Ukubelengiwa 8 - IBAYIBOLO 2024

Ukubika inyale pachakubikapo chache

¹ U Mwene akamubuzya u Mozesi akati,

² “Umulamule u Aloni uti, ‘Bo ukubika inyale pachakubikapo chache, ubikaye inyale seveni, umwakuti zilamilaye kuntazi ukwa chakubikapo inyale.’ ”

³ U Aloni akazibika inyale zila umwakuti zikalamilagha kuntazi ukwa chakubikapo inyale ukuyana namumo u Mwene akamulamulila u Mozesi.

⁴ Umu momumo akachipangila ichakubikapo inyale chila, Chikaba chakusyaniwa nu golide ukwandila ko kubwikalilo bwache mupaka kubwezya. Ichakubikapo inyale chila chikapangiwa ukuyana namumo u Mwene akamulanjizizya u Mozesi.

Ukupaghuliliwa ukwa ba Levi

⁵ U Mwene akamubuzya u Mozesi akati,

⁶ “Ubapaghule aba Levi pakasi paba Izilayeli, sona ubaswefye

⁷ pakubanyafila amizi aghakubaswefezya, po bamwanje isisi na meya agha mumabili ghabo. Bachape amenda ghabo, umwakuti biswefye bene.

⁸ Basende inkambaku inyana yoka, poka ni chakwiyipa icha busu ubutinye ubwakongannya na mafuta, po usende ingwata iyabubili ukuti chibanje chakwiyipa chakupepesezya imbibi.

⁹ Wize naba Levi pantazi pa Chisakasa icha Mwene nukubabungannya poka aba Izilayeli bosi.

¹⁰ Bo ukwiza naba Levi pamaso pa Mwene, aba Izilayeli babike inyobe zyabo paba Levi bala.

¹¹ Po u Aloni ababike aba Levi pamaso pa Mwene ukuti chibanje chakwiyipa ichakuzyunguzya mumwanya icha ba Izilayeli umwakuti bamubombelaye u Mwene imbombo.

¹² “Pisinda pache aba Levi babike inyobe zyabo pamitu iya nkambaku zibili zila, nukuyibika inkambaku yoka kwa Mwene ukuti chibanje chakwiyipa ichakupepesezya imbibi, po abike iyinji ukuti chibanje chakocha ichakupepesezya imbimbi izya ba Levi.

¹³ Ubimike aba Levi pamaso pa Aloni na bana bache nukubabika ukuti chibanje chakwiyipa ichakuzyunguzya mumwanya kwa Mwene.

¹⁴ “Bunubu ubapaghule aba Levi pakasi paba Izilayeli abanji bosi, po aba Levi bakwiza pakuba bane na bane.

¹⁵ “Bo wamala pakubaswefya aba Levi nukubabika ukuti chibanje chakwiyipa ichakuzyunguzya mumwanya kwa Mwene, binjile mu Chisakasa icha Mwene pakubomba imbombo.

¹⁶ Pakuti banaba bo ba Izilayeli babo babaghiye pakubikiwa kukwane. Banaba bantu bane na bane, babo nabasenda mubuzilo ubwa bana abalumendo abakatote aba ba Izilayeli.

¹⁷ Pakuti umwana wesi umulumendo ukatote uwa ba Izilayeli wane nu wane, manyi mwana uwa muntu, manyi mwana uwa chitekwa. Pisiku lilyo nkabaghogha abana bosi abalumendo abakatote aba mu Ijiputi, banaba nkipaghulila ne mwenecho.

¹⁸ Po nabasenda aba Levi mubuzilo ubwa bana bosi abalumendo abakatote aba ba Izilayeli.

¹⁹ Aba Levi nabasenda pakasi paba Izilayeli nukumupa u Aloni na bana bache pakuba chabupi chabo ukuti babombaye imbombo mu Chisakasa icha Mwene mubuzilo ubwa ba Izilayeli, sona nukubika ichakwiyipa ichakupepesezya imbibi zyabo, umwakuti nachimo ichiwaya chitakabawile aba Izilayeli, bo bakupalamila mu Buzilo Ubuzelu.”

²⁰ Po umu momumo u Mozesi nu Aloni, poka naba Izilayeli bakabapaghulila aba Levi ukuyana namumo u Mwene akamulamulila u Mozesi.

²¹ Aba Levi bakiswefya bene, sona bakachapa amenda ghabo. Po u Aloni akababika ukuti chibanje chakwiyipa ichakuzyunguzya mumwanya kwa Mwene nukubika ichakwiyipa ichakupepesezya imbibi ukuti abaswefye.

²² Pisinda pache aba Levi bakinjila mu Chisakasa icha Mwene pakumwavwa imbombo u Aloni na bana bache abalumendo. Po bakababombela aba Levi bala ukuyana mumo u Mwene akamulamula u Mozesi.

²³ U Mwene akamubuzya u Mozesi akati,

²⁴ “Aba Levi abamaka 25 pamo ukuchilapo bangabomba imbombo mu Chisakasa icha Mwene.

²⁵ Loli nanti baba na maka 50 batuzyanje pambombo yabo, po batakabombaye nalumo.

²⁶ Bangabavwanga aba Levi abamwabo pakubomba imbombo mu Chisakasa icha Mwene, loli abene batakabombaye nayimoyimo imbombo. Umu momumo ubaghiye pakubagabila imbombo zyabo aba Levi.”