Ukufuma 17 - IBAYIBOLO 2024

Amizi aghakufuma mwilyalabwe

¹ Ichilundilo chosi icha ba Izilayeli chikepamo munkolongo iya Sini, bakasamaghasamagha bulo ukuyana namumo u Mwene akalamulilagha. Bakazenga ivisakasa vyabo pa Lefidimu, loli kulakula kutakabako amizi aghakung'wela

² Po abantu bala bakadalinkana nu Mozesi ukuti, “Tupe amizi aghakung'wela.” U Mozesi akabamula akati, “Nkimba choni chicho mukwilumbusya kukwane? Nkimba choni chicho mukumuyela u Mwene?”

³ Loli abantu bala bakaba ni nyota nkani, po bakilumbusyanga kwa Mozesi bakati, “Nkimba choni chicho ukatwefyamo muchisu icha Ijiputi? Fwandi ukulonda pakutughogha ni nyota aswe na bana bitu, sona ni vitekwa vyitu?”

⁴ Po u Mozesi akamulilila u Mwene akati, “Nkimba imbombe ichoni na bantu banaba? Abantu banaba biyanizye pakunsumba na mabwe.”

⁵ U Mwene akamwamula u Mozesi akati, “Sendako abalongozi bamo aba Izilayeli nukulongolela kuntazi ukwa bantu banaba. Po senda indisa yiyo ukakomela nayo amizi agha mulusoko ulwa Nayilo, nukubuka.

⁶ Nkwiza pakwima pantazi papako pibwe pighamba ilya Sinayi. Ukome ibwe lila, po amizi ghakwiza pakufuma ukuti abantu bang'wele.” Po u Mozesi akazibomba zinizi pantazi pa balongozi aba ba Izilayeli.

⁷ Ubuzilo bula akabwita ukuti Masa nu Meliba, pachifukwa ichakuti aba Izilayeli bakilumbusya kwa Mozesi nukumuyela u Mwene, bo bamulalusya ukuti, “Nkimba u Mwene ali naswe pamo awe?”

Aba Izilayeli bakulwa ubwite naba Amaleki

⁸ Aba Amaleki bakiza pakulwa ubwite naba Izilayeli pa Lefidimu.

⁹ U Mozesi akamubuzya u Yoshwa akati, “Usale abanavuli bamo ukuti indabi balwe ubwite naba Amaleki. Ane nkwiza pakwimilila pighamba, bo indemite indisa munyobe zyane, yiyo u Chala akampa.”

¹⁰ Po u Yoshwa akabomba vivyo u Mozesi akamulamula. Akalwa ubwite naba Amaleki bala, bo u Mozesi nu Aloni, sona Huli bimiliye pamwanya pighamba.

¹¹ Nanti u Mozesi akwezezya mumwanya inyobe zyache, aba Izilayeli bakapotagha. Loli nanti isya pasi inyobe zyache, aba Amaleki bakapotagha.

¹² Bo inyobe izya Mozesi zyalita, u Aloni nu Huli bakasenda ibwe nukumwikazyapo u Mozesi, bo abene bimiliye mulubazu, balemeleye inyobe zyache mumwanya, umwakuti bakazilemelela bunubu mupaka izuba likinjila.

¹³ Po bunubu u Yoshwa akabapotela zila aba Amaleki bala.

¹⁴ Po u Mwene akamubuzya u Mozesi akati, “Simba nizya bupoti bunubu mwibuku pakuba chintu chimo ichakukumbukilamo. Umubuzye sona u Yoshwa ukuti nkwiza pakubazimizya aba Amaleki.”

¹⁵ U Mozesi akazenga ichighemo nukuchita ukuti u Mwene we Ndembela yane.

¹⁶ Akati, “Kwezya mumwanya indembela iya Mwene. U Mwene akwiza pakulwa ubwite naba Amaleki bwila na bwila.”