Ukufuma 20 - IBAYIBOLO 2024

Nizya Malamulo Teni

¹ U Chala akanena amazyu ghosi ghanagha akati,

² “Ane ne Mwene u Chala winyu, ne nkabefyamo mu Ijiputi, mumo mukaba mwe bazya.

³ “Utakabiputaye abachala abanji, loli ane nemwene.

⁴ “Utakipangilaye wemwene ivifwani ivya kantu kamo aka kumwanya, pamo aka pachisu pamo aka mumizi.

⁵ “Utakavifughamililaye pamo pakuvyiputa, pakuti ane ne Mwene u Chala winyu, ne muzuba. Nkubafunda abana aba nkulilo iyabutatu mupaka ni yafolo pachifukwa icha mbibi izya bawise.

⁶ “Loli imbaghanite abantu amasabuzani agha nkulilo izya bantu babo banganite nukughakonka amalamulo ghane.

⁷ “Utakalitambulaye pabulo itabwa ilya Mwene u Chala wako, pakuti ane ne Mwene nkwiza pakumufunda umuntu wesi yuyo akulitambula pabulo itabwa lyane.

⁸ Ulikumbukaye Isiku Ilyakutuzya pakuba lizelu.

⁹ Ubombaye imbombo zyako zyosi mumasiku sikisi,

¹⁰ loli isiku ilyaseveni Lisiku Ilyakutuzya ilya Mwene u Chala winyu. Pisiku linilyo utakabombaye nayimoyimo imbombo manyi wewe manyi bana bako abalumendo manyi bana bako abalindu manyi bambombo bako abanavuli manyi bambombo bako abakolo manyi vitekwa vyako manyi bayeni babo bakwikala mukaya kako.

¹¹ “Pakuti mumasiku sikisi u Mwene akapela kumwanya ni chisu ichapasi, poka ni nyanja, sona na vyosi vivyo vili mulamula, loli nkatuzya pisiku ilyaseveni. Ichi cho chifukwa ane ne Mwene nkalisaya Isiku Ilyakutuzya pakuba lizelu.

¹² “Umuchindikaye ughuso nu nyoko, umwakuti ubanje nubumi ubutali muchisu chicho u Mwene u Chala wako akukupa.

¹³ “Utakaghoghaye.

¹⁴ “Utakalowaye.

¹⁵ “Utakibaye.

¹⁶ “Utakabanje we kaboni umumyasi kumupalamani wako.

¹⁷ “Utakayinyonywanje inyumba iya mupalamani wako. Utakamunyonywanje umuchi uwa mupalamani wako pamo uwambombo wache umwanavuli pamo umukolo pamo ing'ombe zyache pamo impunda zyache pamo ichintu chosi chicho ali nacho.”

Ubogha ubwa bantu

¹⁸ Bo abantu bennya ukupaya na kamesya nukwivwa ipati, sona nukwennya ilyosi likusuka pighamba pala, bakaba nubogha nkani, po bakimilila pabutalipo.

¹⁹ Bakamubuzya u Mozesi ukuti, “Twalamba, awe wemwene unenaye naswe, tukwiza pakukuteghelezya. Loli u Chala atakanenaye naswe, lumo tungafwa.”

²⁰ U Mozesi akabamula abantu bala akati, “Mutakanyilaye, u Chala iza pakubayela bulo, umwakuti mumunyilaye, sona nukuti muleke pakunanga.”

²¹ Abantu bakimilila pabutalipo, bo u Mozesi akupalamila kwibingu ifitu mumo u Chala akaba.

Akabombezekezye aka vighemo

²² Po u Mwene akamubuzya u Mozesi akati, “Ubabuzye aba Izilayeli uti, ‘Mwiyenezye mwebene ukuti ane ne Mwene nanena namwe bo indikumwanya.

²³ Mutakipangilaye mwebene abachala abanji aba siliva pamo aba golide ukuti mubachindikaye ukuyana namumo mukunchindikila ane.

²⁴ “ ‘Munzengele ichighemo ichitope, po mubikepo ivyakwiyipa ivya ing'ozi, ni ng'ombe ukuti vibanje vyakwiyipa ivyakocha, ni vyakwiyipa ivyabupoka. Pabuzilo bosi bubo nkubupaghula ukuti munyiputilayepo, nkwiza pakwiza kukwinyu pakubasaya.

²⁵ Nanti mukunzengela ichighemo icha mabwe, mutakabizaye amabwe ghalaghala, pakuti nanti mukubombezya ichela ichakubizila kokuti mukwiza pakuchinyazya ichighemo chila.

²⁶ Mutakazengelaye ichighemo icha makwelelo aghakukwelela pachighemo, lumo mungabasikula abantu, bo mukukwelapo.’