Ukubelengiwa 5 - IBAYIBOLO 2024

Nizya bantu abanyazu muvisakasa

¹ U Mwene akamubuzya u Mozesi akati,

² “Ubalamule aba Izilayeli ukuti babefyemo abamambombo bosi muvisakasa pamo umuntu wesi yuyo akufumya amafila pamo umuntu wesi yuyo akwinyazya mwene pakughupalamasya umuvimba.

³ Abantu bosi abanyazu banaba manyi banavuli manyi bakolo mubefezye kuzi ukwa visakasa umwakuti batakavinyazye ivisakasa, mumo ane nkwikala pakasi papabo.”

⁴ Aba Izilayeli bakabomba bunubu pakubefezya kuzi ukwa visakasa abantu bosi bala ukuyana namumo u Mwene akamulamulila u Mozesi.

Nizya kutanizya

⁵ U Mwene akamubuzya u Mozesi akati,

⁶ “Ubalamule aba Izilayeli uti, ‘Nanti umwanavuli pamo umukolo akumunangila umuntu uyunji, kokuti ate musubiliwa kwa Mwene, sona umuntu yulayula abanje ninongwa.

⁷ Po ilate imbibi yiyo anangite, sona atanizye papo ivintu vyosi vivyo anangannya nukonjelezyapo ichigaba choka pavigaba fayivi nukumupa umuntu.

⁸ Loli nanti umuntu yula ate nu mukamu uwakuti angapokela amalipilo mubuzilo bwache, amalipilo ghalaghala ghakuba gha Mwene, sona bamupe umuputi. Bonjelezyepo udubi uwakupepesezya imbibi izya muntu yula.

⁹ Ivyakusangula vyosi ivizelu vivyo aba Izilayeli bakumupa umuputi vikuba vyache.

¹⁰ Ivyabupi ivizelu ivya muntu wesi vikuba vya muntu yulayula, loli vivyo akumupa umuputi vikuba vya muputi.’ ”

Nizya buzuba

¹¹ U Mwene akamubuzya u Mozesi akati,

¹² “Ubalamule aba Izilayeli uti, ‘Nanti umuchi uwa muntu akumwenda pasi umulume wache,

¹³ pakulowa nu mwanavuli uyunji po zinizi umulume atakuzimanya sona atakuzyaghannya ukuti inyazizye, pakuti pate ubwakaboni nabumobumo sona atalemiwe,

¹⁴ sona nanti umulume akuba nu buzuba nawe, nukumwinong'onela zimo umuchi wache napapo atinyazizye

¹⁵ umulume yula ize nu muchi wache ku muputi. Asende ichakwiyipa icha busu ubwa mapemba ubwakukwana ikilogalamu lyoka. Atakapungulilemo amafuta pamo ukubikamo utwakufukizya utwakununkila pakuti cho chakwiyipa icha busu ichakubuzikizya nanti umukolo yula abombite imbibi.’ ”

¹⁶ “Umuputi ize nu mukolo yula nukumwimika pamaso pa Mwene.

¹⁷ Po umuputi asembepo amizi ghamo amazelu musonta nukusendapo ulufumbi lumo ulwa mu Chisakasa icha Mwene nukulubika mumizi ghala.

¹⁸ Bo umuputi amwimika umukolo yula pamaso pa Mwene, asatule isisi izya mukolo yula nukubika munyobe zyache ichakwiyipa icha busu ichakubuzikizya nanti abombite imbibi, chicho chakwiyipa icha buzuba chila, bo umuputi alemite amizi aghakubaba ghagho ghakwiza ni nguno.

¹⁹ Po umuputi amulapizye umukolo yula ukuti, ‘Nanti utalowitepo, sona nanti utakamwenda pasi umulume wako nukwinyazya wemwene, bo uli munyobe zyache, amizi aghakubaba agha ghatakakupelele inguno.

²⁰ Loli nanti ukamwenda pasi umulume wako, bo uli munyobe zyache nukwinyazya wemwene pakulowa,’

²¹ umuputi yula amulapizye umukolo yula na mazyu agha nguno aghakuti, ‘U Mwene akupele awe pakuba we mughuniwa pakasi pabantu abaluko lwako, sona izuzye ulwanda lwako nukwighalila impapo yako.

²² Amizi agha nguno ghanagha ghinjile mulwanda lwako umwakuti lwizule, nukuyighalila impapo yako.’ ” Po umukolo yula akwiza pakwitika ukuti, “Ameni. Momumo.”

²³ “Po umuputi azisimbe mwibuku inguno zinizi nukuzizimya pakuzidwibika mumizi aghakubaba ghala.

²⁴ Umuputi amung'wesye umukolo yula amizi aghakubaba agha nguno ghala, po amizi ghala ghakwiza pakwinjila mulwanda lwache nukumupelela ububavu nkani.

²⁵ Umuputi yula efyemo munyobe izya mukolo yula ichakwiyipa icha busu icha buzuba nukuchizyunguzya pamaso pa Mwene nukwiza nacho pachighemo.

²⁶ Umuputi asendepo ichikufi choka icha busu bula ukuti chibanje chakwiyipa icha chikumbusyo nukocha pachighemo. Pisinda pache amung'wesye umukolo yula amizi ghala.

²⁷ Nanti umukolo yula inyazizyepo mwene pakumwenda pasi umulume wache, sona bo ang'wela amizi agha nguno ghala, ghakwiza pakwinjila mulwanda lwache nukumupelela ububavu nkani. Ulwanda lwache lukwiza pakwizula, sona impapo yache yikwiza pakwighalila, po umukolo yula akwiza pakuba mughuniwa pakasi pabantu bache.

²⁸ Loli nanti umukolo yula atinyazizyepo mwene, sona nukuti ate ninongwa nayimoyimo, akupimiwa pakuba musita nongwa, po akwiza pakupapagha abana.

²⁹ “Ulu lo lulaghilo ulwakunena nizya buzuba, nanti umuchi akumwenda pasi umulume wache nukwinyazya mwene, bo ali munyobe zyache,

³⁰ pamo nanti umulume ali nu buzuba nu muchi pachifukwa ichakuti akumwinong'onela zimo umuchi wache. Umuputi amwimike pamaso pa Mwene, po abombezyanje ululaghilo lunulu pa mukolo yula.

³¹ Umulume apimiwanje pakuba musita nongwa, loli inongwa yilayila yibanje pamutu uwa mukolo yula.”