ukubabelenga.

¹³ Umuntu wesi yuyo abaghiye pakubelengiwa alipile indalama hafu izya shekeli, ukuyana ni chipimilo icha Ubuzilo Ubuzelu ubwa Chala. Umuntu wesi abike ichakwiyipa chinichi pakuba cha Mwene.

¹⁴ Umuntu wesi yuyo abelengiwa, uwamaka 20 pamo ukuchilapo abike ichakwiyipa kwa Mwene.

¹⁵ Umuntu umukabi atakalipile inyinji ukuchila amashekeli amagalamu sikisi, sona umuntu umupina atakalipile nandi ukuchila amashekeli amagalamu sikisi, bo akubutabula ubumi bwache.

¹⁶ Pokela indalama zizyo aba Izilayeli bakubika nukuzibombezya imbombo izya mu Chisakasa icha Mwene. Umusonko ghunughu ghukwiza pakuba malipilo aghakutabulila ubumi bwabo, po ane ne Mwene nkwiza pakubakumbuka.”

Nizya beseni ilyakusukusulila

¹⁷ U Mwene akamubuzya u Mozesi akati,

¹⁸ “Upange ibeseni ilyakusukusulila ilya mukuba, poka nu bwikalilo bwache ubwa mukuba. Ulyikazye pakasi pa Chisakasa icha Mwene na pachighemo, sona upungulilemo amizi.

¹⁹ U Aloni na bana bache basukusule munyobe na munyayo zyabo mulamula.

²⁰ Bo bakwinjila mu Chisakasa icha Mwene, pamo bo bakupalamila ku chighemo pakubika ichakwiyipa ichakocha kwa Mwene, nanti basukusula bulo na mizi ghanagha, batakwiza pakufwa.

²¹ Basukusule munyobe na munyayo zyabo umwakuti batakafwe. Ulu lo lulaghilo ulwakuti abene na baluko lwabo balukonkaye bwila na bwila.”

Nizya mafuta aghakupakazya

²² U Mwene akamubuzya u Mozesi akati,

²³ “Usende utwakununkila utwiza nkani utwakung'wama amakilogalamu sikisi agha mule uwa mizi, na makilogalamu matatu agha kinamoni, sona na makilogalamu matatu agha muba aghakununkila nkani,

²⁴ na malita sikisi agha mafuta agha kasiya (amalita ghache ghapimiwe ukuyana ni chipimilo icha mu Buzilo Ubuzelu). Ongannya na mafuta agha misyunguti aghakukwana amalita folo.

²⁵ Ongannya poka utwakununkila tunutu pakwenga amafuta amapaghuliwa aghakupakazya.

²⁶ Ughabombezye amafuta ghanagha pakuchipakazya Ichisakasa icha Mwene, ni Bokosi ilya Lufingo,

²⁷ ni tebulo poka ni vibombelo vyache, ni chakubikapo inyale poka ni vibombelo vyache, sona ni chighemo ichakufukizizyapo utwakununkila,

²⁸ ni chighemo ichakochelapo ichakwiyipa ichakocha, poka ni vibombelo vyache, sona ni beseni ilyakusukusulilamo poka nu bwikalilo bwache.

²⁹ Uvipaghule ivintu vinivi pakuba vizelu nkani umwakuti ichintu chosi chicho chikuvipalamasya chikwiza pakuba chizelu.

³⁰ “Po umupakazye na mafuta u Aloni na bana bache nukubapaghula pakuba baputi bane.

³¹ Ubabuzye aba Izilayeli uti, ‘Amafuta ghanagha ghakwiza pakuba mafuta ghane mazelu aghakupakazya inkulilo zyinyu zyosi izya muntazi.

³² Utakamupakazyanje umuntu bulo, sona utakengaye amafuta aghanji aghakuyana na mafuta ghanagha. Amafuta agha mazelu, sona ughasende pakuba mazelu.

³³ Umuntu wesi yuyo akwenga amafuta aghakuyana na mafuta ghanagha, pamo akumupakazya umuntu bulo yuyo te muputi, akwiza pakwepusiwapo pakasi pabantu bache.’ ”

Nizya twakufukizya utwakununkila

³⁴ Po u Mwene akamubuzya u Mozesi akati, “Senda ivyakununkila akiza ivi: Usitakite nu onika na galibanumu nu twakununkila utwakufukizya utwenecho

³⁵ nukuyannya utwakufukizya utwakununkila ngati mumo akubombela uwakupanga utwakununkila. Ulungemo imbeya ukuti tubanje tuzelu sona nu tupaghuliwa.

³⁶ Usyeko vimo nukuvibika pantazi pa Bokosi ilya Lufingo lilyo lili mu Chisakasa icha Mwene, papo nkwiza pakukomana na bantu bane. Utusende pakuba tuzelu nkani.

³⁷ Po utakayannyanje utwakufukizya utwakununkila utunji utwakuyana na tunutu pakuba twako. Utusende pakuba tuzelu pamaso pa Mwene.

³⁸ Nanti umuntu uyunji bulo akuyannya utwakufukizya utwakununkila utwakuyana na tunutu pakuba twakununkila, akwiza pakwefiwapo pakasi pabantu bache.”