Ukufuma 11 - IBAYIBOLO 2024

Nizya bufwe ubwa bana abakatote

¹ Po u Mwene akamubuzya u Mozesi akati, “Nkwiza pakumufunda u Falabo poka na bantu bache ni chiwaya ichabumalilo. Pisinda pache akwiza pakubitikizya ukuti mubukaye. Naloli akwiza pakubachimbizyamo mwebosi muchisu chache.

² Losi ulu nena naba Izilayeli nukubabuzya abanavuli pamo abakolo pakubalaba abapalamani babo ivyakwibonesekezya akiza ivya golide nu siliva.”

³ U Mwene akabapela aba Ijiputi pakubapelela ichisa aba Izilayeli. U Mozesi akaba muntu umuchindikiwa nkani mu Ijiputi, na pamaso pa makambala agha Falabo, sona na pamaso pabantu bosi.

⁴ Po u Mozesi akamubuzya u Falabo akati, “U Mwene ati, ‘Pakasi pabusiku nkwiza pakudumusannya mu Ijiputi.

⁵ Po ukatote wesi umulumendo mu Ijiputi akwiza pakughoghiwa, ukwandila ukatote umulumendo uwa Falabo, yuyo akwiza pakupyana ubumwene mupaka nu katote wesi umulumendo uwa mukolo umuzya uwakusya ingano, sona ni ngwata yosi iya ng'ombe iyakwanda pakupapiwa yikwiza pakufwa.

⁶ Mu Ijiputi mukwiza pakuba inkuta inkulu nkani, yiyo nayumo umuntu atayivuyepo nalumolumo, pamo yikwiza pakwivwikapo sona.

⁷ Loli nayimoyimo imbwa yiyo yikwiza pakumubwatila umu Izilayeli, pamo ichitekwa, awe. Po mukwiza pakumanya ukuti ane ne Mwene nene nkubika ukulekana pakasi paba Ijiputi naba Izilayeli.

⁸ Amakambala ghinyu ghosi ghakwiza pakunfughamilila nukuti, “Epamo muno, awe poka na bantu bako bosi babo bakukukonka.” Po pisinda pache nkwiza pakubuka.’ ” U Mozesi akaghalabuka nukwepapo pa Falabo, bo akalaye nkani.

⁹ Po u Mwene akamubuzya u Mozesi akati, “U Falabo atakwiza pakukuteghelezya umwakuti impele iviswigho ivyinji mu Ijiputi.”

¹⁰ U Mozesi nu Aloni bakapela iviswigho vyosi vinivi pamaso pa Falabo, loli u Mwene akaghupela umoyo uwa Falabo pakuba mukafu nkani, umwakuti atakabitikizya aba Izilayeli pakwepamo muchisu chache.