Ukufuma 23 - IBAYIBOLO 2024

Ukulongela mubwanaloli

¹ “Utakanenaye ipangwi ilyabumyasi. Utakamwimilaye umuntu umubibi pakubikila ubwakaboni ubwabumyasi.

² “Utakachikonkaye ichilundilo pakubomba ichintu ichibibi. Nanti ukubikila ubwakaboni pa nongwa, utakabunyongannye ubwanaloli pakwitinkana na zizyo ichilundilo chikunena.

³ Nanti ukulonga inongwa iya muntu umupina, utakalongaye pakwennya icheni.

⁴ “Nanti ukuyennya ing'ombe pamo impunda iya mulwani wako yikusobela, uyisokolele kumwenecho.

⁵ Nanti impunda iya mulwani wako yawa pachifukwa icha bung'wamu ubwa katundu, utakayileke bulo nukudumusannya, loli umwavwe umwenecho pakuyinyamusya.

⁶ “Utakabunyongannye ubwanaloli pa nongwa iya muntu umupina

⁷ Utakamutamantilaye nayumo umuntu, sona utakamughoghaye umuntu yuyo ate ninongwa nu musubiliwa, pakuti ane nkwiza pakumususya umuntu umubibi.

⁸ “Mutakapokelaye amabeko, pakuti amabeko ghakubighalila amaso umwakuti ghakunyongannya ubwanaloli.

⁹ “Mutakamuyivyanje umuntu umuyeni, pakuti amwe mwebene muzimenye ukuti pakuba muntu umuyeni cho choni, pachifukwa ichakuti namwe bulo mukabapo mwe bayeni muchisu icha Ijiputi.

Nizya mwaka uwaseveni ni siku ilyaseveni

¹⁰ “Ukwa maka sikisi mubyalaye imbeyu mumaghunda ghinyu nukwinula imbeyu zilazila.

¹¹ Loli mumwaka uwaseveni amaghunda ghinyu ghaghonele, sona mutakinule chosi chicho chikumela mumo. Abantu abapina balyemo vivyo vyamela mumo, sona nukuti ivinyamana ivya muzi vilye vivyo vyasyalikila. Mubombaye bunubu na maghunda bulo agha mampesya, sona na makwi agha misyunguti.

¹² “Mubombaye imbombo zyinyu amasiku sikisi, loli pisiku ilyaseveni mutakabombaye imbombo, umwakuti ing'ombe zyinyu ni mpunda zyinyu zingatuzya, sona nukuti abazya na bayeni abamunyumba zyinyu bangatuzyako.

¹³ “Teghelezya zyosi zizyo Ane ne Mwene nanena. Utakabiputaye abachala abanji, sona utakaghatambulaye amatabwa ghabo napo panandi.

Amasiku matatu amakulu agha lusekelo

¹⁴ “Mubanje nu lusekelo katatu mumwaka, ukuti munchindikaye.

¹⁵ Ulusekelo ulwakwanda mumwaka lubanje Lusekelo ulwa Chibama chicho chite ni chilungo. Mumasiku seveni mumwezi uwa Abibu pakabalilo kako insalite, mulyanje Ichibama chicho chite ni chilungo ukuyana namumo nkubalamulila, pakuti mumwezi ghunughu mukepamo muchisu icha Ijiputi. “Atakabepo nayumo umuntu uwakwiza pamaso papane nyobe zyene.

¹⁶ “Mubanje nu Lusekelo ulwa Nyinulo ulwa vikomwa ivyiza ivyakwanda pakutona. Mubanje nu Lusekelo ulwa Visakasa pabumalilo ubwa mwaka, bo mukwinula imbeyu zyinyu.

¹⁷ “Abanavuli bosi bizaye pakunyiputa ane ne Mwene Uwamaka Ghosi, mumasiku matatu ghanagha pamwaka.

¹⁸ “Mutakabikaye ichibama icha chilungo bo mukubika ichinyamana pakuba chakwiyipa kukwane, sona amafuta agha chinyamana ghagho mukumpa ukuti chibanje chakwiyipa ghatakasungiwanje mupaka indabi yache.

¹⁹ “Mwizaye ku Nyumba iya Mwene u Chala winyu ni vikomwa ivyiza ivyakwanda pakutona ivya maghunda ghinyu. “Mutakapiyaghe inyama iya mwana uwa ng'ozi pamo umwana uwa mbuzi mu lukama ulwa nyina.

Uwantumi uwa Mwene akubalongolela abantu

²⁰ “Nkubatumila uwantumi wane pantazi papinyu pakubalongolela bo mukwenda muzila nukubinjizya mubuzilo bubo nabayanizizya.

²¹ Mumuteghelezye nukumwivwila yuyo. Mutakamusambukilaye, pakuti atakwiza pakubuhobokela ubusambuke bunubu, pachifukwa ichakuti akubombela zinizi mwitabwa lyane.

²² Loli nanti mukumwivwila nukubomba zyosi zizyo nkubalamula, ane nkwiza pakuba ne mulwani uwa balwani winyu, sona nkwiza pakulwana na bantu bosi babo bakubasusya.

²³ Uwantumi wane akwiza pakubalongolela nukubinjizya muchisu icha ba Amoli nicha ba Hiti nicha ba Pelezi nicha Kenani nicha ba Hivi sona nicha ba Yebusi sona nkwiza pakubanangannya bosi.

²⁴ Mutakabafughamililaye abachala babo pamo pakubiputa, sona mutakeghelelaye inkalo zyabo. Loli mubanangannye abachala babo nukumongolonnya impanda zyabo izya mabwe amazelu.

²⁵ Mumwiputaye u Mwene U Chala winyu, po nkwiza pakubasaya ni vyakulya na mizi aminji. Nkwiza pakubapozya ububine bosi.

²⁶ Nayumo umukolo pakasi papinyu yuyo ulwanda lukwiza pakwepa, sona umughumba atakwiza pakubamo. Nkwiza pakubapa ubumi ubutali.

²⁷ “Nkwiza pakubapelela ubogha abantu babo bakubasusya ukuti banganyila. Nkwiza pakubavulungannya abantu babo bakulwa namwe umwakuti bakwiza pakubachimbila.

²⁸ Nkwiza pakutuma amavwivwi pakubachimbizyamo aba Hivi naba Kenan, naba Hiti muzila yinyu.

²⁹ Loli ntakwiza pakubachimbizyamo mumwaka ghoka, pachifukwa ichakuti ichisu chingaba chisami nukwizula ni vinyamana ivya muzi.

³⁰ Loli nkwiza pakubachimbizya panandipanandi mupaka mubale nkani umwakuti mungafyula ichisu chilachila pakuba chinyu.

³¹ “Nkwiza pakugaba impaka ukufuma ku Nyanja Inchesamu mupaka ku Nyanja iya Medeteleniya, sona ukufuma kunkolongo mupaka kulusoko ulwa Yufuleti. Nkwiza pakubapa amaka aghakupotela abantu aba muchisu chinichi, po mukwiza pakubachimbizyamo.

³² Mutakafingaye ulufingo nalumolumo na bantu banaba pamo na bachala babo.

³³ Mutakabitikizye abantu banaba pakwikala muchisu chinyu, lumo bakwiza pakubapela ukuti munangile, pakuti pakubiputa abachala babo, naloli chikwiza pakuba chipingo chinyu.”