Ukufuma 24 - IBAYIBOLO 2024

Ulufingo lwasimikiziwa

¹ U Mwene akamubuzya u Mozesi akati, “Kwela pighamba pano, awe nu Aloni nu Nadabu nu Abihu, sona na balongozi 70 aba ba Izilayeli. Po munyiputaye bo muchili muli pabutalipo.

² Loli u Mozesi mwene weyuyo apalamile, abantu abanji bosi batakapalamile, sona batakakwele pighamba pano poka nu Mozesi.”

³ U Mozesi akababuzya abantu amazyu na malamulo ghosi ghagho u Mwene akamubuzya, po bosi bakamulila poka bakati, “Tukwiza pakuzibomba zyosi zizyo u Mwene anena.”

⁴ U Mozesi akasimba amazyu ghosi ghagho u Mwene akanena. Pandabindabi nkani akazenga ichighemo muntende mwighamba nukusimika impanda izya mabwe 12 pakwimilila inko 12 izya ba Izilayeli.

⁵ Po akabatuma abalumendo bamo pakubika ichakwiyipa ichakocha kwa Mwene, sona bakabika inkambaku ukuti chibanje chakwiyipa ichabupoka.

⁶ U Mozesi akasenda ibanda pakasi na pakasi nukulipungulila mumbale, po ilyakusyala akalinyafila pachighemo.

⁷ Pisinda pache akasenda ibuku ilya lufingo nukubabelengela abantu. Po abantu bala bakamula bakati, “Tukwiza pakwivwila nukuzibomba zyosi zizyo u Mwene alamula.”

⁸ Po Mozesi akasenda ibanda nukubanyafila abantu nukuti, “Ili lyo libanda ilya lufingo lulo u Mwene akafingana namwe ukuyana na malamulo ghosi ghanagha.”

⁹ U Mozesi nu Aloni nu Nadabu nu Abihu poka na balongozi 70 aba ba Izilayeli bakakwela pighamba

¹⁰ nukumwennya u Chala uwa ba Izilayeli. Pasi panyayo zyache pakaba ichintu chimo ichakuboneka ngati musebo uwa mabwe agha safile, sona ichabuluu ngati ko kumwanya.

¹¹ Loli u Chala atakababombela nachimochimo ichintu ichibibi abalongozi aba ba Izilayeli. Bakamwennya u Chala, po bakalya nukung'wela.

U Mozesi pighamba ilya Sinayi

¹² U Mwene akamubuzya u Mozesi akati, “Kwela wize pighamba pano nukwikala kunuku. Nkwiza pakukupa amabwe amapapate mabili papo nabasimbila abantu amalamulo.”

¹³ U Mozesi nu mwavwilizi wache u Yoshwa, bakabuka kwighamba, po u Mozesi akakwela pighamba ilya Chala.

¹⁴ U Mozesi akababuzya abalongozi bala akati, “Mutulindililaye pano mupaka tunyokeko. U Aloni nu Huli bali poka namwe, po nanti umuntu yumo ali ninongwa angabuka kukwabo.”

¹⁵ Bo u Mozesi akwela pighamba, ibingu likalikupikila,

¹⁶ po ubuchindamu ubwa Mwene bukiza pighamba ilya Sinayi. Ibingu likakupikila ighamba lila amasiku sikisi, pisiku ilyaseveni U Mwene akamwitizya u Mozesi mwibingu.

¹⁷ Aba Izilayeli bakabwennya ubuchindamu ubwa Mwene ngati moto uwakwaka pamwanya pighamba.

¹⁸ Po u Mozesi akinjila mwibingu mula nukukwela mupaka pamwanya pighamba nukwikala palapala amasiku 40 umusanya nu busiku.