Ukufuma 15 - IBAYIBOLO 2024

Ulwimbo ulwa Mozesi

¹ Po u Mozesi naba Izilayeli bakamwimbila u Mwene ulwimbo ulwakuti, “Nkwiza pakumwimbila u Mwene, pakuti alanjizya ubupoti bwache ubukulu nkani akazisumbila ifalasi poka na bendezya ingolo munyanja.

² U Mwene we maka ghane, nu lwimbo lwane, sona aba bupoki bwane. We Chala wane, po nkwiza pakumupala, u Chala uwa tata wane, sona nkwiza pakumukwezya.

³ U Mwene wabwite uwamaka, itabwa lyache we Mwene.

⁴ “Akazisumbila ingolo izya bwite na basilikali aba Falabo munyanja, akabibizya abasilikali bache abamaka mu Nyanja Inchesamu.

⁵ Inyanja inyibizu yabakupikila badwiba pasi ngati libwe.

⁶ Wee Mwene, inyobe yako indilo, yamaka nkani, yabatizannya abalwani.

⁷ Mubukulu bwako ubwamaka, ukabasumbila pasi abalwani bako. Nu bukali bwako ubwakwaka ngati moto, ukabocha ngati lisote.

⁸ Nu muyi uwa mumpuno zyako, amizi ghakabungana poka. Amizi aghakwenda ghakimilila ngati lubumba, sona ghakakala nkani pasi panyanja.

⁹ Umulwani yula akati, ‘Nkwiza pakubachimbizya nukubalema. Nkwiza pakubugabannya ubukabi bwabo, nukusenda vyosi vivyo nkuvilonda. Nkwiza pakuwesa upanga wane, nukubanangannya ni nyobe yane.’

¹⁰ Ukaputila umuyi wako, po inyanja yikabibizya, bakadwiba ngati chela mu mizi aghamaka.

¹¹ “Wee Mwene, nkimba alipo u chala uyunji, yuyo ayanite nawe? Nkimba wewenu ayanite nawe, we muchindikiwa sona we muzelu? Nkimba wewenu angayana nawe, pakupela ivyika ni viswigho?

¹² Ukayigholosya bulo inyobe yako indilo, po ichisu chikabamila abalwani bitu.

¹³ “Mulughano lwako lulo lutakupotwangapo nalumolumo, ukabalongolela abantu bako babo ukabatabula. Na maka ghako amakulu, ukabalongozezya kubuzilo bwako ubuzelu.

¹⁴ Abantu aba inko izinji bivwa zinizi sona bakutetema nubogha. Ubogha ubukulu nkani bwabalema aba Filisiti.

¹⁵ Abamwene aba mu Edomu ubogha bwabalema, abalongozi aba mu Mowabu bakutetema nubogha. Abantu bosi aba mu Kenani basunguluka nubogha.

¹⁶ Ulutente nubogha ubukulu nkani vyabawila. Pachifukwa icha maka ghako amakulu, abene bali myee ngati libwe mupaka abantu babo ukabatabula badumusannyepo.

¹⁷ Ukubinjizya nukubikazya pighamba lyako, ubuzilo bubo awe we Mwene ubusalite pakuba buzilo bwako, Ubuzilo Ubuzelu bubo awe ukabuzenga.

¹⁸ U Mwene akwiza pakulaghilagha bwila na bwila.”

Ulwimbo ulwa Miliyamu

¹⁹ Bo ifalasi izya Falabo, ni ngolo izya bwite, sona na bendezya ngolo badwiba munyanja, u Mwene akayinyosezya inyanja mubuzilo bwache. Loli aba Izilayeli bakaloboka inyanja pachisu ichumizu.

²⁰ U Miliyamu umulaghuzi umukolo, umuyemba uwa Aloni akasenda ichisekeseke chache, po bope abakolo bosi bakamukonka nukulizya visekeseke vyabo nukwimba.

²¹ Po u Miliyamu akabimbila ulwimbo ulwakuti, “Mwimbile u Mwene pakuti alanjizya ukupota ukukulu nkani. Ifalasi na bakukwelapo abasumbila munyanja.”

Nizya mizi aghakubaba

²² Po u Mozesi akabalongolela aba Izilayeli ukwepapo pa Nyanja Inchesamu nukwinjila munkolongo iya Shuli. Bakenda amasiku matatu ukusita ukughagha amizi.

²³ Bo bafika pa Mala, bakapotwa pakung'wela amizi pabuzilo bulabula pachifukwa ichakuti amizi ghala ghakubabagha. Ichi cho chifukwa ubuzilo bula bukwitiziwanga ukuti Mala.

²⁴ Abantu bala bakilumbusya nu Mozesi nukumulalusya ukuti, “Nkimba tukwiza pakung'wela ichoni?”

²⁵ Po u Mozesi akamulilila u Mwene po u Mwene akamulanjizya akakwi. U Mozesi akakasumbila mumizi akakwi kala, po amizi ghakaleka pakubaba. Palapala u Mwene akabapa abantu bala ululaghilo ulukafu nkani nukubayela

²⁶ akati, “Nanti mukunyivwila ane nukubomba zizyo ngolosu pakukonka indaghilo zyane nukwivwila akiza vyosi vivyo nkubalamula, ntakwiza pakubafunda nu bubine ukuyana namumo nkabafundila aba Ijiputi. Pakuti ane ne Mwene, yuyo akubapozya.”

²⁷ Pisinda pache bakafika pa Elimu, papo pakaba imbwibwi 12 sona namakwi 70 agha mabale. Palapala bakazengapo ivisakasa vyabo mulubazu ulwa mizi.