Ukufuma 14 - IBAYIBOLO 2024

Ukuloboka Inyanja Inchesamu

¹ Po u Mwene akamubuzya u Mozesi akati,

² “Balamule aba Izilayeli ukuti banyokeko nukuzenga ivisakasa kuntazi kwa Pi Hahiloti pakasi pa Migidoli ni Nyanja Inchesamu, papipi nakaya akakulu aka Baala Zefoni.

³ U Falabo akwiza pakwinong'ona ukuti, ‘Aba Izilayeli bavulungana, bali pakwendakwenda bulo muchisu, sona basobeleye bulo munkolongo.’

⁴ Nkwiza pakughupela umoyo uwa Falabo pakuba mukafu nkani umwakuti akwiza pakubachimbizya. Loli itabwa lyane likwiza pakuchindikiwa, bo namupota u Falabo na basilikali bache, sona aba Ijiputi bosi bakwiza pakummanya ane ukuti ne Mwene.” Po aba Izilayeli bakabomba vivyo bakabuziwa.

⁵ Bo u mwene uwa Ijiputi, poka na makambala ghache bivwa ukuti aba Izilayeli bakachimbila, bakandula inyinong'ono zyabo. Po bakati, “Nkimba twabomba choni pakubitikizya abazya banaba ukuti babukaye?”

⁶ Po u Falabo akapinya ingolo yache iya bwite nukubabuzya abasilikali bache ukuti babukaye poka nawe.

⁷ Akasendapo ingolo izya bwite izyamaka 600, poka ni ngolo izinji izya mu Ijiputi, sona na basongo aba basilikali.

⁸ U Mwene akaghupela umoyo uwa Falabo u mwene uwamu Ijiputi pakuba mukafu nkani, umwakuti akabakonka aba Izilayeli, bo bakwepamo umwakwituvya.

⁹ Aba Ijiputi ni falasi zyosi, poka na bendezya ingolo bakabakonka aba Izilayeli nukubagha pabuzilo, bubo bakazenga ivisakasa vyabo papipi ni Pi Hahiloti umwakwenannya nu Baala Zefoni.

¹⁰ Bo aba Izilayeli bamwennya u Falabo na basilikali bache bakubakonka, bakanyila nkani, bakamulilila u Mwene ukuti abavwe.

¹¹ Bakilumbusya nu Mozesi bakati, “Nkimba amapumpa naghamo mu Ijiputi ukuti utusendele munkolongo nukufwila munumu?

¹² Bo tuchili tuli muchisu icha Ijiputi, nkimba tutakababuzyapo ukuti, ‘Tuleke bulo, nukuti tubanje bazya aba ba Ijiputi? Chikaba chizapo pakubabombela aba Ijiputi nukuchila pakufwila munkolongo muno!’ ”

¹³ U Mozesi akabamula abantu bala akati, “Mutakanyilaye! Mwimaye bulo, ukuti ilelo mubwennye ubupoki ubwa Mwene. Aba Ijiputi babo mukubennya mutakwiza pakubennya sona.

¹⁴ U Mwene akwiza pakubalwila ubwite, amwe banga bulo myee.”

¹⁵ U Mwene akamulalusya u Mozesi akati, “Nkimba choni chicho mukundilila? Balamule aba Izilayeli ukuti bendaye bulo.

¹⁶ Gholosezya indisa yako panyanja. Amizi ghakwiza pakugabinkana, ukuti aba Izilayeli baloboke inyanja pachisu ichumizu.

¹⁷ Nkwiza pakughapela amoyo agha ba Ijiputi pakuba makafu nkani, umwakuti bakwiza pakubakonka. Po nkwiza pakuchindikiwa ukwendela mwa Falabo na basilikali bache, ni ngolo zyache izya bwite, sona na bendezya ingolo zyache izya bwite.

¹⁸ Aba Ijiputi bakwiza pakummanya ane ukuti ne Mwene, bo nkuchindikiwa ukwendela mwa Falabo, na mungolo zyache izya bwite, sona na bendezya ingolo zyache.”

¹⁹ Po uwantumi uwa Chala uwakubalongolela aba Izilayeli akepako kuntazi kukwabo nukwima kwisinda. Impanda iya libingu yope yikepako kuntazi kukwabo nukwima kwisinda.

²⁰ Ibingu lila likaba pakasi pabasilikali aba Ijiputi naba Izilayeli. Ibingu lila likabapa aba Izilayeli ulukozyo, loli likabapelela ichisi aba Ijiputi, umwakuti ubusiku bosi bula bakapotwa pakupalamana.

²¹ Po u Mozesi akagholosezya inyobe yache panyanja, po u Mwene akayipela impepo iyamaka iyakubufumilo bwizuba pakukukila panyanja busiku bosi. Inyanja yila yikanduka pakuba chisu ichumizu, sona amizi ghakagabinkana.

²² Aba Izilayeli bakaloboka inyanja pachisu ichumizu pakasi pa vibumba vibili ivya mizi.

²³ Aba Ijiputi bakabakonka aba Izilayeli mupaka bakinjila munyanja mula poka ni falasi zyabo, ni ngolo zyabo izya bwite, sona na bendezya ingolo zila.

²⁴ Kubuche bo u Mwene ali mumpanda iya libingu na mumpanda iya moto akabennya abasilikali aba ba Ijiputi nukubavulungannya.

²⁵ U Mwene akazibadizya ingolo zyabo izya bwite zila, umwakuti bakatamiwa nkani pakuzyendezya. Aba Ijiputi bakati, “Zagha tubaleke bulo aba Izilayeli! U Mwene akubalwila ubwite.”

²⁶ Po u Mwene akamulamula u Mozesi akati, “Gholosezya inyobe yako panyanja, umwakuti amizi ghanyokele mubuzilo bwache nukubibizya aba Ijiputi, ni ngolo zyabo izya bwite, na bendezya ingolo zyabo zila.”

²⁷ U Mozesi akagholosezya inyobe yache panyanja, po kubuche amizi ghala ghakanyokela mubuzilo bwache. Aba Ijiputi bakayezya pakughalyegha, loli u Mwene akabibizya mumo.

²⁸ Amizi ghala ghakanyokela mubuzilo bwache nukwibizya ingolo izya bwite, poka na bendezya ingolo, sona na basilikali aba mu Ijiputi, babo bakabakonka aba Izilayeli panyanja. Atakabapo nayumoyumo uwakupona.

²⁹ Loli aba Izilayeli bakaloboka inyanja pachisu ichumizu pakasi pa vibumba ivya mizi kundilo na kumongo.

³⁰ Isiku linilyo u Mwene akabapoka aba Izilayeli munyobe izya ba Ijiputi. Aba Izilayeli bakabennya aba Ijiputi balambalaye mulubazu ulwa nyanja, bo bafuye.

³¹ Bo aba Izilayeli baghennya amaka amakulu agha Mwene ghagho akabapotela aba Ijiputi, bakamunyila nu nukumusubila u Mwene, sona nu Mozesi umubombi wache.