Ukubelengiwa 34 - IBAYIBOLO 2024

Impaka iya chisu

¹ U Mwene akamubuzya u Mozesi akati,

² “Ubalamule aba Izilayeli uti, bo mwinjila mu Kenani, ichisu chicho nabapa pakuba mpyana yinyu, impaka yache yo iyi:

³ “Ichigaba icha kuntende icha chisu chinyu impaka yikwandila munkolongo iya Zini mulubazu ulwamumpaka iya Edomu. Impaka iyakubufumilo bwizuba yikwandila kuntende ukwa Nyanja Imfwe.

⁴ Nukulobokela kuntende mupaka kwighamba ilya Akilabimu nukudumusannya munkolongo iya Zini mupaka kumitu ukwa Kadeshi Balineya. Po yikwiza pakubuka ku Hazali Adili mupaka ku Azimoni.

⁵ Kulakula yikwiza pakupetukila ko kukasoko kumpaka iyakumitu iya Ijiputi nukufika ku Nyanja iya Medeteleniya.

⁶ “Impaka yinyu iya kubwinjililo bwizuba yibanje Nyanja iya Medeteleniya. Iyi yo yibanje mpaka yinyu iya kubwinjililo bwizuba.

⁷ “Impaka yinyu iyakumitu yo iyi: Ukwandila ku Nyanja iya Medeteleniya mupaka kwighamba ilya Holi.

⁸ Ukwandila kwighamba ilya Holi, impaka yinyu yikwiza pakufika ku Lebo Hamati mupaka ku Zedadi.

⁹ Impaka yiniyi yikwiza pakufika ku Zifuloni mupaka nukumalila ku Hazali Enani. Iyi yo yibanje mpaka yinyu iyakumitu.

¹⁰ “Impaka yinyu iyakubufumilo bwizuba yikwiza pakwandila ku Hazali Enani nukufika ku Shefamu.

¹¹ Impaka yikwiza pakwika ukwandila ku Shefamu mupaka ku Libila, kubufumilo bwizuba ubwa Ayini, nukwikila ku Nyanja iya Galileya kubufumilo bwizuba.

¹² Impaka yilayila yikite mupaka na mulubazu ulwa lusoko ulwa Yolodani nukumalila ku Nyanja Imfwe. “Iyi yo mpaka iya chisu chinyu.”

¹³ U Mozesi akabalamula aba Izilayeli akati, “Ichi cho chisu chicho mukwiza pakuchigaba pakupanga amayele ukuti chibanje chinyu, chicho u Mwene akalamula pakuzipa inko nayini nu hafu.

¹⁴ Abaluko ulwa Lubeni nulwa Gadi sona nulwa muchigaba chimo icha ba Manase bakaba ukuti bakapokela kale impyana yabo.

¹⁵ Inko zibili izi nu hafu zikapokela impyana kubufumilo ubwa lusoko ulwa Yolodani umwakwenannya nu Yeliko kubufumilo bwizuba.”

Abalongozi babo bakuchigaba ichisu

¹⁶ U Mwene akamubuzya u Mozesi akati,

¹⁷ “Agha gho matabwa agha bantu babo babaghiye pakugaba impaka iya chisu ukuti chibanje mpyana yinyu: Umuputi u Eleyazala nu Yoshwa umwana uwa Nuni.

¹⁸ Musale umulongozi weka uwa luko losi ukuti agabe ichisu chila.

¹⁹ Amatabwa agha bantu banaba gho agha: “Uluko ulwa Yuda, musalemo u Kalebu umwana uwa Yefune.

²⁰ Uluko ulwa Simiyoni musalemo u Shemuwele umwana uwa Amihudi.

²¹ Uluko ulwa Benjamini musalemo u Elidadi umwana uwa Kisiloni.

²² Uluko ulwa Dani musalemo u Buki umwana uwa Yogili.

²³ Uluko ulwa Manase umwana uwa Yosefu musalemo u Haniyeli umwana uwa Efodi.

²⁴ Uluko ulwa Efulayimu musalemo Kemuweli umwana uwa Shifutani.

²⁵ Uluko ulwa Zebuloni muselemo u Elizafani umwana uwa Palanaki.

²⁶ Uluko ulwa Isakala musalemo u Palitiyeli umwana uwa Azani.

²⁷ Uluko ulwa Asheli musalemo u Ahihudi umwana uwa Shelomi.

²⁸ Uluko ulwa Nafutali musalemo u Pedahele, umwana uwa Amihudi.”

²⁹ Banaba bo bantu babo u Mwene akabasala ukuti babagabile aba Izilayeli ichisu icha Kenani.