Ukufuma 16 - IBAYIBOLO 2024

Umana ni nkwale

¹ Aba Izilayeli bosi bakanda ubulendo bwabo pa Elimu nukufika munkolongo iya Sini, pakasi pa Elimu nu Sinayi pisiku ilya 15 ilya mwezi uwabubili, bo bepamo muchisu icha Ijiputi.

² Munkolongo mula, ichilundilo chosi chikilumbusya kwa Mozesi nu Aloni

³ nukuti, “Chikaba chizapo ngali u Mwene akatughoghelagha muchisu icha Ijiputi. Kulakula inyama yikalindagha musonta, sona tukalyanga ivyakulya vyosi vivyo tukalondagha. Loli amwe mwiza naswe munkolongo muno ukuti mutughoghe twebosi nizala.”

⁴ Po u Mwene akamubuzya u Mozesi akati, “Nkwiza pakubawisizya ichakulya ichakufuma kumwanya. Abantu babaghiye pakufuma kuzi isiku ni siku nukuseba ivyakulya ivyakubayana isiku lilalila lyene, umwakuti imbayele nanti bakwiza pakukonka amalamulo ghane.

⁵ Pisiku ilyasikisi nanti bakubuka pakuseba, basebe nukupiya ivyakulya ivyakubayana amasiku mabili.”

⁶ Po u Mozesi nu Aloni bakababuzya aba Izilayeli bosi bakati, “Pachamabwila mukwiza pakumanya ukuti akaba we Mwene yuyo akabefyamo mu Ijiputi.

⁷ Pandabindabi mukwiza pakwennya ubuchindamu ubwa Mwene, pachifukwa ichakuti ivwa amilumbusyo ghinyu. Nkimba aswe twe bawenu ukuti mwilumbusye kukwitu?”

⁸ U Mozesi akati, “We Mwene yuyo akwiza pakubapa inyama iyakuti mulye pachamabwila, sona nukubapa ivibama pandabindabi ichakuti mulye nukwikuta, pachifukwa ichakuti ivwa amilumbusyo ghinyu ghosi. Nkimba aswe twe bawenu? Mutakwilumbusya kukwitu, awe, loli kwa Mwene.”

⁹ Po u Mozesi akamubuzya u Aloni ukuti ababuzye aba Izilayeli bosi bala ukuti, “Zagha pamaso pa Mwene pachifukwa ichakuti ivwa amilumbusyo ghinyu.”

¹⁰ Bo u Aloni achili akunena naba Izilayeli, ichilundilo chosi chikaghalabukila kunkolongo nukubwennya ubuchindamu ubwa Mwene mwibingu.

¹¹ U Mwene akamubuzya u Mozesi akati,

¹² “Nivwa amilumbusyo agha ba Izilayeli. Ubabuzye ukuti, ‘Pachamabwila mukwiza pakulya inyama, sona pandabindabi mukwiza pakulya ivibama. Po mukwiza pakummanya ane ukuti ne Mwene u Chala winyu.’ ”

¹³ Ichamabwila chilachila abazungwa bakawa nukubulukabuluka pasi posi na posi pavisakasa pala, sona pandabindabi inganda yikawa posi na posi pavisakasa pala.

¹⁴ Bo inganda yapwa pasi posi na posi munkolongo mula, pakaboneka utuntu tumo utupapate utuswepu ngati we kabefu.

¹⁵ Bo aba Izilayeli batwennya utuntu tula batakavimanya ukuti vikaba vyo vyoni, po bakalalusannya bakati, “Nkimba vyo vyoni vinivi?” Pakuti batakavimanya. U Mozesi akababuzya akati, “Vinivi vyo vibama vivyo u Mwene abapiye amwe ukuti mulyanje.

¹⁶ U Mwene alamula ukuti, ‘Umuntu wesi uwa amwe asebe uwakumuyana. Umuntu wesi izuzye amalita mabili agha mana muchisakasa chache.’ ”

¹⁷ Aba Izilayeli bakabomba vivyo u Mozesi akabalingannya, bamo bakaseba umana umwinji nkani sona abanji bakaseba munandi bulo.

¹⁸ Bo bapima ni chipimilo icha malita mabili, abantu babo bakaseba umwinji nkani batakaseba umwakuchilapo, sona abantu babo bakaseba munandi, batakaseba panandi nkani. Umuntu wesi akaseba bulo uwakumuyana.

¹⁹ U Mozesi akababuzya akati, “Umuntu wesi atakasungepo ivyakulya vimo mupaka indabi.”

²⁰ Loli abanji bakaghasula amazyu agha Mozesi, po bakasungako vimo mupaka indabi. Loli pandabindabi bakagha ukuti vikanda pakununka, sona vikaba ni somi. Po u Mozesi akabakalalila nkani.

²¹ Indabindabi yosi umuntu wesi akasebagha ivyakulya ivyakumuyana, sona bo izuba lyocha vikasungulukagha.

²² Pisiku ilyasikisi bakaseba ivibama ivyakubayana amasiku mabili, umuntu weka amalita folo. Abalongozi aba ba Izilayeli bala bakiza pakumubuzya u Mozesi nizya vinivi,

²³ nukuti, “U Mwene alamula ukuti: Indabi Lisiku Ilyakutuzya izelu ilya Mwene. Po piya ivyakulya vyosi vivyo mukulonda pakupiya, sona ocha vyosi vivyo mukulonda pakocha. Ubwika bosi mubusunge palubazu mupaka pandabindabi.”

²⁴ Abantu bala bakabusunga ubwika bula mupaka pandabindabi ukuyana namumo u Mozesi akabalamulila, po butakanunka pamo ukuwa isomi.

²⁵ U Mozesi akati, “Ichi cho chakulya chinyu icha ilelo, pakuti ilelo lyo Lisiku Ilyakutuzya ilya Mwene. Mutakwiza pakuvyaghako kuzi.

²⁶ Musebe ivyakulya vinivi amasiku sikisi, loli pisiku ilyaseveni, lyo Lisiku Ilyakutuzya, vitakwiza pakwaghiwako.”

²⁷ Pisiku ilyaseveni, abantu bamo bakabuka pakuseba ivyakulya, loli batakavyaghako.

²⁸ Po u Mwene akamulalusya u Mozesi akati, “Nkimba mukwiza pakukana kalinga pakughivwila amalamulo ni ndaghilo zyane?

²⁹ Mukumbuke ukuti ane ne Mwene imbapiye Isiku Ilyakutuzya. Ichi cho chifukwa pisiku ilyasikisi nkubapa ivyakulya ivyakubayana amasiku mabili. Umuntu wesi ikalaye panyumba pisiku Ilyakutuzya, atakabepo nayumoyumo ukufuma kuzi.”

³⁰ Po abantu bakatuzya pisiku ilyaseveni.

³¹ Aba Izilayeli bakachita ichakulya chila ukuti we mana. Umana yula akabonekagha ngati tumbeyu utuswepu utwa busambya, tukanonagha ngati tuvitumbuwa utwakuyaniziwa nu buchi.

³² U Mozesi akati, “U Mwene atulamuye ukuti, ‘Mubasungileko abaluko lwinyu umana yumo, umwakuti bope bangachennya ichakulya chicho nkabapa amwe munkolongo, bo nabefya mu Ijiputi.’ ”

³³ U Mozesi akamubuzya u Aloni akati, “Senda isonta nukubikamo umana uwa kukwana amalita mabili. Uyibike pamaso pa Mwene ukuti yisungiwe nukubalanjizya abaluko lwinyu babo bakwiza muntazi.”

³⁴ Ukuyana namumo u Mwene akamulamulila u Mozesi, u Aloni akabika umana pamaso pa Bokosi ilya Lufingo ukuti asungiwe.

³⁵ Aba Izilayeli bakalyanga umana amaka 40 mupaka bakafika muchisu icha Kenani, mumo bakikalana.

³⁶ Amalita mabili chikaba chipimilo chicho abantu bakabombezya mumasiku ghanagho.