Ukufuma 10 - IBAYIBOLO 2024

Ichiwaya icha makanta

¹ Po u Mwene akamubuzya u Mozesi akati, “Kakomane nu Falabo. Naghupela umoyo wache sona na moyo agha makambala ghache pakuba makafu nkani, umwakuti ningapela iviswigho vinivi pakasi papabo.

² Po mukwiza pakubabuzya abana binyu, sona na bizukulu binyu nizya mumo nkabapunganizizya aba Ijiputi ni viswigho vivyo nkapela. Bunubu mwebosi mukwiza pakummanya ane ukuti ne Mwene.”

³ U Mozesi nu Aloni bakabuka kwa Falabo nukumubuzya ukuti, “U Mwene u Chala uwa ba Hebeli ati, ‘Nkimba uchili ukukana pakwiyisya pamaso papane? Ubitikizye abantu bane ukuti babukaye, umwakuti banganyiputa.

⁴ Nanti utakubitikizya ukuti babukaye, indabi nkwiza pakutuma umakanta muchisu chako.

⁵ Umakanta yunuyu akwiza pakuchizuzya ichisu, umwakuti nayumoyumo umuntu akwiza pakuchennya ichisu, sona akwiza pakulya vivyo ivula iya mabwe yitakavinangannya. Akwiza pakunangannya amakwi ghosi ghagho ghakasyalako.

⁶ Akwiza pakwizula munyumba zyako na munyumba izya makambala ghako, sona na munyumba izya ba Ijiputi. Umakanta yunuyu akwiza pakuba mubibi nkani, yuyo abanyenya binyu batamwenizyepo nalumolumo.’ ” Po u Mozesi akaghalabuka nukwepapo pamaso pa Falabo.

⁷ Amakambala agha Falabo ghakamulalusya ghakati, “Nkimba umuntu yunuyu akwiza pakuleka liyi pakututamya? Ubitikizye abantu banaba babukaye umwakuti bangamuchindika u Mwene u Chala wabo. Nkimba utakuchennya ukuti losi ulu ichisu icha Ijiputi chananganika nkani?”

⁸ Po u Falabo akamwitizya sona u Mozesi nu Aloni nukubalamula ukuti, “Bukagha pakumwiputa u Mwene u Chala winyu. Loli bo bawenu babo babaghiye pakubuka?”

⁹ U Mozesi akamula akati, “Twebosi, aswe na bana bitu, poka na bantu bitu abaghosi. Tubaghiye tubukaye na bana bitu abalumendo na balindu, poka ni ng'ozi, ni mbuzi, ni ng'ombe zyitu bulo pachifukwa ichakuti tubaghiye pakuba nu lusekelo ulwa Mwene.”

¹⁰ Po u Falabo akati, “Nanti naloli nkubitikizya ukuti mubukaye na bachi binyu, sona na bana binyu, u Mwene abanje namwe. Pakuti inzimenye ukuti mukulonda pakubomba chimo ichibibi.

¹¹ Awe, mwe banavuli mwebene mwe mubukaye pakumwiputa u Mwene nanti ichi cho chicho mukuchilonda.” Na mazyu ghanagha u Mozesi nu Aloni bakachimbiziwapo pamaso pa Falabo.

¹² U Mwene akamulamula u Mozesi akati, “Gholosezya inyobe yako pachisu icha Ijiputi ukuti umakanta awe pachisu, nukulya ivimelwa vyosi vivyo ivula iya mabwe yitakavinangannya.”

¹³ Po u Mozesi akagholosezya indisa yache mumwanya pachisu icha Ijiputi. U Mwene akayipela impepo iyakubufumilo bwizuba pakuputila pachisu umusanya nu busiku. Pandabindabi umakanta akasata posi na posi.

¹⁴ Umakanta yula akizuzya ichisu chosi icha Ijiputi nukusata posi na posi. Akaba mwinji nkani yuyo nayumo umuntu atamwenizyepo ukwanda kale, pamo akwiza pakubako sona.

¹⁵ Akizuzya ichisu chosi mupaka chikaba fii. Umakanta yula akalya ivimelwa vyosi vivyo vikapona ku vula iya mabwe, ukonjelezyapo amakwi agha chikomwa. Katakasyalapo nakamokamo akantu akabisi mumakwi pamo ichimelwa muchisu chosi icha Ijiputi.

¹⁶ Panapo na panapo u Falabo akamwitizya u Mozesi nu Aloni nukuti, “Namunangila u Mwene u Chala winyu sona namwe bulo.

¹⁷ Losi ulu nalamba muhobokele pakabalilo kanaka ukunanga kwane nukunyiputila kwa Mwene u Chala winyu ukuti anyefezyeko ichiwaya ichakoghofya ichi.”

¹⁸ Po u Mozesi akepapo pamaso pa Falabo nukwiputa kwa Mwene.

¹⁹ Po u Mwene akayipela impepo iyakubufumilo bwizuba pakuba mpepo iyamaka iya kubwinjililo bwizuba, yiyo yikapupusizya umakanta yula mu Nyanja Inchesamu. Atakasyalamo nayumoyumo umakanta mu Ijiputi.

²⁰ Loli u Mwene akaghupela umoyo uwa Falabo pakuba mukafu nkani, umwakuti atakabitikizya aba Izilayeli ukuti babukaye.

Ichiwaya icha chisi

²¹ Po u Mwene akamulamula u Mozesi akati, “Gholosezya inyobe yako mumwanya, umwakuti ichisi ichakoghofya nkani chiwe mu Ijiputi.”

²² U Mozesi akagholosezya inyobe yache mumwanya, po ichisi ichakoghofya nkani chikawa mu Ijiputi amasiku matatu.

²³ Aba Ijiputi batakenannyanga, sona nayumoyumo yuyo akepapo panyumba yache amasiku matatu ghanagha. Loli ubuzilo bubo aba Izilayeli bakikalagha kukabako ulukozyo.

²⁴ Po u Falabo akamwitizya u Mozesi nukuti, “Bukagha pakumwiputa u Mwene. Bope abachi binyu na bana binyu bangabuka. Loli muzileke ing'ozi ni mbuzi, sona ni ng'ombe zyinyu munumu.”

²⁵ U Mozesi akamwamula akati, “Losi ulu awe utupe ivyakwiyipa ivyakocha, vivyo tubaghiye pakubika kwa Mwene u Chala witu.

²⁶ Ivitekwa vyitu vyope vibaghiye pakubuka poka naswe. Chitalipo nachimochimo chicho chikwiza pakusyala pakuti tubaghiye pakubombezya vimo pakumwiputa u Mwene u Chala witu, sona tutakuvimanya ivinyamana vivyo tungabombezya mupaka tufike kulakula.”

²⁷ Loli u Mwene akaghupela umoyo uwa Falabo pakuba mukafu nkani, umwakuti atakabitikizya ukuti abantu babukaye.

²⁸ Po u Falabo akamuchemela u Mozesi akati, “Epapo! Utakachele pakwiza sona pamaso papane. Nanti ukwiza pakuchela sona, kokuti pisiku linilyo ukwiza pakufwa.”

²⁹ U Mozesi akamwamula akati, “Wee mwene, momumo mo wanenela. Naloli intangachela pakwiza sona pamaso papako.”