Ukufuma 25 - IBAYIBOLO 2024

Ivyakwiyipa ivya Chisakasa ichipaghuliwa

¹ U Mwene akamubuzya u Mozesi akati,

² “Ubabuzye aba Izilayeli ukuti banyizile ni vyakwiyipa. Pokela ichakwiyipa chosi chicho umuntu wesi akulonda pakubika.

³ Ivyakwiyipa vivyo ubaghiye pakupokela vyo ivi: Ugolide nu siliva nu mukuba

⁴ na amenda agha buluu na machesamile sona na machesamu, amenda amatonte sona na menda agha meya agha mbuzi

⁵ Amakwela agha dubi amadwibike mu inki inchesamu na amakwela amatonte sona na matabwa agha mungwina

⁶ na amafuta agha nyale na mafuta aghakupakazya aghakununkila sona nu twakufukizya utwakununkila

⁷ na amabwe agha onikisi sona na mabwe agha pa chakuvwala ichabuputi icha efodi sona ni chakuvwala ichapachifuba.

⁸ “Abantu banzengele Ubuzilo Ubuzelu, umwakuti ane nikalaye pakasi papabo.

⁹ Muzenge Ichisakasa chinichi ni vintu vyache vyosi ukuyana bulo namumo nkwiza pakukulanjizya.

Nizya Bokosi ilya Lufingo

¹⁰ “Upange ibokosi ilya matabwa agha mungwina. Mubutali libanje amasentimita 110, mububaba libanje amasentimita 66, sona mumwanya libanje amasentimita 66.

¹¹ Ulipake nu golide umwenecho, mukasi na kuzi. Akalilaba nu muzele uwa golide umwakuzyungulila.

¹² Upange impete folo izya golide, izyakunyamulila, nukuzipinyilila kuvinama vyache folo, impete zibili kulubazu loka, sona zibili kulubazu ulunji.

¹³ Upange sona amakwi mabili aghakunyamulila agha mungwina, nukughapaka nu golide.

¹⁴ Winjizye amakwi mabili ghala mumpete zizyo zili kumbazu zyosi zibili izya bokosi ukuti zibanje zyakunyamulila.

¹⁵ Amakwi mabili ghala ghabanje bwila mumpete izya bokosi zila, sona ghatakefiwemo.

¹⁶ Ubikemo mu bokosi amabwe amapapate mabili agha Malamulo ghagho nkwiza pakukupa.

¹⁷ “Upange ichikupikizyo icha golide umwenecho, mubutali chibanje amasentimita 110, sona mububaba chibanje amasentimita 66.

¹⁸ Upange abakelubi babili aba golide abakusyana kumbazu zyosi zibili izya chikupikizyo chila.

¹⁹ Upange ukelubi weka kulubazu loka, sona uyunji kulubazu ulwamwabo ulwa chikupikizyo chila. Ubamamatizye abakelubi bala kuchikupikizyo.

²⁰ Abakelubi bala bakuzulile mumwanya ivipapande vyabo nukuchikupikila ichikupikizyo chila. Abakelubi bala babaghiye benannye, bo bakuchennya ichikupikizyo.

²¹ Ubikemo mukasi mu bokosi amabwe amapapate mabili ghala nukulikupikila.

²² Nkwiza pakukomana nawe palapala, sona pamwanya pa chikupikizyo pala, pakasi na pakasi pa bakelubi babili, nkwiza pakukupa amalamulo ghagho aba Izilayeli babaghiye pakughakonka.

Itebulo ilyakwiyipilapo ichibama kwa Chala

²³ “Upange itebulo ilya matabwa agha mungwina. Mubutali libanje amasentimita 88, mububaba libanje amasentimita 44, sona mumwanya libanje amasentimita 66.

²⁴ Ulipake nu golide umwenecho nukulilabannya nu muzele uwa golide umwakuzyungulila.

²⁵ Upange sona ifulemu ipapate, mububaba likaba amasentimita eyiti, nukulilabannya nu muzele uwa golide umwakuzyungulila.

²⁶ Upange impete folo izya golide, nukuzipinyilila ku nkuto folo kuvinama ivya tebulo.

²⁷ Impete zibanje kupipi nu tumatabwa utupapate tula ukuti tuleme amakwi aghakunyamulila itebulo.

²⁸ Upange amakwi agha matabwa agha mungwina nukughapaka nu golide ukuti ghabanje ghakunyamulila itebulo.

²⁹ Upange imbale, ni mbako, ni sonta, sona na mabeseni aghakubikila ichakwiyipa ichakung'wela. Vyosi vinivi uvipange nu golide umwenecho

³⁰ Ubikayepo pitebulo pala ichibama ichakupeghiwa kukwane akabalilo kosi.

Ichakubikapo inyale

³¹ “Upange ichakubikapo inyale icha golide umwenecho. Mubwikalilo bwache na mubulemelo bwache vibanje vya golide uwakusyana bulo. Ubwezya bwache ubwakulabannya, na mani ghache, vibanje vyakulemenkana.

³² Isamba sikisi zidobosannye mulubazu ulwa chakubikapo inyale. Isamba zitatu zibanje kulubazu loka, sona zitatu kulubazu ulunji.

³³ Patusamba tosi pabanje imbako zitatu zizyo zikaba ngati bwezya ubwa mposya, amani nu bwezya bwache vikaba pakasamba koka. Imbako zitatu zibanje patusamba utunji, isamba sikisi zyosi zila zikadobosannya pachakubikapo inyale.

³⁴ Pa chakubikapo inyale pabanje imbako folo izyakuyana bulo nu bwezya ubwa mposya sona na mani nu bwezya bwache.

³⁵ Ubwezya boka bubanje muntende musamba zibili izyakwanda zizyo zyadobosannya ichakubikapo inyale. Ubwezya ubwabubili bubanje muntende musamba zibili izyabubili, ubwabutatu bubanje muntende musamba zibili izyabutatu.

³⁶ Ubwezya poka ni samba zila vibanje vyakulemenkana ni chakubikapo inyale, ichakusyaniwa nu golide umwenecho.

³⁷ “Upange inyale seveni nukuzyimika pa chakubikapo inyale, umwakuti zilamilaye kuntazi.

³⁸ Utulemelo twache ni vyakuyolela itoyi vibanje vya golide umwenecho.

³⁹ Ichakubikapo inyale ni vibombelo vyosi uvipange nu golide umwenecho uwakung'wama amakilogalamu 34.

⁴⁰ Wenelezye ukuti wavipanga ukuyana namumo nkukulanjizizya pighamba pano.