Ukubelengiwa 6 - IBAYIBOLO 2024

Indaghilo nizya ba Nazili

¹ U Mwene akamubuzya u Mozesi akati,

² “Ubalamule aba Izilayeli uti, ‘Nanti umwanavuli pamo umukolo akulonda pakulapa ichilapo ichapalubazu ichakwipaghulilila mwene kwa Mwene pakuba mu Nazili,

³ ikanizye mwene pakung'wela uvinyo pamo ubwalwa. Atakang'welaye uvinyo uwa mampesya pamo ichakung'wela chicho angakolwa nacho. Atakang'welaye amizi agha mampesya, pamo ukulya amampesya amabisi, pamo amampesya amumizu.

⁴ Akabalilo kache kosi bo umuntu yula achili mu Nazili, atakalyanje nakamokamo aka mampesya, pamo iseke, pamo amakambi ghache.

⁵ “ ‘Akabalilo kosi akakulapila ichilapo, umuntu yula atakamwanje isisi zyache. Abanje muntu umuzelu mupaka akabalilo kache akakwipaghulila kwa Mwene kamale. Alimbikaye isisi zyache.

⁶ “ ‘Akabalilo kosi akakwipaghulila kwache kwa Mwene, umuntu yula atakapalamilaye ku muvimba.

⁷ Atakinyazye mwene pakupalamila ku muvimba uwa wise pamo uwa nyina pamo uwa wamwabo pamo uwa muyemba wache pakuti ichi cho chimanyilo ichakwipaghulila kwache kwa Chala.

⁸ Akabalilo kosi akakwipaghulila kwache kwa Mwene, umuntu yula akuba muzelu.

⁹ “ ‘Nanti umuntu yumo afwa umwakuchenusya bulo papipi nawe, umwakuti akuzinyazya isisi zyache zizyo akazipaghula, pisiku ilyaseveni, lilyo lisiku ilyakwiswefezya, amwe isisi zyache.

¹⁰ Pisiku ilya eyiti ize ku muputi ni ntozi zibili pamo utwana utwa nkunda tubili pamulyango uwa Chisakasa icha Mwene.

¹¹ Umuputi abike inkunda yoka ukuti chibanje chakwiyipa ichakupepesezya imbibi, sona abike iyinji ukuti chibanje chakwiyipa ichakocha. Po abike ichakwiyipa ichakupepesezya imbibi izya muntu yula pachifukwa ichakuti akananga pakupalamila ku muvimba. Pisiku linilyo baghuswefye umutu wabo

¹² Akabalilo kosi abanje muntu uwakwipaghulila kwa Mwene, sona ize nu dubi uwa mwaka ghoka ukuti chibanje chakwiyipa ichakupepesezya inongwa. Loli atakabelengeleko amasiku ghagho ghamalagha, pachifukwa ichakuti akinyazya mwene, bo achili muntu mupaghuliwa.

¹³ “ ‘Ulu lo lulaghilo ulwakunena nizya mu Nazili, bo akabalilo akakwipaghulila kwache kamala. Po umuntu yula bize nawe pamulyango uwa Chisakasa icha Mwene.

¹⁴ Palapala abike kwa Mwene udubi weka uwa mwaka ghoka umusita chilema nachimochimo ukuti chibanje chakwiyipa ichakocha ni ng'ozi inkolo yoka iya mwaka ghoka yiyo yite ni chilema nachimochimo ukuti chibanje chakwiyipa ichakupepesezya imbibi, sona nu dubi weka ukuti chibanje chakwiyipa chabupoka.

¹⁵ Abike sona ichakwiyipa icha busu, ni chakwiyipa ichakung'wela ni chidudunga icha vibama vivyo vite ni chilungo ni vitumbuwa ivipapate ivya busu ubutinye ivyakupakiwa na mafuta sona ni chakwiyipa icha vinyo.

¹⁶ “ ‘Umuputi avibike pamaso pa Mwene ukuti chibanje chakwiyipa ichakupepesezya imbibi sona ni chakwiyipa ichakocha.

¹⁷ Po abike ichidudunga icha vibama vivyo vite ni chilungo nukubika sona nu dubi ukuti chibanje chakwiyipa ichabupoka kwa Mwene, poka ni chakwiyipa icha busu sona ni chakwiyipa icha vinyo.

¹⁸ “ ‘Po umu Nazili yula amwe isisi zyache, zizyo akazipaghula pamulyango uwa Chisakasa icha Mwene. Asende isisi zyache zila nukuzyocha pamoto ghugho ghuli pasi pachakwiyipa ichabupoka.

¹⁹ “ ‘Bo umu Nazili yula amwa isisi zyache zizyo akazipaghula, umuputi abike munyobe zyache ichinama ichipiye ichakuntazi icha dubi, sona ni chibama choka ichipapate chicho chite ni chilungo, sona ni chitumbuwa choka chicho chite ni chilungo.

²⁰ Umuputi avizyunguzye pamaso pa Mwene ukuti chibanje chakwiyipa ichakuzyunguzya mumwanya. Ivyakwiyipa vinivi vizelu, sona vya muputi, poka na kajimbi kako akakuzyunguzya mumwanya, sona ni ntapatapa. Pisinda pache umu Nazili yula angang'wela uvinyo.

²¹ “ ‘Ulu lo lulaghilo ulwa mu Nazili yuyo akulapa ichilapo ichakwipaghulila kwa Mwene. Loli nanti angakwanisya ukubika ivyakwiyipa ivyakuchilapo vivyo umu Nazili akubika, angabomba bunubu.’ ”

Ulusayo ulwa buputi

²² U Mwene akamubuzya u Mozesi akati,

²³ “Umubuzye u Aloni na bana bache uti, ‘Umu momumo mukwiza pakubasayila aba Izilayeli:

²⁴ U Mwene abasaye nukubasungilila.

²⁵ Icheni icha Mwene chibalamilaye, sona abapelelaye ichisa.

²⁶ Ubuchindamu ubwa Mwene bubalamilaye, sona abape umutende.’ ”

²⁷ Po u Mwene akati, “Nanti u Aloni na bana bache bakulitambula itabwa lyane pakubasaya aba Izilayeli, po ane nkwiza pakubasaya.”