Ukufuma 22 - IBAYIBOLO 2024

Nizya ndaghilo pakulipizannya

¹ “Nanti umuntu iba ing'ombe pamo ing'ozi nukuyighogha pamo ukuyighulizyayo, abaghiye atanizyepo ing'ombe fayivi pa ng'ombe yoka, pamo atanizyepo ing'ozi folo pa ng'ozi yoka.

² “Nanti umuntu amulema umwiba ali pakupankula inyumba, po amukoma nukumughogha, umuntu yuyo amughogha ate ninongwa pachifukwa icha bufwe ubwa mwiba yula.

³ Loli nanti amughogha umwiba yula pamusanya, kokuti umuntu yuyo akamughogha ali ninongwa pachifukwa icha bufwe ubwa mwiba yula. “Umwiba wesi abaghiye alipile inongwa yache. Loli nanti akupotwa pakulipila inongwa yache, abaghiye aghuliziwe pakuba muzya ukuti alipile inongwa yache.

⁴ “Nanti ing'ombe yiyo umuntu yula akiba yaghiwa nyumi munyobe zyache manyi mpunda manyi ng'ozi umwiba yula abaghiye atanizyepo ing'ombe zibili pa ng'ombe yoka pamo ing'ozi zibili pa ng'ozi yoka.

⁵ “Nanti umuntu akudima ivitekwa vyache nukuvileka pakulya ivibyalwa mumughunda uwa muntu uyunji, umuntu yula abaghiye atanizyepo ivibyalwa ivyiza ivya mumughunda wache, pamo amampesya amiza nkani.

⁶ “Nanti umuntu akozya ulupya mumughunda wache, po ulupya lula lwalobokela mumughunda uwa muntu uyunji nukocha ingano yiyo yili muvibunga pamo yiyo bachili batabolite, umuntu yuyo akozizye ulupya abaghiye alipile vivyo umoto wanangannya.

⁷ “Nanti umuntu akumusungisya umupalamani wache indalama pamo ukatundu, loli ukatundu yula ibite munyumba yache iya mupalamani, umwiba yula atanizyepo kabili, nanti bamulema.

⁸ Loli nanti batamulemite umwiba, umwenecho uwa nyumba yula ize pamaso pa balongi ukuti bazyaghannye nanti akiba ukatundu uwa mupalamani wache.

⁹ “Nanti pali ukudalinkana pabantu babili nizya mwenecho uwa ng'ombe pamo impunda pamo ing'ozi pamo amenda pamo ichintu chosi chicho chasobela, abantu babili bala bize pamaso pa Chala. Umuntu yuyo u Chala amwagha ukuti anangite, abaghiye amulipile umupalamani wache kabili.

¹⁰ “Nanti umuntu akumufisya umupalamani wache impunda, pamo ing'ombe pamo ing'ozi pamo ichitekwa chosi loli nanti chafwa, pamo chavulala pamo chibiwa, bo pate ukaboni,

¹¹ umupalamani yula abaghiye alape pamaso pa Mwene ukuti atibitepo icha muntu yula. Umwenecho abaghiye atonte bulo ukusita ukupokelapo ichilipo.

¹² Loli nanti ichitekwa chikibiwa, kokuti umupalamani, abaghiye amulipile umwenecho yula.

¹³ Nanti chikalika ni chinyamana icha muzi, umupalamani yula abaghiye ize ni vyakusyalako pakuba bwakaboni, sona atakatanizyepo chicho chikalika.

¹⁴ “Nanti umuntu akwazima ichitekwa ku mupalamani wache, po chavulala pamo chafwa, bo chite munyobe izya mwenecho, umuntu yula abaghiye atanizyepo.

¹⁵ “Loli nanti chikubombiwa bo umwenecho alipo, umuntu yula atabaghiye pakutanizyapo. Nanti uwakwazima yula akalipila indalama, indalama zilazila zikukwana pakutanizya ichitekwa ichifwe chila.

Nizya ndaghilo pa nkalo ni chiputo

¹⁶ “Nanti umwanavuli akumudeba umulindu yuyo ataghonitepo nu mwanavuli, sona yuyo atazingiliwe nukughonana nawe, abaghiye imale nukumusenda pakuba muchi wache.

¹⁷ Loli nanti uwise akukana ukuti umwanavuli yula atakamusende umwana wache, umwanavuli yula abaghiye imale umulindu yula.

¹⁸ “Umukolo wesi yuyo akubomba amayele, aghoghiwanje.

¹⁹ “Umuntu wesi yuyo akulowa ni chinyamana, aghoghiwanje.

²⁰ “Umuntu wesi yuyo atakubika ivyakwiyipa kwa Mwene, loli akubika ku bachala abanji, aghoghiwanje.

²¹ “Mutakamuyivyanje pamo ukumukanyilila umuyeni, pakuti namwe bulo mukabapo mwe bayeni muchisu icha Ijiputi.

²² “Utakasendelayepo ulusako pa bakolo abafwilwe pamo abana abalanda.

²³ Nanti mukubomba bunubu, ane ne Mwene nkwiza pakubamula nanti bakundilila ukuti imbavwe.

²⁴ Po nkwiza pakubakalalila nukubaghogha nu bwite. Abachi binyu bakwiza pakuba bafwilwe, sona abana binyu bakwiza pakuba balanda.

²⁵ “Nanti mukumukopezya indalama umuntu umupotwe pakasi papinyu, mutakabombaye ngati mumo abakopezya ndalama bakubombela pakumufyenga ukuti alipile izyakukabilapo.

²⁶ Nanti wasenda umwenda uwa mupalamani wako pakuba chikole, umunyosezye bo izuba litinjiye

²⁷ pachifukwa ichakuti umwenda ghunugho gho mwenda wene uwakuvwinka. Nkimba akwiza pakuvwinka ichoni? Nanti akundilila, nkwiza pakumwivwa, pakuti ne wachisa.

²⁸ “Mutakamusamulaye u Chala, sona mutakamughunaye umulongozi uwa bantu bako.

²⁹ “Mumpanje ivyakwiyipa ivya malezi ghinyu nu vinyo, sona na mafuta ghinyu agha misyunguti pakabalilo kache. “Mumpanje abakatote binyu abalumendo.

³⁰ Mubombaye bunubu na bana abakwanda pakupapiwa aba ng'ombe ni ng'ozi zyinyu. Umwana umwanavuli uwa ng'ombe pamo uwa ng'ozi uwakwanda pakupapiwa ikale nu nyina amasiku seveni, loli mumpanje pisiku ilya eyiti.

³¹ “Amwe mwe bantu bane abazelu. Polelo mutakalyanje inyama iya chinyamana chicho chalika bulo ni chinyamana icha muzi, loli muyisumbilaye imbwa.