Ukubelengiwa 33 - IBAYIBOLO 2024

Ubulendo ubwakwepamo mu Ijiputi pakubuka ku Mowabu

¹ Bo aba Izilayeli bakwepamo muchisu icha Ijiputi umwakulongoziwa nu Mozesi nu Aloni.

² U Mwene akamulamula u Mozesi pakusimba amatabwa agha buzilo bosi bubo bakandilagha pabulendo bwabo.

³ Aba Izilayeli bakepamo muchisu icha Ijiputi pisiku ilya 15 ilya mwezi uwakwanda, bo lwachila Ulusekelo ulwa Pasa. Aba Izilayeli bakepamo muchisu chila umwakuhoboka nkani, bo aba Ijiputi bakubennya.

⁴ Pakabalilo kalakala aba Ijiputi bakaba pakusyila abana babo abakatote, babo u Mwene akabaghogha pakasi papabo, pakuti u Mwene akabatanizya abachala babo.

⁵ Pisinda pache aba Izilayeli bakasama ku Lamesesi nukuzenga ivisakasa vyabo ku Sukoti.

⁶ Bakasamako ku Sukoti nukuzenga ivisakasa vyabo ku Etamu, akaya akakulu kako kakaba mulubazu ulwankolongo.

⁷ Bakasamako ku Etamu nukunyokela sona ku Pi Hahiloti kubufumilo bwizuba ubwa Baala Zefoni nukuzenga ivisakasa vyabo papipi nu Migidoli.

⁸ Bakasamako ku Pihaloti nukulobokela pakasi na pakasi panyanja nukufika munkolongo. Bo benda ubulendo munkolongo iya Etamu amasiku matatu, bakazenga ivisakasa vyabo ku Mala.

⁹ Bakasamako ku Mala nukubuka ku Elimu, kuko kukaba imbwibwi 12 izya mizi, sona na makwi agha mabale 70, po bakazenga ivisakasa vyabo palapala.

¹⁰ Bakasamako ku Elimu nukuzenga ivisakasa vyabo papipi ni Nyanja Inchesamu.

¹¹ Bakepapo pa Nyanja Inchesamu nukuzenga ivisakasa vyabo munkolongo iya Sini

¹² Bakepamo munkolongo iya Sini nukuzenga ivisakasa vyabo ku Dofika.

¹³ Bakasamako ku Dofika nukuzenga ivisakasa vyabo ku Alushi.

¹⁴ Bakasamako ku Alushi nukuzenga ivisakasa vyabo ku Lefidimu, kuko kutakabako amizi aghakung'wela.

¹⁵ Bakasamako ku Lefidimu nukuzenga ivisakasa vyabo munkolongo iya Sinayi.

¹⁶ Bakepamo munkolongo iya Sinayi nukuzenga ivisakasa vyabo munkolongo iya Kibuloti Hatava.

¹⁷ Bakepamo munkolongo iya Kibuloti Hatava nukuzenga ivisakasa vyabo ku Hazeloti.

¹⁸ Bakasamako ku Hazeloti nukuzenga ivisakasa vyabo ku Litima.

¹⁹ Bakasamako ku Litima nukuzenga ivisakasa vyabo ku Limoni Pelezi.

²⁰ Bakasamako ku Limoni Pelezi nukuzenga ivisakasa vyabo ku Libina.

²¹ Bakasama ku Libina nukuzenga ivisakasa vyabo ku Lisa.

²² Bakasamako ku Lisa nukuzenga ivisakasa vyabo ku Kehelata.

²³ Bakasamako ku Kehelata nukuzenga ivisakasa vyabo pighamba ilya Sefela.

²⁴ Bakepapo pighamba ilya Sefela nukuzenga ivisakasa vyabo ku Halada.

²⁵ Bakasamako ku Halada nukuzenga ivisakasa vyabo ku Makeloti.

²⁶ Bakasamako ku Makeloti nukuzenga ivisakasa vyabo ku Tahati.

²⁷ Bakasamako ku Tahati nukuzenga ivisakasa vyabo ku Tela.

²⁸ Bakasamako ku Tela nukuzenga ivisakasa vyabo ku Mitika.

²⁹ Bakasamako ku Mitika nukuzenga ivisakasa vyabo ku Hasimona.

³⁰ Bakasamako ku Hasimona nukuzenga ivisakasa vyabo ku Moseloti.

³¹ Bakasamako ku Moseloti nukuzenga ivisakasa vyabo ku Bene Yakani

³² Bakasamako ku Bene Yakani nukuzenga ivisakasa vyabo ku Holi Hagidigadi.

³³ Bakasamako ku Holi Hagidigadi nukuzenga ivisakasa vyabo ku Jotibata.

³⁴ Bakasamako ku Jotibata nukuzenga ivisakasa vyabo ku Abolona.

³⁵ Bakasamako ku Abolona nukuzenga ivisakasa vyabo ku Eziyoni Gebeli.

³⁶ Bakasamako ku Eziyoni Gebeli nukuzenga ivisakasa vyabo munkolongo iya Zini (chicho chikung'anamula ukuti Kadeshi).

³⁷ Bakepamo munkolongo iya Zini nukuzenga ivisakasa vyabo pighamba ilya Holi mulubazu lwachisu icha Edomu.

³⁸ Bo u Mwene amulamula, umuputi u Aloni akakwela pighamba ilya Holi, po akafwila palapala pisiku ilyakwanda ilya mwezi uwafayivi uwa mwaka uwa 14, bo aba Izilayeli bepamo mu Ijiputi.

³⁹ U Aloni akafwila pighamba ilya Holi, bo ali na maka 123.

⁴⁰ U Mwene uwaku Aladi, umu Kenani, yuyo akikalagha kuntende ukwa Kenani, akivwa ukuti aba Izilayeli bakwiza.

⁴¹ Pakabalilo kanaka aba Izilayeli bakepapo pighamba ilya Holi nukuzenga ivisakasa vyabo ku Zalimona.

⁴² Bakasamako ku Zalimona nukuzenga ivisakasa vyabo ku Punoni.

⁴³ Bakasamako ku Punoni nukuzenga ivisakasa vyabo ku Oboti.

⁴⁴ Bakasamako ku Oboti nukuzenga ivisakasa vyabo ku Iye Abalimu mu Mowabu.

⁴⁵ Bakasamako ku Iyimu Abalimu nukuzenga ivisakasa vyabo ku Diboni Gadi.

⁴⁶ Bakasamako ku Diboni Gadi nukuzenga ivisakasa vyabo ku Alimoni Dibulatayimu

⁴⁷ Bakasamako ku Alimoni Dibulatayimu nukuzenga ivisakasa vyabo kumaghamba agha Abalimu papipi ni ghamba ilya Nebo.

⁴⁸ Bakepapo pighamba ilya Abalimu nukuzenga ivisakasa vyabo mwikombe ilya Mowabu mulubazu ulwa lusoko ulwa Yolodani mu Yeliko.

⁴⁹ Kulakula aba Izilayeli bakazenga ivisakasa vyabo mulubazu ulwa lusoko ulwa Yolodani ukwandila ku Beti Yeshimoti mupaka ku Abeli Shitimu mwikombe ilya Mowabu.

Nizya kubapota aba Kenani

⁵⁰ U Mwene akamubuzya u Mozesi mwikombe ilya Mowabu papipi nu lusoko ulwa Yolodani umwakwenannya nu Yeliko akati,

⁵¹ Ubalamule aba Izilayeli uti, “Bo mukuloboka ulusoko ulwa Yolodani ukwinjila mu Kenani,

⁵² mubachimbizyemo abanekaya bosi babo bakwikala mulamula. Mubanangannye abachala babo bosi abakubiza, mumongolannye ivifwani vyabo ivya mabwe, sona mubumongolannye ubuzilo bwabo bosi ubwakwiputilamo mumaghamba.

⁵³ Muchifyule ichisu chabo nukwikala mulamula, pakuti nabapacho ukuti chibanje chinyu.

⁵⁴ Muchigabe ichisu ukuyana ninko zyinyu pakupanga amayele. Uluko ulukulu mulupe ubuzilo ubukulu, sona uluko ulunandi mulupe ubuzilo ubunandi. Ichisu chosi chicho amayele ghawila chibanje chabo. Muchigabe ichisu chinichi ukuyana nuluko lwabanyenya binyu.

⁵⁵ “Loli nanti mutakubachimbizyamo abenekaya muchisu chila, po abantu babo mukubaleka mulamula, bakwiza pakuba ngati ko kapato mumaso ghinyu, sona ngati gho mivwa mukasi. Bakwiza pakubatamya muchisu chicho mukwiza pakwikalamo.

⁵⁶ Panapo nkwiza pakubabombela amwe zizyo nkabatika pakubabombela abantu banaba.”