Ukubelengiwa 9 - IBAYIBOLO 2024

Ulusekelo ulwabubili ulwa Pasa

¹ Umwezi uwakwanda uwa mwaka uwabubili, bo aba Izilayeli bepamo mu Ijiputi u Mwene akamubuzya u Mozesi munkolongo iya Sinayi akati,

² “Aba Izilayeli babanje nu Lusekelo ulwa Pasa pakabalilo kache.

³ Mubanje nu Lusekelo ulwa Pasa pisiku ilya 14 umwezi ghunughu pachamabwila ukuyana ni ndaghilo, sona na malamulo ghache.”

⁴ U Mozesi akabalamula aba Izilayeli bala pakuba nu Lusekelo ulwa Pasa.

⁵ Po aba Izilayeli bakaba nu Lusekelo ulwa Pasa pisiku ilya 14 ilya mwezi uwakwanda pachamabwila munkolongo iya Sinayi. Aba Izilayeli bakabomba vyosi vivyo u Mwene akamulamulila u Mozesi.

⁶ Loli abantu bamo batakasekela poka na banji pisiku lilalila pachifukwa ichakuti bakinyazya bene pakupalamasya umuvimba. Po bakiza kwa Mozesi nu Aloni pisiku lilalila

⁷ nukumubuzya u Mozesi ukuti, “Twinyazizye twebene pakupalamasya umuvimba, loli nkimba choni chicho tukukaniziwa pakubika ivyakwiyipa kwa Mwene poka naba Izilayeli abamwitu pakabalilo kache?”

⁸ U Mozesi akabamula akati, “Lindilila tasi mupaka nivwe zizyo u Mwene akwiza pakulamula nizya amwe.”

⁹ Po u Mwene akamubuzya u Mozesi akati,

¹⁰ “Ubalamule aba Izilayeli uti, ‘Nanti abantu bamo pakasi papinyu, pamo pakasi pa bizukulu binyu binyazizye bene pakupalamasya imivimba, pamo bachulitepo, bope bangabapo pa Lusekelo ulwa Pasa ulwa Mwene.

¹¹ Babanje nu Lusekelo ulwa Pasa pisiku ilya 14 ilya mumwezi uwabubili pachamabwila. Balyanje inyama iya mwana uwa ng'ozi poka ni chibama chicho chite ni chilungo, sona ninyanyi izya mani amababe.

¹² Batakayisungayepo inyama yilayila mupaka pandabindabi, pamo ukumemena amafupa ghache. Bo bakuba nu Lusekelo ulwa Pasa bakonkaye indaghilo zyache zyosi.

¹³ Loli abantu bamo babo batinyazizye bene pamo batachulitepo, bapotwa pakubapo pa Lusekelo ulwa Pasa, abantu balabala bepusiwepo pakasi pabantu pachifukwa ichakuti batakabika ivyakwiyipa kwa Mwene pakabalilo kache. Abantu balabala bafundiwanje pachifukwa icha mbibi zyabo.’ ”

¹⁴ “Nanti abayeni babo bakwikala pakasi papinyu bakulonda pakubapo pa Lusekelo ulwa Pasa, bope babombaye bunubu ukuyana ni ndaghilo zyache. Mwebosi mubanje nu lulaghilo loka manyi bayeni manyi benekaya.”

Ibingu pa Chisakasa icha Mwene

¹⁵ Pisiku lilyo bakimikagha Ichisakasa icha Mwene, ibingu likavwinka Ichisakasa chila. Ibingu likabonekagha ngati moto ukwandila pachamabwila mupaka pandabindabi pamwanya pachisakasa chilachila.

¹⁶ Akabalilo kosi ibingu lila likabonekagha bunubu. Likavwinkagha Ichisakasa icha Mwene chila, po pabusiku likabonekagha ngati moto

¹⁷ Nanti ibingu likwepapo pa Chisakasa palapala, bope aba Izilayeli bakanyamukagha ubulendo bwabo, sona nanti ibingu lila lyima, aba Izilayeli bope bakazengagha palapala ivisakasa vyabo.

¹⁸ Aba Izilayeli bala bakanyamukagha ubulendo bwabo, sona bakazengagha ivisakasa vyabo ukuyana namumo u Mwene akabalamulila. Akabalilo kosi kako ibingu lila likaba pamwanya pa Chisakasa icha Mwene bope bakikalagha muvisakasa vyabo.

¹⁹ Akabalilo kosi kako ibingu lila likendelelagha pakuba pamwanya pa Chisakasa amasiku aminji, aba Izilayeli bakivwilagha ululaghilo ulwa Mwene, sona batakanyamukagha ubulendo bwabo.

²⁰ Akabalilo kamo ibingu lila likaba pamwanya pa Chisakasa amasiku manandi bulo, po aba Izilayeli bakazengagha ivisakasa vyabo ukuyana nu lulaghilo ulwa Mwene, sona batakanyamukagha ubulendo bwabo.

²¹ Akabalilo kamo ibingu lila likaba bulo pa Chisakasa chila ukwandila pachamabwila mupaka pandabindabi, po nanti ibingu lila likukwela mumwanya pandabindabi, bope bakanyamukagha ubulendo bwabo. Akabalilo kosi kako ibingu lila likakwelagha mumwanya manyi po pamusanya manyi po pabusiku aba Izilayeli bakanyamukagha ubulendo bwabo.

²² Napapo ibingu lila lingaba pa Chisakasa chila amasiku mabili pamo umwezi pamo umwaka aba Izilayeli bakendelelagha pakwikala muvisakasa vyabo, sona batakanyamukagha ubulendo bwabo. Loli nanti ibingu lila lyakwela bulo mumwanya, aba Izilayeli bakanyamukagha ubulendo bwabo.

²³ Aba Izilayeli bakazengagha ivisakasa vyabo, sona nukunyamuka ubulendo bwabo ukuyana nu lulaghilo ulwa Mwene. Aba Izilayeli bakabomba vyosi vivyo u Mwene akabalamula ukwendela mwa Mozesi.