Ukufuma 28 - IBAYIBOLO 2024

Amenda agha buputi

¹ “Umwimike uwamwinyu u Aloni poka na bana bache abalumendo pakasi paba Izilayeli pakuba baputi. Banaba bo aba: U Nadabu nu Abihu nu Eleyazala, sona nu Itamali.

² Umusonele uwamwinyu u Aloni amenda amapaghuliwa umwakuti ghamupe umuchizi, sona nukuti abonekaye akiza.

³ Ubabuzye abafundi bosi babo nabapa ichabupi pambombo iyakusona umwakuti bamusonele u Aloni inkazo, umwakuti apaghuliwe pakuba muputi.

⁴ Ubalamule ukuti basone ichapachifuba nu efodi, ni nkazo, ni laya lilyo lilabiwe akiza nkani, ni mpumpu, sona nu lamba. Bamusonele amenda ghanagha uwamwinyu u Aloni na bana bache abalumendo pakuba baputi abakumbombela.

⁵ Bombezya umwenda umutonte uwa golide, nuwa buluu nu muchesamile, sona nu muchesamu.

⁶ Bapange u efodi uwa mwenda umutonte umulabannye nu golide nu buzi ubwa buluu nu buchesamile nu buchesamu.

⁷ U efodi yula abanje nu twenda tubili pavipunko, tuto tusoneleliwe munkuto zyache.

⁸ Bapange sona ulamba umulabannye uwa mwenda umutonte uwa buluu nu muchesamile, sona nu muchesamu, yuyo apangiwe akiza nkani ukuti apinyililiwe ku efodi umwakuti ghubanje mwenda ghoka.

⁹ “Usende amabwe mabili aghamutengo agha onikisi, ubizepo amatabwa 12 agha bana aba Izilayeli,

¹⁰ ukuyana na kapapiliwe kabo. Usimbepo amatabwa sikisi pibwe lyoka, sona pibwe ilinji usimbepo amatabwa aghanji sikisi.

¹¹ Ughabize amatabwa agha bana aba Izilayeli pamabwe mabili ghanagha ukuyana namumo umubiza mabwe akubombela. Po ughabike amabwe ghala muvyakubikilamo ivya golide.

¹² Ughasonelele mutwenda utwa efodi pavipunko pakwimilila inko 12 izya ba Izilayeli. U Aloni aghabaghalaye amatabwa ghala umwakuti ane ne Mwene imbakumbukaye abantu bane.

¹³ Ivyakubikilamo vibili vinivi vibanje vya golide,

¹⁴ ni minyololo mibili iya golide umwenecho ngati mpote, nukuyipinyilila ku vyakubikilamo amabwe vila.

Akanyambi akakuvwala pachifuba

¹⁵ “Usone akiza nkani akanyambi akakuvwala pachifuba, kako ukwiza pakuvwalagha bo ukulonga inongwa. Usone ukuyana namumo bakusonela u efodi uwa mwenda umutonte uwa golide, nuwa buluu nu muchesamile nu muchesamu, yuyo alukiwe akiza nkani.

¹⁶ Kanaka ubukulu bwache buyane bulo nu mwenda, ghugho wapetekiwa kabili, mubutali kabanje amasentimita 22, sona mububaba kabanje amasentimita 22.

¹⁷ Usonelemo imizele folo iya mabwe aghamutengo. Mumuzele uwakwanda ubikemo utumabwe utwamutengo utwa lubi nutwa topazi sona nutwa galaneti.

¹⁸ Mumuzele uwabubili ubikemo utumabwe utwamutengo utwa emeladi nutwa safile sona nutwa dayimondi.

¹⁹ Mumuzele uwabutatu ubikemo utumabwe utwamutengo utwa yakinti nutwa agate sona nutwa ametisiti.

²⁰ Mumuzele uwafolo ubikemo utumabwe utwamutengo utwa belili, nutwa onikisi, sona nutwa yasipala. Utubike utumabwe tunutu muvyakubikamo ivya golide.

²¹ Utumabwe tunutu tubanjepo 12 ukuyana na matabwa agha bana aba Yakobo. Pibwe lyoka ubizepo itabwa lyoka ilya luko ulwa Izilayeli.

²² “Uchipangile icha pachifuba iminyololo iya golide umwenecho, yiyo yili ngati mpote.

²³ Upange impete zibili izya golide nukuzipinyilila kunkuto izya mumwanya izya akakuvwala akapachifuba.

²⁴ Upinyilile iminyololo mibili iya golide yila kumpete zibili zila kunkuto izya akakuvwala akapachifuba.

²⁵ Upinyilile ubumalilo bubili ubunji ubwa minyololo ku vyakubikilamo amabwe vibili ivya pavipunko vila, vivyo vili kuntazi kwa efodi.

²⁶ Upange impete zibili izya golide, nukuzipinyilila muntende kunkuto izya akakuvwala akapachifuba mulubazu ulwa mukasi papipi nu efodi.

²⁷ Upange impete izinji zibili izya golide, nukuzipinyilila muntende kuntazi ukwa twenda tubili utwa efodi pavipunko kupipi nu busone pamwanya pa lamba uwakulukiwa akiza nkani yula.

²⁸ Pinyilila impete izya akakuvwala akapachifuba kumpete izya efodi ni mpote izya buluu umwakuti akakuvwala akapachifuba kabanje pamwanya palamba ukuti katakazebaye.

²⁹ “Bo u Aloni akwinjila mu Chipinda Ichizelu, avwalaye akakuvwala akapachifuba, papo pasimbiwe amatabwa agha inko izya ba Izilayeli, umwakuti ane ne Mwene imbakumbukaye abantu bane akabalilo kosi.

³⁰ Ubikemo u Ulimu nu Tumimu mukakuvwala akapachifuba, umwakuti u Aloni avinyamule pachifuba chache bo akwiza pamaso papane. Po u Aloni akwiza pakuvinyamula ivintu vibili vinivi ukuti angamanya vivyo nkulonda ukuti abantu bane aba Izilayeli babombaye.

Ivyakuvwala ivinji ivya buputi

³¹ “Usone inkazo iya efodi iya mwenda uwa buluu umwenecho.

³² Inkazo yiniyi yibanje nu bwazi ubwakwinjizyamo umutu, ghugho ghulabiwe na kamwenda akakupeteka mulubazu mwache umwakuti ghutakazepukaye.

³³ Ukuzyungulila mubupeteke muntende munkazo yila, ulabemo ni vifwani ivya vikomwa ivya manyele agha buluu, na machesamile, sona na machesamu nu twa belu utwa golide pakasi,

³⁴ umwakuzyungulila mubupeteke bosi bula mubekemo amanyele agha buluu na machesamile na machesamu naka belu aka golide.

³⁵ U Aloni avwalaye inkazo yiniyi, bo akubomba imbombo iya buputi. Bo akwinjila mu Chipinda Ichizelu pamaso pa Mwene, sona bo akwepamo, ubelu alilaye, po atakwiza pakughoghiwa.

³⁶ “Upange imbale iya golide umwenecho, nukubizapo amazyu aghakuti, ‘Yapaghuliliwa kwa Mwene.’

³⁷ Uyipinye kuntazi ukwa mpumpu nu lupote ulwa buluu lubanje pantazi pache.

³⁸ U Aloni ayivwalaye imbale yila pacheni chache, ukuti anyamule ukunanga ukwa bantu, umwakuti u Mwene avipokele ivyakwiyipa vyosi vivyo aba Izilayeli bakubika.

³⁹ “Umulukile u Aloni amalaya amantonte, sona umupangile impumpu iya mwenda umutonte nu lamba yuyo alabiwe akiza nkani.

⁴⁰ Ubasonele abana aba Aloni inkazo, abalamba sona ni visote, ukuti vibapanje umuchizi, nukuboneka akiza.

⁴¹ Umuvwike amenda ghanagha uwamwinyu u Aloni na bana bache. Ubapaghule pakubapakazya amafuta gha syunguti umwakuti bambombelaye imbombo iya buputi.

⁴² “Ubasonele abakabuntu aba mwenda umutonte, sona abatali mupaka muntapatapa umwakuti batakabasikulaye abantu.

⁴³ U Aloni na bana bache bavwalaye amenda ghanagha akabalilo kosi, bo bakwinjila mu Chisakasa icha Mwene, pamo bo bakupalamila ku chighemo pakumbombela mu Chipinda Ichizelu, umwakuti batakanangaye nukufwa. “Ulu lo lulaghilo ulwa bwila na bwila ulwa Aloni na baluko lwache.