Ukubelengiwa 36 - IBAYIBOLO 2024

Ichilingo icha bakolo abasendwe

¹ Abalongozi abamunyumba iya Giliyadi umwana uwa Makili, umwana uwa Manase, babo bakaba bamunyumba izya baluko aba Yosefu bakiza pakunenezannya nu Mozesi na balongozi abanji, sona na balongozi aba ba Izilayeli.

² Bakati, “U Mwene akamulamula u mwene wane ukuti ubagabile aba Izilayeli ichisu pakuba mpyana yabo pakupanga amayele. Akabalamula sona akati, mubape ichilingo icha wamwitu u Zelofehadi abana bache abalindu.

³ Loli buli nanti basendwa na banavuli aba inko izinji izya ba Izilayeli, po impyana yabo yikwiza pakufyuliwa pakuba mpyana iya banyenya bitu nukuchonjelezyapo pa mpyana iya luko lulo asendizwe nalo. Po ichigaba chimo icha chigaba chicho chapeghiwa kukwitu chikwiza pakufyuliwa.

⁴ Bo umwaka uwa lusekelo uwa ba Izilayeli wakwana, impyana yabo yikwiza pakonjeleziwapo pa mpyana iya luko lulo basendwako. Po ichilingo chabo chikwiza pakufyuliwako ku mpyana iya luko lwabanyenya bitu.”

⁵ Po u Mozesi akabalamula aba Izilayeli vivyo u Mwene akamubuzya ukuti, “Zizyo abaluko ulwa Yosefu bakunena zyanaloli.

⁶ Izi zyo zizyo u Mwene akabalamula abana abalindu aba Zelofehadi: Mubitikizye ukuti basendwe nu mwanavuli wesi uwa luko lwabanyenya babo yuyo akumulonda.

⁷ Patakabepo nachimochimo ichilingo icha ba Izilayeli ichakusendwa kuluko ulunji ukubuka kuluko ulunji, pakuti umu Izilayeli wesi akwiza pakwenelezya ichilingo icha banyenya bache.

⁸ Umwana wesi umulindu yuyo akupyana ichilingo icha bantu abaluko ulwa Izilayeli abaghiye pakusendwa nu mwanavuli uwa bamunyumba iya wise, umwakuti umu Izilayeli wesi abanje ni mpyana iya banyenya bache.

⁹ Yitakabepo nayimoyimo impyana iyakusendwa kuluko ulunji ukubuka kuluko ulunji, pakuti uluko losi lwaba Izilayeli lwenelezyanje impyana yabo.”

¹⁰ Abana abalindu aba Zelofehadi bakabomba zizyo u Mwene akamulamula u Mozesi,

¹¹ umwakuti u Mala nu Tiliza nu Hogila nu Milika sona nu Nowa babo bakaba bana abalindu aba Zelofehadi bakasendwa na bavyala abawise.

¹² Bakasendwa na bamunyumba iya baluko ulwa manase, umwana uwa Yosefu, po impyana yabo yikendelela pakuba ya bamunyumba iya luko lwabo.

¹³ Izi zyo ndaghilo na malamulo ghagho u Mwene akabapa aba Izilayeli mwikombe ilya Mowabu papipi nu lusoko ulwa Yolodani ukwendela mwa Mozesi umwakwenannya nakaya aka Yeliko.