Ukubelengiwa 7 - IBAYIBOLO 2024

Ivyakwiyipa ivya balongozi

¹ Bo u Mozesi amala pakwimika Ichisakasa icha Mwene, akachipakazya na mafuta pakuchipaghula, poka ni vibombelo vyache vyosi. Akachipakazya sona ichighemo, poka ni vibombelo vyache vyosi.

² Po abalongozi aba Izilayeli, babo bakaba balongozi abamunyumba zyabo, sona babo bakenelezyanga imbombo iyakubabelenga abantu, bakabika ivyakwiyipa.

³ Bakiza nivyakwiyipa vyabo pamaso pa Mwene: Ingolo sikisi ni nkambaku 12, kokuti abalongozi babili pangolo yoka, sona umulongozi wesi inkambaku yoka nukwiza navyo ku Chisakasa icha Mwene.

⁴ U Mwene akamubuzya u Mozesi akati,

⁵ “Uvipokele ivyabupi vinivi umwakuti vibombeliwanje mu Chisakasa icha Mwene ichipaghuliwa. Ubapevyo aba Levi ukuyana ni mbombo yabo.”

⁶ Po u Mozesi akasenda ingolo zila ni nkambaku nukubapavyo aba Levi.

⁷ Abamunyumba iya Gelishoni akabapa ingolo zibili ni nkambaku folo ukuyana ni mbombo yabo,

⁸ sona abamunyumba iya Melali akabapa ingolo ni nkambaku eyiti, ukuyana ni mbombo yabo umwakulongoziwa nu Itamali umwana uwa muputi u Aloni.

⁹ Loli u Mozesi atakabapako nakamokamo abamunyumba iya Kohati pakuti imbombo yabo yikaba yakuvibaghala ivintu ivizelu pavipunko vyabo.

¹⁰ Pisiku lilyo bakachipaghulila ichighemo pakupakazya na mafuta, abalongozi bala bakabika ivyakwiyipa vyabo pantazi pachighemo.

¹¹ U Mwene akamubuzya u Mozesi akati, “Isiku ni siku umulongozi wesi ize ni vyakwiyipa vyache ivyakuchipaghulila ichighemo.”

¹² Umulongozi yuyo akabika ivyakwiyipa vyache pisiku ilyakwanda akaba we Nashoni umwana uwa Aminadabu, uwa luko ulwa Yuda.

¹³ Ivyakwiyipa vyache vikaba vyo ivi: Imbale yoka iya siliva, iyakung'wama ikilogalamu lyoka nu hafu, ni beseni lyoka ilya siliva ilyakung'wama amagalamu eyiti ukuyana ni chipimilo icha mu Buzilo Ubuzelu. Vyosi vibili vinivi vikizula nu busu ubutinye ubwakongannya na mafuta ukuti chibanje chakwiyipa icha busu.

¹⁴ Akabika sona ibeseni lyoka ilya golide ilyakung'wama amagalamu 110 ilyakwizula nu twakufukizya utwakununkila

¹⁵ ni nkambaku inyana nu dubi weka sona na kadubi koka aka mwaka ghoka ukuti chibanje chakwiyipa ichakocha.

¹⁶ Akabika sona usabwe weka ukuti abanje chakwiyipa ichakupepesezya imbibi

¹⁷ ni nkambaku zibili na badubi fayivi na basabwe fayivi na bana abadubi fayivi aba mwaka ghoka ukuti chibanje chakwiyipa ichabupoka. Chinichi chikaba chakwiyipa icha Nashoni umwana uwa Aminadabu.

¹⁸ Umulongozi yuyo akabika ivyakwiyipa vyache pisiku ilyabubili akaba we Netaneli umwana uwa Zuwala, uwa luko ulwa Isakala.

¹⁹ Ivyakwiyipa vyache vikaba vyo ivi: Imbale yoka iya siliva, iyakung'wama ikilogalamu lyoka nu hafu, ni beseni lyoka ilya siliva ilyakung'wama amagalamu 800 ukuyana ni chipimilo icha buzilo ubuzelu. Vyosi vibili vinivi vikizula nu busu ubutinye ubwakongannya na mafuta ukuti chibanje chakwiyipa cha busu.

²⁰ Akabika sona ibeseni lyoka ilya golide ilyakung'wama amagalamu 110, ilyakwizula nu twakufukizya utwakununkila,

²¹ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

²² Akabika sona usabwe weka ukuti abanje chakwiyipa ichakupepesezya imbibi.

²³ Po akabika sona ing'ombe zibili na badubi fayivi na basabwe fayivi sona na bana abadubi fayivi aba mwaka ghoka ukuti chibanje chakwiyipa ichabupoka. Chinichi chikaba chakwiyipa icha Netaneli umwana uwa Zuwala.

²⁴ Umulongozi yuyo akabika ivyakwiyipa vyache pisiku ilyabutatu akaba we Eliyabu umwana uwa Heloni uwa luko ulwa Zebuloni.

²⁵ Ivyakwiyipa vyache vikaba vyo ivi: Imbale yoka iya siliva, iyakung'wama ikilogalamu lyoka nu hafu, ni beseni lyoka ilya siliva ilyakung'wama amagalamu 800 ukuyana ni chipimilo icha mu Buzilo Ubuzelu. Vyosi vibili vinivi vikizula nu busu ubutinye ubwakongannya na mafuta ukuti chibanje chakwiyipa icha busu.

²⁶ Akabika sona ibeseni lyoka ilya golide ilyakung'wama amagalamu 110, ilyakwizula nu twakufukizya utwakununkila,

²⁷ ni nkambaku nu dubi weka sona nu mwana uwa ng'ozi, ukuti chibanje chakwiyipa ichakocha.

²⁸ Akabika sona usabwe weka ukuti abanje chakwiyipa ichakupepesezya imbibi.

²⁹ Po akabika sona ing'ombe zibili, na badubi fayivi, na basabwe fayivi, sona na bana abadubi fayivi aba mwaka ghoka ukuti chibanje chakwiyipa ichabupoka. Chinichi chikaba chakwiyipa icha Eliyabu umwana uwa Heloni.

³⁰ Umulongozi yuyo akabika ivyakwiyipa vyache pisiku ilyafolo akaba we Elizuli umwana uwa Shedewuli uwa luko ulwa Lubeni.

³¹ Ivyakwiyipa vyache vikaba vyo ivi: Imbale yoka iya siliva, iyakung'wama ikilogalamu lyoka nu ni beseni lyoka ilya siliva ilyakung'wama amagalamu 800 ukuyana ni chipimilo icha mu Buzilo Ubuzelu. Vyosi vibili vinivi vikizula nu busu ubutinye ubwakongannya na mafuta ukuti chibanje chakwiyipa icha busu.

³² Akabika sona ibeseni lyoka ilya golide ilyakung'wama amagalamu 110, ilyakwizula nu twakufukizya utwakununkila

³³ ni nkambaku inyana nu dubi weka, sona na kadubi koka ukuti chibanje chakwiyipa ichakocha.

³⁴ Akabika sona usabwe weka ukuti abanje chakwiyipa ichakupepesezya imbibi.

³⁵ Po akabika sona ing'ombe zibili na badubi fayivi na basabwe fayivi sona na bana abadubi fayivi aba mwaka ghoka ukuti chibanje chakwiyipa ichabupoka. Chinichi chikaba chakwiyipa icha Elizuli umwana uwa Shedewuli.

³⁶ Umulongozi yuyo akabika ivyakwiyipa vyache pisiku ilyafayivi akaba we Shelumiyeli umwana uwa Zulishadayi, uwa luko ulwa Simiyoni.

³⁷ Ivyakwiyipa vyache vikaba vyo ivi: Imbale yoka iya siliva, iyakung'wama ikilogalamu lyoka nu hafu, ni beseni lyoka ilya siliva ilyakung'wama amagalamu 800 ukuyana ni chipimilo icha mu Buzilo Ubuzelu. Vyosi vibili vinivi vikizula nu busu ubutinye ubwakongannya na mafuta ukuti chibanje chakwiyipa icha busu.

³⁸ Akabika sona ibeseni lyoka ilya golide ilyakung'wama amagalamu 110, ilyakwizula nu twakufukizya utwakununkila,

³⁹ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁴⁰ Akabika sona usabwe weka ukuti abanje chakwiyipa ichakupepesezya imbibi.

⁴¹ Po akabika sona ing'ombe zibili na badubi fayivi na basabwe fayivi sona na bana abadubi fayivi aba mwaka ghoka ukuti chibanje chakwiyipa ichabupoka. Chinichi chikaba chakwiyipa icha Shelumiyeli umwana uwa Zulishadayi.

⁴² Umulongozi yuyo akabika ivyakwiyipa vyache pisiku ilyasikisi akaba we Eliyasafu umwana uwa Deweli, uwa luko ulwa Gadi.

⁴³ Akabika ibeseni lyoka ilya siliva iyakung'wama ikilogalamu yoka nu hafu, sona ni beseni lyoka ilya siliva iyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁴⁴ Akabika sona ibeseni lyoka ilya golide ilyakung'wama amagalamu 110, inyizule nu twakufukizya utwakununkila

⁴⁵ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁴⁶ Akabika sona usabwe weka ukuti abanje chakwiyipa ichakupepesezya imbibi

⁴⁷ ni nkambaku zibili na badubi fayivi na basabwe fayivi sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Eliyasafu umwana uwa Deweli.

⁴⁸ Pisiku ilyaseveni u Elishama umwana uwa Amihudi, yuyo akaba mulongozi uwa ba Efulayimu, akabika ichakwiyipa chache.

⁴⁹ Akabika ibeseni lyoka ilya siliva iyakung'wama ikilogalamu yoka nu hafu. Akabika sona ni beseni lyoka ilya siliva iyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁵⁰ Akabika sona ibeseni lyoka ilya golide ilyakung'wama amagalamu 110, inyizule nu twakufukizya utwakununkila,

⁵¹ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁵² Akabika sona usabwe weka ukuti abanje chakwiyipa ichakupepesezya imbibi

⁵³ ni nkambaku zibili na badubi fayivi na basabwe fayivi sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Elishama umwana uwa Amihudi.

⁵⁴ Pisiku ilya eyiti u Gamaliyeli umwana uwa Pedazuli, umulongozi uwaluko ulwa Manase akabika ichakwiyipa chache.

⁵⁵ Akabika ibeseni lyoka ilya siliva ilyakung'wama ikilogalamu lyoka nu hafu. Akabika sona ni beseni lyoka ilya siliva ilyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁵⁶ Akabika sona ibeseni lyoka ilya golide ilyakung'wama amagalamu 110, ilyizule nu twakufukizya utwakununkila,

⁵⁷ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁵⁸ Akabika sona usabwe weka ukuti abanje chakwiyipa ichakupepesezya imbibi

⁵⁹ ni nkambaku zibili, na badubi fayivi na basabwe fayivi sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Gamaliyeli umwana uwa Pedazuli.

⁶⁰ Pisiku ilya nayini u Abidani umwana uwa Gidiyoni, umulongozi uwaluko ulwa Benjamini akabika ichakwiyipa chache.

⁶¹ Akabika ibeseni lyoka ilya siliva ilyakung'wama ikilogalamu yoka nu hafu. Akabika sona ni beseni lyoka ilya siliva ilyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁶² Akabika sona ibeseni lyoka ilya golide ilyakung'wama amagalamu 110, inyizule nu twakufukizya utwakununkila,

⁶³ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁶⁴ Akabika sona usabwe weka ukuti abanje chakwiyipa ichakupepesezya imbibi

⁶⁵ ni nkambaku zibili na badubi fayivi na basabwe fayivi sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Abidani umwana uwa Gidiyoni.

⁶⁶ Pisiku ilya 10 u Ahiyezeli umwana uwa Amishadayi umulongozi uwa bantu ba muchisu icha Dani akabika ichakwiyipa chache.

⁶⁷ Akabika ibeseni lyoka ilya siliva ilyakung'wama ikilogalamu lyoka nu hafu. Akabika sona ni beseni lyoka ilya siliva ilyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁶⁸ Akabika sona ibeseni lyoka ilya golide ilyakung'wama amagalamu 110, inyizule nu twakufukizya utwakununkila,

⁶⁹ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁷⁰ Akabika sona usabwe weka ukuti abanje chakwiyipa ichakupepesezya imbibi

⁷¹ ni nkambaku zibili na badubi fayivi na basabwe fayivi sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Ahiyezeli umwana uwa Amishadayi.

⁷² Pisiku ilya 11 u Pagiyeli umwana uwa Okolani umulongozi uwa bantu ba muchisu icha Asheli, akabika ichakwiyipa chache.

⁷³ Akabika ibeseni lyoka ilya siliva ilyakung'wama ikilogalamu lyoka nu hafu. Akabika sona ni beseni lyoka ilya siliva iyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁷⁴ Akabika sona ibeseni lyoka ilya golide ilyakung'wama amagalamu 110, inyizule nu twakufukizya utwakununkila,

⁷⁵ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁷⁶ Akabika sona usabwe weka ukuti abanje chakwiyipa ichakupepesezya imbibi,

⁷⁷ ni nkambaku zibili, na badubi fayivi na basabwe fayivi sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Pagiyeli umwana uwa Okolani.

⁷⁸ Pisiku ilya 12 u Ahila umwana uwa Enani umulongozi uwa bantu ba muchisu icha Nafutali akabika ichakwiyipa chache.

⁷⁹ Akabika ibeseni lyoka ilya siliva ilyakung'wama ikilogalamu lyoka nu hafu. Akabika sona ni beseni lyoka ilya siliva ilyakung'wama amagalamu 800, ukuyana ni chipimilo icha buzilo ubuzelu. Vyosi vinivi vikizula nu busu ubwakongannya na mafuta ukuti chibanje chakwiyipa icha busu.

⁸⁰ Akabika sona ibeseni lyoka ilya golide iyakung'wama amagalamu 110, ilyizule nu twakufukizya utwakununkila,

⁸¹ ni nkambaku inyana nu dubi weka, sona na kadubi koka aka mwaka ghoka ukuti chibanje chakwiyipa ichakocha.

⁸² Akabika sona usabwe weka ukuti abanje chakwiyipa ichakupepesezya imbibi,

⁸³ ni nkambaku zibili, na badubi fayivi, na basabwe fayivi, sona nu twadubi utwa mwaka ghoka fayivi ukuti chibanje chakwiyipa ichabupoka. Chinichi chikaba chakwiyipa icha Ahila umwana uwa Enani.

⁸⁴ Ivyakwiyipa vivyo abalongozi aba Izilayeli bakabika pakuchipaghulila ichighemo vikaba vyo ivi: Imbale 12 izya siliva na mabeseni 12 agha siliva sona nu tumbale 12 utwa golide.

⁸⁵ Ubung'wamu ubwa mbale yoka iya siliva bukaba ikilogalamu lyoka nu hafu nu bung'wamu ubwa beseni lyoka ilya siliva bukaba amagalamu 800. Ubung'wamu ubwa mabeseni ghosi agha siliva bukaba amakilogalamu 27 nu hafu ukuyana ni chipimilo icha mu Buzilo Ubuzelu.

⁸⁶ Ubung'wamu ubwa tumbale tosi 12 utwa golide utwakwizula nu twakufukizya utwakununkila bukaba amagalamu 110 ukuyana ni chipimilo icha mu buzilo ubuzelu.

⁸⁷ Ubwinji ubwa vitekwa vyosi vivyo bakabika ukuti chibanje chakwiyipa ichakocha chikaba cha nkambaku inyana 12, na badubi 12 nu twadubi 12 utwa mwaka ghoka, poka ni chakwiyipa icha busu. Abasabwe 12 bakabikiwa ukuti chibanje chakwiyipa ichakupepesezya imbibi.

⁸⁸ Ubwinji bosi ubwa vitekwa vivyo vikabikiwa ukuti vibanje vyakwiyipa ivyabupoka vyo ivi: Inkambaku zikaba 24, na badubi 60, na basabwe 60 nu twadubi 60 utwa mwaka ghoka. Vinivi vikaba vyakwiyipa ivyakuchipaghulila ichighemo, bo chapakaziwa na mafuta.

⁸⁹ Bo u Mozesi injila mu Chisakasa pakunena nu Mwene, akivwa izyu likunena nawe pakasi pa bakelubi babili pachikupikizyo icha Bokosi ilya Lufingo. Po u Mwene akanena nawe.