Ukufuma 2 - IBAYIBOLO 2024

Ukupapiwa ukwa Mozesi

¹ Pakabalilo kalakala umuntu yumo uwaluko ulwa Levi akamusenda umukolo uwaluko lwache.

² Umukolo yula akamela ulwanda, nukupapa umwana umulumendo. Bo amwennya ukuti ubonda yula akaba wakuboneka akiza nkani, akamufisa amezi matatu.

³ Loli bo apotwa pakumufisa, umukolo yula akasenda ichidudunga icha ntete nukuchimata nimpula. Po akamulambalikamo umwana nukuchibika ichidudunga chila muntete intali mulubazu ulwa Nayilo.

⁴ Umuyemba uwa mwana yula akimilila pabutalipo ukuti ennye chicho chingamuwila umwana yulayula.

⁵ Pakabalilo kamo umwana umulindu uwa Falabo akabuka pakogha kulusoko kula, bo abambombo bache bakwenda mulubazu ulwa lusoko. Umwana uwa Falabo yula akachennya ichidudunga muntete intali, po akamutuma uwambombo wache pakuchisenda.

⁶ Akachighula nukwennyamo umwana. Umwana yula akalilagha, umwakuti akamupelela ichitima. Akati, “Uyu abaghiye pakuba mwana uwa ba Hebeli.”

⁷ Po umuyemba wache akamulalusya akati, “Buli imbuke pakumwitizya umukolo umu Hebeli ukuti akonkezezyanje nukumulela umwana uyu?”

⁸ Akamula akati, “Eee, bukagha.” Po umuyemba uwa mwana yula akabuka pakumwitizya unyina uwa mwana.

⁹ Umwana umulindu uwa Falabo akamubuzya umukolo yula akati, “Unyonkezezyanje umwana uyu, po nkwiza pakukulipila.” Umukolo yula akamusenda umwana nukumulela.

¹⁰ Bo umwana yula akula akabuka nawe ku mwana umulindu uwa Falabo. Po akamusenda pakuba mwana wache nu wache. Akati, “Umwana uyu nkamuzubula mumizi, po nkumwita ukuti we Mozesi.”

U Mozesi akuchimbilila kuchisu icha Midiyani

¹¹ Isiku limo bo u Mozesi akula, akabuka pakubendela abantu abaluko lwache, aba Hebeli nukubennya namumo bakayimbilagha ni mbombo inkafu. Akamwennya umu Ijiputi yumo akumukoma umu Hebeli, umuntu uwaluko lwache.

¹² U Mozesi akatalankannya, loli bo ennya ukuti nayumo umuntu yuyo akumwennya, akamughogha umu Ijiputi yula nukughufukila umuvimba wache mumusesenga.

¹³ Ilya ndabi akabendela sona nukubennya aba Hebeli babili bakulwa. U Mozesi akamulalusya yuyo akananga akati, “Nkimba choni chicho ukumukoma umu Hebeli uwamwinyu?”

¹⁴ Umuntu yula akamula akati, “Nkimba wewenu akakubika pakuba mulaghili nu mulongi pakasi papitu? Nkimba ukulonda pakungogha ngati mumo ukamughoghela umu Ijiputi yula?” Po ubogha bukamulema nkani u Mozesi nukwinong'ona ukuti, “Abantu bazimenye zizyo nabomba.”

¹⁵ Bo u Falabo ivwa zinizi, akalondagha pakumughogha u Mozesi. Loli u Mozesi akachimbilila kuchisu icha Midiyani, kuko akikala papipi ni chiziba.

¹⁶ Abana abalindu seveni aba muputi usongo wamu Midiyani bakiza pakusemba amizi nukwizuzya ivyakung'welamo ing'ozi ni mbuzi izya wise.

¹⁷ Abadimi bamo bakiza nukubachimbizyapo abalindu bala, loli u Mozesi akabapoka abalindu bala nukughung'wesya umudimo ghula.

¹⁸ Bo abalindu bala banyokela kwa wise, u Yetulo akabalalusya akati, “Nkimba choni chicho ilelo mwabwelako lubilolubilo?”

¹⁹ Bakamwamula bakati, “Umu Ijiputi yumo atulwila pakutusembela amizi nukughung'wesya umudimo witu.”

²⁰ Po uwise akabalalusya abana bache abalindu akati, “Nkimba umuntu yunuyu ali ko kwiyi? Nkimba choni chicho mutakizagha nawe? Bukagha mumwitizye ukuti alye poka naswe.”

²¹ U Mozesi akitika pakwikala nawe kulakula, po u Yetulo akamupa umwana wache umulindu u Zipola pakuba muchi.

²² U Zipola akapapa umwana umulumendo, po u Mozesi akati, “Ane ne muyeni bulo muchisu ichi, po nkumwita umwana uyu ukuti we Gelishomu.”

²³ Bo ghachilapo amaka aminji nkani, u mwene uwamu Ijiputi yula akafwa, loli aba Izilayeli bakakoloma nkani pachifukwa icha buzya bwabo. Bakalililagha ubwavwilizi, po u Chala akivwa ukukoloma kwabo.

²⁴ U Chala akivwa ukukoloma kwabo nukukumbuka ulufingo lwache, lulo akafingana nu Abulahamu nu Yisaki sona nu Yakobo.

²⁵ U Chala akabwennya ubuzya ubwa ba Izilayeli, po akapalamasiwa nkani mumoyo.