Ukubelengiwa 4 - IBAYIBOLO 2024

Imbombo iya ba Levi na baluko ulwa Kohati

¹ U Mwene akamubuzya u Mozesi nu Aloni akati,

² “Ubabelenge abamunyumba iya Kohati, babo bantu abaluko ulwa Levi, ukuyana ni nyumba zyabo, sona nuluko lwabo.

³ Ubabelenge abanavuli bosi abamaka 30 mupaka 50, babo bangayibomba imbombo mu Chisakasa icha Mwene.”

⁴ Imbombo yiyo abamunyumba iya Kohati bakapeghiwa pakubomba mu Chisakasa icha Mwene yikaba yakusungilila ivintu ivizelu nkani.

⁵ Bo abantu bakusamya ivisakasa vyabo, u Aloni poka na bana bache binjile mu Chisakasa icha Mwene pakughusatula umwenda uwakuzighila, nukulivwinka Ibokosi ilya Lufingo.

⁶ Pisinda pache bavwinkepo na makwela agha mbuzi, sona batenge pamwanya umwenda uwa buluu, nukusomeka amakwi aghakunyamulila.

⁷ Pitebulo ilyakubikapo ivibama ivyakubikiwa kwa Mwene batengepo umwenda uwa buluu nukubikapo amabeseni nu lukezo ni mbale sona ni sonta izya chakwiyipa icha vinyo. Pitebulo palapala pabanjepo vibama bwila na bwila.

⁸ Pamwanya pa vinivi batengepo umwenda umuchesamile nukuvivwinka na makwela agha mbuzi, sona basomeke amakwi aghakunyamulila.

⁹ Basende umwenda uwa buluu nukuchivwinka ichakubikapo inyale poka ni nyale zyache nu tulemelo twache ni chakuyolela itoyi sona ni sonta zyosi izyakubikilamo amafuta.

¹⁰ Po bachinnyembetelele poka ni vibombelo vyache vyosi munyambi iya makwela agha mbuzi nukuchibika pachakunyamulila.

¹¹ Pachighemo icha golide batengepo umwenda uwa buluu nukuchivwinka na makwela agha mbuzi, sona basomeke amakwi aghakunyamulila.

¹² Basende ivibombelo vyosi vivyo bakubombezya Mubuzilo Ubuzelu nukuvinnyembetelela nu mwenda uwa buluu, sona bavivwinke na makwela agha mbuzi nukuvibika pachakunyamulila chache.

¹³ Bayole itoyi pachighemo nukutengapo umwenda umuchesamile.

¹⁴ Babikepo pachighemo ivibombelo vyosi vivyo bakubombezya imbombo palapala. Ivibombelo vyache vyo ivi: Ivyakukazingila ni nkezo na mafosholo sona na mabeseni. Pamwanya batengepo amakwela agha mbuzi nukusomeka amakwi aghakunyamulila.

¹⁵ Bo u Aloni na bana bache bamala pakuvwinka Ubuzilo Ubuzelu poka ni vibombelo vyache sona bo abantu bakusama, abamunyumba iya Kohati bize pakuvinyamula. Loli batakapalamasye ivintu ivizelu lumo bangafwa. Abamunyumba iya Kohati banyamule ivintu vyene vivyo vili mu Chisakasa icha Mwene.

¹⁶ “U Eleyazala umwana uwa umuputi u Aloni asungililaye amafuta agha nyale nu twakufukizya utwakununkila, ni chakwiyipa icha busu icha bwila na bwila, sona na mafuta aghakupakazya. Asungililaye Ubuzilo Ubuzelu, sona ni vibombelo vyosi vivyo vili mumo, poka ni vibombelo vyache.”

¹⁷ U Mwene akamubuzya u Mozesi nu Aloni akati,

¹⁸ “Mwenelezye ukuti abaluko ulwa Kohati ukuti batakananganike pakasi paba Levi,

¹⁹ umwakuti batakafwe bo bakupalamila ku vintu ivizelu nkani. U Aloni poka na bana bache binjilaye Mubuzilo Ubuzelu nukumubuzya umuntu wesi ichakubomba, sona ni vyakunyamula.

²⁰ Loli abamunyumba iya Kohati batakinjilemo pakwennya ivintu ivizelu lumo bangafwa, napapo kangaba kabalilo akanandi bulo.”

Imbombo iya ba Levi na baluko ulwa Gelishoni

²¹ U Mwene akamubuzya u Mozesi akati,

²² “Ubabelenge abaluko bosi aba Gelishoni ukuyana ni nyumba zyabo, sona nuluko lwabo.

²³ Ubabelenge abanavuli bosi abamaka 30 mupaka 50, babo bangabomba imbombo mu Chisakasa icha Mwene.”

²⁴ Imbombo iya baluko ulwa Gelishoni yo iyi:

²⁵ Banyamulaye umwenda uwakuzighila Ubuzilo Ubuzelu, ni Chisakasa icha Mwene poka nu mwenda wache ni vyakuvwinka ivya makwela agha mbuzi sona nu mwenda uwakuzighila pamulyango

²⁶ na menda agha lupaso na menda aghakupayika nu mwenda uwakuzighila pamulyango uwa lupaso ni chighemo ninkusa sona ni vibombelo vyache vyosi. Abene babombaye imbombo yosi yiyo bakapeghiwa pakubomba.

²⁷ U Mozesi nu Aloni benelezyanje imbombo yosi yiyo bakubomba abaluko ulwa Gelishoni. U Aloni na bana bache bababuzyanje abaluko ulwa Gelishoni ivintu vyosi vivyo babaghiye pakunyamula.

²⁸ Iyi yo mbombo iya abaluko iya Gelishoni mu Chisakasa icha Mwene umwakulongoziwa nu Itamali umwana uwa umuputi u Aloni.

Imbombo iya ba Levi na baluko ulwa Melali

²⁹ U Mwene akamubuzya u Mozesi akati, “Ubabelenge abamunyumba iya Melali ukuyana ni nyumba zyabo, sona nuluko lwabo.

³⁰ Ubabelenge abanavuli bosi abamaka 30 mupaka 50, babo bangabomba imbombo mu Chisakasa icha Mwene.

³¹ Imbombo iya abaluko ulwa Melali yo iyi: Banyamulaye amafulemu agha Chisakasa icha Mwene ni ntatikilo ni mpanda sona nu bwikalilo bwache

³² ni mpanda izya lupaso nu bwikalilo bwache nu tukwi utusongole ninkusa zyache poka ni vibombelo vyache vyosi. Umubuzye umuntu wesi ivibombelo vivyo abaghiye pakunyamula.

³³ Iyi yo mbombo iya baluko ulwa Melali mu Chisakasa icha Mwene umwakulongoziwa nu Itamali umwana uwa muputi u Aloni.”

Ukubelengiwa ukwa ba Levi

³⁴ U Mozesi nu Aloni poka na balongozi aba Izilayeli bakababelenga abamunyumba iya Kohati ukuyana ni nyumba zyabo, sona nuluko lwabo.

³⁵ Abanavuli bosi abamaka 30 mupaka 50, babo bangabomba imbombo mu Chisakasa icha Mwene bakabelengiwa.

³⁶ Po ubwinji ubwa bosi bukaba 2,750.

³⁷ Ubu bukaba bwinji ubwa bosi abamunyumba iya Kohati, babo bakabomba imbombo mu Chisakasa icha Mwene. U Mozesi nu Aloni bakababelenga ukuyana namumo u Mwene akabalamulila ukwendela mwa Mozesi.

³⁸ Abamunyumba iya Gelishoni bakabelengiwa ukuyana ni nyumba zyabo, sona nuluko lwabo.

³⁹ Abanavuli bosi abamaka 30 mupaka 50 babo bakiza pakubomba imbombo mu Chisakasa icha Mwene

⁴⁰ bakabapo 2,600 ukuyana ni nyumba zyabo, sona nuluko lwabo.

⁴¹ Ubu bukaba bwinji ubwa bosi abamunyumba iya Gelishoni, babo bakiza pakubomba imbombo mu Chisakasa icha Mwene. U Mozesi nu Aloni bakababelenga ukuyana namumo u Mwene akabalamulila.

⁴² U Mozesi nu Aloni bakababelenga sona abamunyumba iya Melali ukuyana ni nyumba zyabo, sona nuluko lwabo.

⁴³ Abanavuli bosi abamaka 30 mupaka 50, babo bangabomba imbombo mu Chisakasa icha Mwene bakabelengiwa.

⁴⁴ Ubwinji bwabo bukaba 3,200.

⁴⁵ Ubu bukaba bwinji ubwa abamunyumba iya Melali. U Mozesi nu Aloni bakababelenga ukuyana namumo u Mwene akabalamulila ukwendela mwa Mozesi.

⁴⁶ Po u Mozesi nu Aloni, poka na balongozi aba ba Izilayeli bakababelenga aba Levi bosi ukuyana ni nyumba zyabo, sona nuluko lwabo.

⁴⁷ Abanavuli bosi abamaka 30 mupaka 50, babo bangabomba imbombo nukunyamula Ichisakasa icha Mwene bakabelengiwa.

⁴⁸ Ubwinji bwabo bukaba 8,580.

⁴⁹ Umuntu wesi akapeghiwa imbombo yache nukubuziwa ivibombelo vivyo abaghiye pakunyamula ukuyana namumo u Mwene akalamulila ukwendela mwa Mozesi.