Ukufuma 26 - IBAYIBOLO 2024

Ichisakasa ichizelu icha Mwene

¹ “Uzenge Ichisakasa ichizelu icha menda 10 amatonte agha buluu, na machesamile, na machesamu, sona aghakulukiwa ni chifwani icha bakelubi.

² Amenda ghosi aghakuzighila ghayane bulo, mubutali ghabanje amamita 12, sona mububaba ghabanje amamita mabili.

³ Ughasonannye poka amenda fayivi pakuba mwenda ghoka umukulu, sona bomba bunubu na menda aghanji fayivi ghala.

⁴ Muntende mulubazu ulwa mwenda uwakwanda umukulu upange ingulusu izya mwenda uwa buluu, sona bomba bunubu nu mwenda uwabumalilo umukulu ghula.

⁵ Upange ingulusu 50 ku mwenda uwakwanda, sona bomba bunubu nu mwenda uwabumalilo umwakuti zyenannye.

⁶ Po upange utulemelo 50 utwa golide utwakulemenkannya amenda mabili amakulu ghala, umwakuti ghubanje Chisakasa choka.

⁷ “Upange amenda 11 aghakupangiwa na meya agha mbuzi, ukuti ghabanje ghakuvwinka Ichisakasa pamwanya.

⁸ Amenda ghosi 11 ghayane bulo, mubutali ghabanje amamita 13, sona mububaba ghabanje amamita mabili.

⁹ Ughasonannye poka amenda fayivi ukuti ghubanje mwenda ghoka umukulu, sona bomba bunubu na menda aghanji sikisi ghala. Ughupetenkannye kabili umwenda uwasikisi pamulyango uwa Chisakasa.

¹⁰ Upange sona ingulusu 50 mulubazu ulwa mwenda ghoka umukulu uwabumalilo, nukubika sona ingulusu 50 mulubazu ulwa mwenda ughunji uwabumalilo.

¹¹ Upange utulemelo 50 utwa mukuba nukwinjizyamo ingulusu pakughalemenkannya poka amenda mabili amakulu ghala pakuba chisakasa choka.

¹² Umwenda uwakusyalako pakasi na pakasi welelaye bulo kwisinda ukwa chisakasa.

¹³ Amenda aghakusyalako ghagho ghali na masentimita 50 mubutali ghelelaye bulo nukuchivwinka ichisakasa kumbazu zyosi zibili.

¹⁴ Uchipangile Ichisakasa ivikupikizyo ivinji vibili, choka chibanje cha makwela agha dubi amadwibike mu inki inchesamu ichinji chibanje cha mwenda umutonte ukuti vibanje vyakuvwinka pamwanya.

¹⁵ “Uchipangile Ichisakasa amafulemu aghakwima agha matabwa agha mungwina.

¹⁶ Ifulemu lyosi mubutali libanje amamita folo, sona mububaba libanje amasemita 66.

¹⁷ Ifulemu lyosi libanje nu tulemelo tubili, umwakuti amafulemu ghalemenkane akiza. Amafulemu ghosi mabili ghabanje nu tulemelo.

¹⁸ Upange amafulemu 20 agha kulubazu ulwakuntende ukwa Chisakasa chila.

¹⁹ Upange ubwikalilo 40 ubwa siliva, ifulemu lyoka libanje pabwikalilo bubili, umwakuti ghaleme utulemelo tula.

²⁰ Upange amafulemu 20 agha kulubazu ulwa kumitu ukwa Chisakasa chila.

²¹ Sona ni vyakwimapo vyache 40 ivya siliva, vibili kuntende kufulemu yoka.

²² Upange amafulemu sikisi ukuti ghabanje kwisinda kubwinjililo bwizuba ubwa Chisakasa.

²³ Sona upange amafulemu mabili ukuti ghabanje pankuto yosi.

²⁴ Amafulemu mabili agha munkuto ghanagha ghamamatiziwe poka ukwandila pasi mupaka pamwanya. Amafulemu mabili ghanagha ghagho ghakapanga inkuto, ghosi mabili ghakwiza pakuba bunubu.

²⁵ Po pakwiza ukubapo amafulemu eyiti nu bwikalilo 16 ubwa siliva, ifulemu lyoka likaba nubwikalilo bubili.

²⁶ “Upange sona intatikilo 15 izya matabwa agha mungwina: Intatikilo fayivi zibanje kulubazu loka ulwa Chisakasa chila,

²⁷ intatikilo izyamwabo fayivi zibanje kulubazu ulwamwabo ulwa chisakasa, sona intatikilo izyamwabo fayivi zibanje kwisinda ukwa chisakasa.

²⁸ Ululatikilo ulwa pakasi ludumusannye pakasi pa mafulemu ukwandila kubumalilo mupaka kubumalilo.

²⁹ Ughapake amafulemu nu golide nukughinjizya mumpete izya golide ukuti zileme. Zyope intatikilo uzipake nu golide.

³⁰ Uchizenge ichisakasa ukuyana na kazengele kache kako nkakulanjizya pighamba.

³¹ “Usone umwenda umutonte uwakuzighila uwa buluu nu muchesamile, sona nu muchesamu, ghugho ghulabiwe akiza nkani ni chifwani icha bakelubi.

³² Ughupayike umwenda ghula pampanda folo izya matabwa agha mungwina, ghagho ghapakiwe nu golide, sona ghagho ghali nu tulemelo nu bwikalilo folo ubwa siliva.

³³ Ughupayike umwenda uwakuzighila ghula mutulemelo nukubika Ibokosi ilya Lufingo kwisinda kwa mwenda ghulaghula. Umwenda ghula ghukwiza pakulesannya Ichipinda Ichizelu, ni Chipinda Ichizelu nkani.

³⁴ Ukupikilepo ni chikupikizyo pamwanya pa Bokosi ilya Lufingo, lilyo lili mu Chipinda Ichizelu nkani.

³⁵ Ubike itebulo kuzi ukwa Chipinda Ichizelu nkani kulubazu ulwa kumitu ulwa chisakasa, sona ubike ichakubikapo inyale kulubazu ulwakuntende.

³⁶ “Pamulyango uwa Chisakasa ubikepo umwenda umutonte uwa buluu nu muchesamile, sona nu muchesamu uwakuzighila, ghugho ghulabiwe akiza nkani.

³⁷ Uchipangile ichisakasa umwenda uwakuzighila impanda fayivi izya matabwa agha mungwina, izyakupakiwa nu golide, zizyo zili nu tulemelo utwa golide. Uzipangile impanda zinizi ubwikalilo fayivi ubwa mukuba.