Ukufuma 29 - IBAYIBOLO 2024

Ukupaghuliwa ukwa Aloni na bana bache

¹ “Izi zyo zizyo ubombaye nanti ukumupaghula u Aloni na bana bache, pakuba baputi: Senda inkambaku inyana yoka na badubi babili abasita chilema nachimochimo.

² Ubombezye ubusu ubutinye nkani ubwa ngano, loli butakabe ni chilungo. Upiye ivibama ivyakongannya na mafuta agha misyunguti. Ivibama vimo vitakabanje na mafuta, ivinji vibanje vitumbuwa ivipapate nkani ivyakupakiwa na mafuta.

³ Uvibike muchidudunga nukwiyipavyo kukwane, poka ni nkambaku inyana na badubi babili bala.

⁴ Wize nu Aloni na bana bache pamulyango uwa Chisakasa icha Mwene, sona ubozye na mizi.

⁵ Po umuvwike u Aloni ilaya ni nkazo nu efodi, ichakuvwala pachifuba, sona nu lamba mumusana wache, yuyo alukiwe akiza.

⁶ Umuvwike impumpu kumutu wache yiyo yilukiwe na mazyu aghakuti, ‘Impaghuliwa kwa Mwene.’

⁷ Senda amafuta nukumupungulila pamutu wache nukumupakazya.

⁸ Pisinda pache ubasende abana bache abanavuli nukubavwika inkazo.

⁹ Upinye abalamba mumisana yabo nukubavwika ivipewa. U Aloni na bana bache ubimikaye bunubu. Po abene na baluko lwabo bambombelaye imbombo iya buputi bwila na bwila.

¹⁰ “Wize ni nkambaku inyana pamulyango uwa Chisakasa icha Mwene, po umubuzye u Aloni na bana bache ukuti babike inyobe zyabo pamutu uwa nkambaku yila.

¹¹ Uyibole inkambaku yila pamaso pa Mwene pamulyango uwa Chisakasa icha Mwene.

¹² Usendeko ibanda ilya nkambaku yila nukulipaka pampembe izya chighemo pakubombezya akafingwi kako. Ukupule ibanda lyosi ilyakusyala pabwikalilo ubwa chighemo.

¹³ Pisinda pache usende amafuta ghosi ghagho ghamamatiye amala ni chigaba ichiza nkani icha itima ni figho zyosi zibili, poka na mafuta ghache nukuvyocha vyosi pachighemo.

¹⁴ Loli uyoche inyama iya nkambaku yila kuzi ukwa visakasa, nikwela lyache ni nyama yache sona na mala ghache. Ichi cho chakwiyipa ichakupepesezya imbibi izya muputi.

¹⁵ “Usende udubi weka, po u Aloni na bana bache babike inyobe zyabo pamutu uwa dubi yula.

¹⁶ Umubole udubi yula, po usende ibanda lyache nukulinyafila mumbazu zyosi folo izya chighemo.

¹⁷ Umudumulannye udubi muvipuzavipuza nukusuka ivya mukasi ni vinama ivya kwisinda. Uvilambalike ivigaba vila pamwanya pamutu ni vigaba ivinji vila.

¹⁸ Umoche udubi wesi yula pachighemo ukuti chibanje chakwiyipa ichakocha kwa Mwene. Umunusi uwa chakwiyipa chinichi ghukumuhobosya u Mwene.

¹⁹ “Usende udubi uyunji, po u Aloni na bana bache babike inyobe zyabo pamutu wache.

²⁰ Umubole, sona usende ibanda lyache limo nukulipaka kubumalilo ubwa ikutu ilya ndilo ilya Aloni na bana bache, numusumwe uwa nyobe indilo zyabo, sona numusumwe uwa lwayo ulwa ndilo zyabo. Po unyafile ibanda ilyakusyala mumbazu zyosi folo izya chighemo.

²¹ Po usendeko ibanda limo lilyo lili pachighemo, na mafuta aghakupakazya nukumunyafila u Aloni na menda ghache. Ubanyafile sona abana bache poka na menda ghabo. Po u Aloni na bana bache, poka na menda ghabo bakwiza pakuba bapaghuliwa.

²² “Pakuti udubi uyu wakubimikila abaputi, usende amafuta agha musinda, na mafuta ghosi ghagho ghamamatiye amala, ni chigaba ichiza nkani icha itima, ni figho zyosi zibili poka na mafuta ghache, sona ni ntapatapa indilo.

²³ Muchidudunga chicho chili pamaso pa Mwene, usendemo ichibama choka chicho chipakiwe na mafuta, ni chibama choka chicho chite ni chilungo, sona ni chitumbuwa choka ichipapate.

²⁴ Uvibike vyosi vinivi munyobe izya Aloni na bana bache, umwakuti vibanje chakwiyipa ichakuzyunguzya mumwanya pamaso pa Mwene.

²⁵ Pisinda pache wefyemo munyobe zyabo nukuvyocha pachighemo pamwanya pa chakwiyipa ichakocha chila. Umunusi uwa chakwiyipa chinichi ghukumuhobosya u Mwene.

²⁶ “Po usende akajimbi aka dubi yula akakumwimikila u Aloni pamaso pa Mwene ukuti chibanje chakwiyipa ichakuzyunguzya mumwanya. Ichigaba chinichi icha nyama yila chikwiza pakuba chako.

²⁷ “Umpaghulile akajimbi ni ntapatapa iya dubi yuyo akabombeziwa pakumwimika u Aloni na bana bache ukuti chibanje chakwiyipa ichakuzyunguzya mumwanya.

²⁸ Aba Izilayeli babikaye ivyakwiyipa vinivi. Ivi vyo vivyo vibanje vya Aloni na bana bache bwila na bwila, vivyo aba Izilayeli babikaye kwa Mwene ukufuma muvyakwiyipa vyabo ivyabupoka.

²⁹ “Amenda amapaghuliwa agha Aloni ghanagha ghakwiza pakupeghiwa ku bana bache abalumendo umwakuti bavwalaye bo bakwimikiwa.

³⁰ Umwana uwa Aloni yuyo akumupyana uwise pakuba muputi, avwalaye amenda ghanagha amasiku seveni, bo akwinjila pakubomba imbombo mu Chipinda Ichizelu mu Chisakasa icha Mwene.

³¹ “Usende udubi uwakumwimikila u Aloni nabana bache nukupiya inyama mu Chipinda Ichizelu.

³² U Aloni na bana bache balyanje inyama yila pamulyango uwa Chisakasa icha Mwene poka ni vibama vivyo vili muchidudunga.

³³ Balyanje vyosi vivyo vikabikiwa kwa Mwene pakuba ichakwiyipa ichakupepesezya imbibi, bo bakwimikiwa. Umuntu bulo atakalye ichakulya chinichi, loli umuputi mwene pachifukwa ichakuti chipaghuliwa.

³⁴ Nanti inyama iyakumwimikila poka ni vibama vyasyalako mupaka pandabindabi, muvyoche. Mutakavilyanje pachifukwa ichakuti vipaghuliwa.

³⁵ “Umu momumo ukwiza pakumwimikila u Aloni na bana bache ukuyana namumo nakulamulila. Ukwiza pakubomba ulwiho ulwakwimikila ukwa amasiku seveni.

³⁶ Isiku ni siku ubikaye inkambaku yoka ukuti chibanje chakwiyipa ichakupepesezya imbibi. Ni chakwiyipa chinichi ukwiza pakuchiswefya ichighemo. Po uchipake na mafuta agha musyunguti ukuti chibanje chizelu.

³⁷ Ubombe zinizi isiku ni siku, sona amasiku seveni. Po ichighemo chikwiza pakuba chizelu nkani, sona umuntu wesi pamo ichintu chicho chikupalamasya ichighemo chinichi chikwiza pakuba chizelu.

Ivyakwiyipa ivya isiku ni siku

³⁸ “Isiku ni siku ichi cho chakwiyipa chicho mubikaye pachighemo: Abana babili abang'ozi aba mwaka ghoka.

³⁹ Umubike weka pandabindabi, sona uyunji umubike pachamabwila.

⁴⁰ Poka nu mwana uwa ng'ozi uwakwanda yula ikilogalamu lyoka ilya busu ubutinye ubwakongannya ni lita lyoka ilya mafuta agha misyunguti ukuti chibanje chakwiyipa icha vinyo.

⁴¹ Ubike umwana uwa ng'ozi uwabubili pachamabwila nkani poka ni chakwiyipa icha busu nicha vinyo ukuyana namumo ukubombela pandabindabi. Umunusi uwa chakwiyipa chinichi ghukumuhobosya u Mwene.

⁴² “Ichakwiyipa chinichi chibikiwanje isiku ni siku ukuti chibanje chakwiyipa ichakocha mupaka inkulilo zyosi izya muntazi. Uchibike pamaso pa Mwene pamulyango uwa Chisakasa icha Mwene papo nkwiza pakukomana nabo nukunena nawe.

⁴³ Palapala nkwiza pakukomana naba Izilayeli, sona ubuzilo bunubu bukwiza pakuba buzelu pachifukwa icha buchindamu bwane.

⁴⁴ “Nkwiza pakuchipaghula Ichisakasa ni chighemo bulo, sona nkwiza pakumupaghula u Aloni na bana bache pakuba baputi bane.

⁴⁵ Nkwiza pakwikala pakasi paba Izilayeli, po nkwiza pakuba ne Chala wabo.

⁴⁶ Bakwiza pakummanya ukuti ane ne Mwene u Chala wabo, yuyo akabefyamo muchisu icha Ijiputi umwakuti nikale pakasi papabo. Ane ne Mwene u Chala wabo.