Ukubelengiwa 35 - IBAYIBOLO 2024

Utwaya utukulu nkani utwa ba Levi

¹ U Mwene akamubuzya u Mozesi mwikombe ilya Mowabu papipi nu lusoko ulwa Yolodani umwakwenannya nu Yeliko akati,

² “Ubalamule aba Izilayeli ukuti mubapeko aba Levi utwaya utukulu nkani pa mpyana yabo ukuti bikalaye mumo. Mubape sona ubuzilo ubwakudimilamo ivitekwa vyabo.

³ Po aba Levi bakwiza pakuba nutwaya utukulu nkani utwabo nu twabo utwakwikalamo, sona nu buzilo bwabo ubwakudimilako ing'ombe zyabo, sona ni vitekwa vyabo vyosi.

⁴ “Ubuzilo ubwakudimilako ivitekwa bubo buzyunguliliwe nutwaya utukulu nkani tuto mukwiza pakubapa abantu aba Levi, bukwiza pakwandila

⁵ kulubumba nukufumila kuzi amamita 900. Upime kuzi ukwakudimilako ivitekwa amamita 900, kulubazu ulwabufumilo bwizuba, kuntende upime amamita 900, po ubuzilo bunubu bubanje pakasikasi sona kumitu kwache amamita 900 po sona kubwinjililo bwizuba amamita 900.

⁶ “Utwaya sikisi tuto mukwiza pakubapa aba Levi, tubanje twakuponelamo umuntu yuyo amughogha umuntu uwamwabo, sona mubonjelezye utwaya utunji 40.

⁷ Mubape aba Levi utwaya 48 tosi poka nu buzilo ubwakudimilamo ivitekwa.

⁸ Utwaya tuto mukubapa aba Levi pa mpyana iya ba Izilayeli, tubanje umwakuyana nu bukulu ubwa luko losi. Musendeko utwaya utwinji utwa luko lulo luli nutwaya utwinji, loli musendeko utwaya tunandi utwa luko lulo luli nutwaya utunandi.”

Utwaya utwakuponelamo

⁹ Po u Mwene akamubuzya u Mozesi akati,

¹⁰ “Ubalamule aba Izilayeli uti, ‘Bo mukuloboka ulusoko ulwa Yolodani pakwinjila mu Kenani,

¹¹ musale utwaya tumo pakuba twaya twinyu utwakuponelamo, kuko umuntu yuyo amughogha umuntu uwamwabo umwamukosi bulo angaponelamo.

¹² Utwaya tunutu tubanje twaya twakuponelamo ku mukamu uwalutanizyo, umwakuti umughoghi yula atakafwe mupaka alongiwe pamaso pa chilundilo.

¹³ Utwaya sikisi tuto mukubapa tubanje twaya twinyu utwakuponelamo.

¹⁴ Kwisila ilya lusoko ulwa Yolodani mubape utwaya tutatu, sona mubape utwaya tutatu mu Kenani ukuti tubanje twaya utwakuponelamo.

¹⁵ Utwaya sikisi tunutu tukwiza pakuba buzilo ubwakuponelamo ubwa ba Izilayeli, na bayeni, sona na bantu abanji babo bakwikala pakasi papabo, umwakuti umuntu wesi yuyo amughogha umuntu uwamwabo umwamukosi bulo angaponelamo.

¹⁶ “ ‘Loli nanti umuntu amukoma umuntu uwamwabo ni chela nukumughogha umuntu uwamwabo yula, kokuti umuntu yula mughoghi. Umuntu yuyo akumughogha uwamwabo, wepe aghoghiwanje.

¹⁷ Nanti umuntu amutiza umuntu uwamwabo nibwe nukumughogha, kokuti umuntu yula mughoghi. Umuntu yuyo ukumughogha uwamwabo, wepe aghoghiwanje.

¹⁸ Pamo nanti umuntu akumukoma umuntu uwamwabo ni ntughu nukumughogha, kokuti umuntu yula mughoghi. Umuntu yuyo akumughogha uwamwabo, wepe aghoghiwanje.

¹⁹ Uwamwabo uwa muntu umufwe yula atanizyanje pachifukwa icha bufwe bula. Nanti akomana bulo nu muntu umughoghi yula, wepe amughoghe.

²⁰ Nanti umuntu akumuvwamilila umuntu uwamwabo nukumulasa ni chibombelo pachifukwa icha lubengo bulo nukumughogha,

²¹ pamo pakumughogha ni nkonya, kokuti wepe aghoghiwanje. Umuntu yunuyu kokuti mughoghi. Uwamwabo uwa muntu umufwe yula amughoghe umuntu umughoghi yula nanti akomana nawe.

²² “ ‘Loli nanti umuntu akumulasa uwamwabo ni chibombelo pachifukwa ichakusita lubengo, loli umwamukosi bulo, pamo amulasa umuntu uwamwabo ukusita ukumuvwamilila,

²³ pakuti atakaba mulwani wache sona atakinon'gona pakumuvulazya, po amutiza nibwe umuntu uwamwabo nukumughogha ukusita ukumwennya,

²⁴ ichilundilo chilongannye pakasi pa muntu umufwe yula nu muntu yuyo mughoghi ukuyana ni ndaghilo zyache.

²⁵ Ichilundilo chimupoke umuntu umughoghi yula munyobe izya wamwabo uwa muntu umufwe, yuyo akulonda pakutanizya, pakumutuma umuntu yula mukaya akakulu nkani akakuponelamo. Umughoghi yula ikale kulakula mupaka umuputi usongo yuyo akapakaziwa na mafuta afwe.

²⁶ Loli nanti umuntu umughoghi yula akudumusannya impaka iya kaya akakulu nkani kako akuponelamo,

²⁷ po uwamwabo uwa mufwe yula nanti amwagha nukumughogha, kokuti atakupalaghula inongwa iya bughoghi.

²⁸ Umuntu umughoghi yula ikalaye mukaya akakulu nkani akakuponelamo mupaka umuputi usongo afwe. Loli nanti umuputi usongo yula afwa, umughoghi yula anganyokela kukwabo.

²⁹ “ ‘Ghanagha ghabanje malamulo sona ni ndaghilo zyinyu mupaka inkulilo zyinyu zyosi izya muntazi kosi kuko mukwiza pakwikalako.

³⁰ “ ‘Nanti umuntu amughogha umuntu uwamwabo, umuntu umughoghi yula aghoghiwanje, pene papo nanti pali abakaboni babili pamo batatu. Loli nayumoyumo umuntu atakaghoghiwanje nanti pali ukaboni weka bulo.

³¹ “ ‘Ukonjelezyapo, umuntu umughoghi atakalipilaye pachifukwa icha nongwa yache. Loli umuntu umughoghi yula naloli aghoghiwanje.

³² “ ‘Nanti umuntu yumo achimbilila ku kaya akakulu nkani akakuponelamo, mutakamwitikizyanje ukuti alipile umwakuti anyokele kunyumba bo umuputi usongo atafuye.

³³ “ ‘Mutakachinyazyanje ichisu chicho mukwikalamo. Ukukupula ibanda kukuchinyazya ichisu, po ni chakwiyipa chitangabikiwa muchisu chicho ibanda lyakupukilamo, ukwefyako ibanda ilya muntu yuyo alikupula.

³⁴ Mutakachinyazyanje ichisu chicho mukwikalamo, pakuti ichisu chinichi cho chicho nkwikalamo. Ane ne Mwene nkwikala pakasi paba Izilayeli.’ ”