Ukufuma 27 - IBAYIBOLO 2024

Nizya chighemo ichakochelapo ivyakwiyipa

¹ “Zenga ichighemo icha matabwa agha mungwina. Ichighemo chinichi chibanje chakuyana bulo, mubutali chibanje amamita mabili nu hafu, mububaba chibanje amasentimita mabili nu hafu, sona mumwanya chibanje imita lyoka nu hafu.

² Upange impembe pamwanya pankuto zyache zyosi folo, umwakuti impembe zila zimamatiziwe kuchighemo pakuba chintu choka, sona uchipake nu mukuba.

³ Upange ivyela ivyakuyolela itoyi na mafosholo na mabeseni na mafoloko amakulu ni sonta sona ni chela ichakupembela umoto. Ivibombelo vyosi vinivi vibanje vya mukuba.

⁴ Upange sona ichela icha mukuba icha tudobozitudobozi. Munkuto zyosi izya chela chila upangemo impete izya mukuba izyakunyamulila.

⁵ Uchibike ichela chinicho kusi ku chighemo umwakuti chifike pakasi na pakasi.

⁶ Upange amakwi aghakunyamulila agha matabwa agha mungwina nukughapaka nu mukuba.

⁷ Injizya amakwi ghanagha mumpete kumbazu zyosi zibili izya chighemo, bo chikunyamuliwa.

⁸ Upange ichighemo icha matabwa pakuba bwazi bulo, mukasi upangemo ukuyana namumo nkakulanjizizya pighamba.

Ulupaso ulwa chisakasa ichizelu

⁹ “Uchipangile Ichisakasa ulupaso ulwa mwenda umutonte, mubutali chibanje amamita 46 kulubazu ulwakuntende.

¹⁰ Impanda zyache izya mukuba zibanje 20 nu bwikalilo ubwa mukuba 20 nu tulemelo, poka ni ntatikilo izya siliva.

¹¹ Umwakuyana bulo, kulubazu ulwa kumitu ulwa lupaso ubikeko umwenda uwakuzighila, mubutali ghubanje amamita 46, ni mpanda izya mukuba 20 nu bwikalilo ubwa mukuba 20 nu tulemelo utwa siliva, poka ni ntatikilo izya siliva.

¹² “Umwenda uwa kubwinjililo bwizuba, mubutali ghubanje amamita 25, ni mpanda 10, sona nu bwikalilo 10.

¹³ Umwenda uwa kubufumilo bwizuba, kuko kuli umulyango, mububaba ghubanje amamita 25.

¹⁴ Umwenda uwakuzighila kumulyango, mubutali ghubanje amamita 7 ni mpanda zitatu sona nu bwikalilo butatu.

¹⁵ Umwakuyana bulo, kulubazu ulwakuntende ulwa lupaso ubikeko umwenda uwakuzighila, mubutali ghubanje amamita 7 ni mpanda zitatu sona nu bwikalilo butatu.

¹⁶ “Pamulyango uwa lupaso ubikepo umwenda umutonte uwakuzighila uwa buluu nu muchesamile, sona nu muchesamu, mubutali ghubanje amamita 9 ni mpanda folo sona nu bwikalilo folo ghugho ghulabiwe akiza nkani.

¹⁷ Impanda zyosi izyakuzyungulila ulupaso zimamatiziwe ni ntatikilo izya siliva nu tulemelo utwa siliva, sona nu bwikalilo ubwa mukuba.

¹⁸ Mubutali ulupaso lubanje amamita 46, mububaba lubanje amamita 23, sona mumwanya lubanje amamita mabili nu hafu. Amenda aghakuzighila ghabanje matonte nu bwikalilo ubwa mukuba

¹⁹ Ivibombelo vyosi ivya mu Buzilo Ubuzelu nu tukwi tosi utwa chisakasa nutwa lupaso tubanje twa mukuba.

Akasungilile aka nyale

²⁰ “Ubalamule aba Izilayeli ukuti bizaye na mafuta amiza nkani agha musyunguti pakuba gha nyale umwakuti inyale zyakaye bwila.

²¹ U Aloni na bana bache abalumendo bo babo bakozyanje inyale mu Chisakasa icha Mwene, kuzi ukwa mwenda uwakuzighila, ghugho ghuli pantazi pa Bokosi ilya Lufingo. Pantazi papane inyale zyakaye palapala ukwandila pachamabwila mupaka pandabindabi. Aba Izilayeli poka na baluko lwabo balisungaye ilamulo mupaka inkulilo zyinyu zyosi izya muntazi.