Ukubelengiwa 32 - IBAYIBOLO 2024

Inko izya kubufumilo bwizuba ubwa Yolodani

¹ Uluko ulwa Lubeni nulwa Gadi lukaba ni vitekwa ivyinji nkani po bakachennya ichisu icha Yazeli ni cha Giliyadi ukuti chikaba chiza pakudimilamo ing'ombe zyabo.

² Bakamubuzya u Mozesi nu muputi u Eleyazala, sona na balongozi aba chilundilo chila

³ bakati, “Akaya aka Ataloti nakaya aka Diboni naka Yazeli naka Nimila naka Heshiboni naka Eleyale naka Shibimi naka Nebo sona naka Bewone,

⁴ ichisu chicho u Mwene akabapotelamo aba Izilayeli, cho chisu ichiza pakudimilamo ivitekwa. Po aswe twe babombi binyu tuli ni vitekwa ivinji nkani.

⁵ Nanti mwatupelela ichisa, mubape ababombi binyu ichisu chinichi pakuba mpyana yabo, mutakatulobosezye kwisila ilya Yolodani.”

⁶ Loli u Mozesi akabalalusya aba Gadi naba Lubeni akati, “Nkimba mukulonda ukwikala pano bo aba Izilayeli abamwinyu bakubuka kubwite?

⁷ Nkimba choni chicho ukubawisya amaka aba Izilayeli pakuloboka ulusoko ulwa Yolodani ukuti binjile muchisu chicho u Mwene akabapa?

⁸ Ichi cho chicho abanyenya bakabomba bo nkubatuma muchisu icha Kadeshi Balineya pakuchennya ichisu.

⁹ Bo abene babuka mupaka kwikombe ilya Eshikolo nukuchennya ichisu bakabawisya amaka aba Izilayeli pakwinjilamo muchisu chicho u Mwene akabapacho.

¹⁰ Pisiku lilalila u Mwene akakalala, akalapa ichilapo akati,

¹¹ ‘Pachifukwa ichakuti atalipo nayumo umuntu uwakwepamo mu Ijiputi, ukufuma abamaka 20 pamo ukuchilapo, babo bakwiza pakuchennya ichisu chicho nkafinga ukumupa u Abulahamu nu Yisaki, sona nu Yakobo, pakuti batankonkite nu moyo ghosi.

¹² Atalipo nayumoyumo yuyo akwiza pakuchennya ichisu chila, loli mwene u Kalebu umwana uwa Yefune, umu Keni, sona nu Yoshwa umwana uwa Nuni, pachifukwa ichakuti bakamukonka u Mwene nu moyo wabo ghosi.’

¹³ U Mwene akabakalalila abantu nukubapela pakwendakwenda munkolongo amaka 40 mupaka inkulilo yosi yiyo yikabomba ivintu ivibibi pamaso pa Mwene yikazimila.

¹⁴ “Losi ulu mwasenda ubuzilo ubwa banyenya binyu aba nkulilo iya bantu ababibi, sona bakulonda nkani pakonjelezya ubukali pa Mwene uwa ba Izilayeli.

¹⁵ Pakuti nanti mwaleka pakumukonka, wepe akwiza pakubaleka abantu bosi banaba munkolongo, sona mukwiza pakuba ninongwa iyakunanganika kwabo.”

¹⁶ Po bakiza kwa Mozesi nukumubuzya ukuti, “Tukulonda ukuti mutwitikizye ukuti tuzenge kuno ivibagha ivya ng'ozi zyitu, sona nutwaya utukulu nkani utwa bana bitu ukuti bikalayemo.

¹⁷ Loli tukwiza pakuvwala ivilwilo ivya bwite nukubalongolela aba Izilayeli mupaka tubafisye pabuzilo bwabo. Pakabalilo kanaka abana bitu bakwiza pakwikalagha mutwaya utwa malinga, pachifukwa icha kubanyila abantu aba muchisu chinichi.

¹⁸ Tutakwiza pakubwela mupaka umu Izilayeli wesi asende impyana yache.

¹⁹ Aswe tutakwiza pakupokelapo nabo impyana kwisila ilya lusoko ulwa Yolodani, pachifukwa chakuti twapokela impyana yitu kubufumilo ubwa lusoko ulwa Yolodani.”

²⁰ Po u Mozesi akababuzya akati, “Nanti mukubomba bunubu, kokuti mukwiza pakuvwala ivilwilo ivyakulwila ubwite pamaso pa Mwene.

²¹ Umuntu wesi asende ivilwilo ivya bwite nukuloboka ulusoko ulwa Yolodani pamaso pa Mwene mupaka papo Mwene abachimbizyapo abalwani pantazi papabo.

²² Nanti ichisu chapotiwa pamaso pa Mwene, po pisinda pache mungabwela babuke, bo mute ninongwa pamaso pa Mwene sona naba Izilayeli, po ichisu chila chikwiza pakuba mpyana yinyu pamaso pa Mwene.

²³ “Loli nanti mwapotwa pakubomba zinizi, kokuti mukwiza pakumunangila u Mwene, pakuti ukupuvya kwinyu kukwiza pakubakonka.

²⁴ Bazengele abana binyu utwaya utukulu nkani, ni vibagha ivya ng'ozi zyinyu, loli mubombe zizyo mwalayizya.”

²⁵ Po aba Gadi naba Lubeni bakamubuzya u Mozesi bakati, “Aswe twe babombi bako tukwiza pakubomba zizyo u Mwene witu akulamula.

²⁶ Abana bitu na bachi bitu ni ng'ombe, sona ni ng'ozi zyitu vikwiza pakusyala mukaya aka Giliyadi aka.

²⁷ Loli twe babombi binyu tukwiza pakuloboka, umuntu wesi asende ivilwilo ivya bwite ukumulwila ubwite u Mwene ukuyana bulo namumo u Mwene wane alamulila.”

²⁸ Po u Mozesi akamulamula u Eleyazala nu Yoshwa sona na balongozi abanji aba Izilayeli

²⁹ akati, “Nanti aba Gadi naba Lubeni, umuntu wesi yuyo angalwa ubwite pamaso pa Mwene aloboke poka namwe ulusoko ulwa Yolodani, sona nanti ichisu chila chapotiwa. Po mubape aba Gadi naba Lubeni ichisu icha Giliyadi pakuba mpyana yabo.

³⁰ Loli nanti batakuloboka poka namwe, bo basendite ivilwilo ivya bwite, po bapokele impyana poka namwe muchisu icha Kenani.”

³¹ Aba Gadi naba Lubeni bakamula bakati, “Aswe twe babombi binyu tukwiza pakubomba zizyo u Mwene atulamula.

³² Tukwiza pakuloboka nukwinjila mu Kenani pamaso pa Mwene, bo tunyamuye ivilwilo ivya bwite. Loli impyana yiyo twapokela yikwiza pakuba kunuku kwisila ilya lusoko ulwa Yolodani.”

³³ Po u Mozesi akabapa aba Gadi, naba Lubeni, sona ni chigaba chimo icha luko ulwa manase umwana uwa Yosefu, ichisu icha Sihoni u mwene uwa ba Amoli sona ni chisu icha Ogi u mwene uwa mu Bashani, poka nutwaya tosi utukulu, ukonjelezyapo ni vyisu vyosi vivyo vibazyunguliye.

³⁴ Po aba Gadi bakazenga akaya akakulu aka Diboni naka Ataloti sona naka Aloyeli.

³⁵ Akaya aka Atiloti Sofani naka Yazeli naka Yogibeha

³⁶ naka Beti Nimula sona naka Beti Halani. Utwaya tosi tunutu tukaba tukafu na malinga, sona bakazengamo ivibagha vyabo ivya ng'ozi.

³⁷ Po aba Lubeni bakazenga akaya akakulu nkani aka Heshiboni naka Eleyale naka Kiliyatayimu

³⁸ na Nebo naka Baala Meyoni Itabwa linili bakalyandula pakuba Sibima. Bakatwita utwaya utukulu nkani tuto bakatuzenga sona.

³⁹ Abaluko ulwa Makili umwana uwa Manase bakachifyula ichisu icha Giliyadi nukubachimbizyamo aba Amoli babo bakaba mulamula.

⁴⁰ Po u Mozesi akamupa u Makili umwana uwa Manase ichigaba icha chisu icha Giliyadi nukwikala mulamula.

⁴¹ U Yayili uwaluko ulwa manase akafyula utwaya tumo nukutwita ukuti, “Utwaya utwa Yayili.”

⁴² U Noba akakafyula akaya aka Kenati nutwaya twache utupalamani nukukita ni tabwa lyache ukuti Noba.