Ukubelengiwa 31 - IBAYIBOLO 2024

Aba Izilayeli bakubapota aba Midiyani

¹ U Mwene akamulamula u Mozesi akati,

² “Ubafunde aba Midiyani pachifukwa icha zizyo bakababombela aba Izilayeli. Pisinda pache awe ukwiza pakufwa.”

³ Po u Mozesi akababuzya aba Izilayeli akati, “Musale abanavuli bamo pakasi papinyu nukubuka pakulwa ubwite naba Midiyani, umwakuti u Mwene abatanizye.

⁴ Mutume abanavuli 1,000 pakasi paba Izilayeli ukuyana nuluko lwabo.”

⁵ Po bakasala abanavuli 1,000 pakasi paba Izilayeli ukuyana nuluko lwabo, po bosi poka bakabapo abanavuli 12,000.

⁶ U Mozesi akabatuma abanavuli bala babo bakasaliwa ukuyana nuluko lwabo pakulwa ubwite. Akabatuma poka nu Finehasi umwana uwa umuputi u Eleyazala, yuyo akanyamula ivibombelo ivya Mubuzilo Ubuzelu, sona na mapati aghakubasokela abantu.

⁷ Aba Izilayeli bakalwa ubwite bula naba Midiyani ukuyana namumo u Mwene akamulamulila u Mozesi nukubaghogha bosi.

⁸ Abamwene fayivi aba ba Midiyani babo bakabaghogha bakaba bo aba: U Evi nu Lekemu nu Zuli nu Huli sona nu Leba sona bakabaghogha abantu babo bosi. Bakamughogha wepe nu Balamu umwana uwa Bewoli.

⁹ Aba Izilayeli bakabalema abazya abakolo na bana aba ba Midiyani. Bakafyula sona ing'ombe zyabo ni ng'ozi sona bakavifyula ni vintu vyabo vyosi.

¹⁰ Bakocha utwaya tosi utwa ba Midiyani, poka ni visakasa vyabo.

¹¹ Bakasenda ivintu vivyo bakafyula kubwite, ukonjelezya pa abantu ni vitekwa

¹² nukwiza navyo kwa Mozesi nu muputi u Eleyazala, sona na kuchilundilo icha ba Izilayeli, babo bakaba muvisakasa vyabo mwikombe ilya Mowabu, papipi nu lusoko ulwa Yolodani umwakwenannya nakaya aka Yeliko.

Ababwite bakunyokela

¹³ U Mozesi nu muputi u Eleyazala, poka na balongozi bosi aba chilundilo bakafuma kuzi ukwa visakasa pakukomana nabo.

¹⁴ U Mozesi akabakalalila abasongo aba basilikali babo bakabenelezyanga abasilikali amasabuzani, babo bakanyokela kubwite.

¹⁵ Po akabalalusya akati, “Nkimba choni chicho mwabaleka bumi abakolo bosi?

¹⁶ Pakuti abakolo banaba bo babo bakakonka amahala agha Balamu, nukubapuvya aba Izilayeli ukuti batakabe basubiliwa kwa Mwene ku Pewoli, umwakuti ichiwaya chikabawila.

¹⁷ Losi ulu mubaghoghe abalumendo bosi nukubaghogha abakolo bosi babo baghonitepo nu mwanavuli.

¹⁸ Loli mubasunge bumi abalindu bosi babo bataghonitepo nalumo nu mwanavuli.

¹⁹ “Po umuntu wesi yuyo aghogha umuntu pamo uwakupalamasya umuvimba pakasi papinyu, ikale kuzi ukwa visakasa amasiku seveni. Pisiku ilyabutatu nilyaseveni, amwe na bazya binyu mwiswefye mwebene.

²⁰ Mughaswefye amenda ghosi poka ni vintu vyosi ivya makwela na meya agha mbuzi sona ni chintu chosi icha makwi.”

²¹ Po u Eleyazala umuputi akababuzya abasilikali babo bakabuka kubwite akati, “Ulu lo lulaghilo lulo u Mwene akamupa u Mozesi.

²² Ivintu vyosi ivya golide nivya siliva nivya mukuba nivya chela nivya waya sona nivya mutovu,

²³ vyosi vivyo vitangapya numoto, viswefiwanje numoto po vikwiza pakuswepa. Loli vibaghiye pakuswefiwa sona na mizi sona ivintu vyosi vingapya numoto, muviswefye na mizi ghala.

²⁴ Pisiku ilyaseveni muchape amenda ghinyu, po mukwiza pakuswepa. Pisinda pache munginjila muvisakasa.”

Ukugabana vintu vivyo bakafyula kubwite

²⁵ U Mwene akamubuzya u Mozesi akati,

²⁶ “Awe poka nu muputi u Eleyazala, na balongozi aba chilundilo, mubelenge ivintu vyosi vivyo mukavifyula kubwite, ukonjelezyapo ivinyamana, sona na bantu bosi babo babalemite.

²⁷ Muvigabe Pabili umwakuyana bulo ivintu vivyo mukafyula pakasi pabasilikali, babo bakabuka kubwite ni chilundilo chosi.

²⁸ Pa chigaba icha basilikali, musabulepo ichigaba choka pavigaba 500 vyosi nukumupa u Mwene. Musende sona ichigaba choka pavigaba 500 icha bazya ni ng'ombe ni mpunda ni ng'ozi sona ni mbuzi.

²⁹ Sendapo pachigaba icha basilikali nukumupa umuputi u Eleyazala ukuti vibanje vyakwiyipa vyinyu kwa Mwene.

³⁰ Pa chigaba icha ba Izilayeli, usendeko ichintu choka pavintu 50 vyosi, manyi bazya manyi ng'ombe manyi mpunda manyi ng'ozi manyi mbuzi. Mubape aba Levi babo bali ni mbombo iyakusungilila Ichisakasa icha Mwene.”

³¹ Po U Mozesi nu muputi u Eleyazala bakabomba vivyo u Mwene akamulamula u Mozesi.

³² Ivintu ivyakusyalako ivya vintu vivyo abasilikali bakavifyula vikaba vyo ivi: Ing'ozi zikabapo 675,000

³³ ing'ombe zikabapo 72,000.

³⁴ Impunda zikabapo 61,000

³⁵ sona abalindu babo bataghonitepo nalumo na banavuli bakabapo 32,000.

³⁶ Ichigaba icha basilikali babo bakabuka kubwite chikapeghiwa ing'ozi 337,500,

³⁷ po ing'ozi 675 zikaba chigaba icha Mwene.

³⁸ Pakabapo ing'ombe 36,000, po ing'ombe 72 zikaba chigaba icha Mwene.

³⁹ Pakabapo impunda 30,500, po impunda 61 zikaba chigaba icha Mwene.

⁴⁰ Pakabapo abantu 16,000, po abantu 32 bakaba chigaba icha Mwene.

⁴¹ U Mozesi akamupa umuputi u Eleyazala ichigaba chicho chikaba chakuti chibikiwe kwa Mwene ukuyana namumo u Mwene akamulamulila u Mozesi.

⁴² U Mozesi akagaba pakasi ivintu vivyo bakavifyula kubwite nukubapa aba Izilayeli.

⁴³ Po aba Izilayeli bakapeghiwa ing'ozi 337,500

⁴⁴ Ing'ombe zikabapo 36,000.

⁴⁵ Impunda zikabapo 453,500.

⁴⁶ Po abantu bosi bakabapo 16,000.

⁴⁷ Pa chigaba icha ba Izilayeli, u Mozesi akasendapo ichigaba chosi pavigaba 50 ivya bantu ni vinyamana nukubapa aba Levi, babo bakaba ni mbombo iyakusungilila Ichisakasa icha Mwene ukuyana namumo u Mwene akabalamulila.

⁴⁸ Po abasongo aba basilikali babo bakabenelezyanga abasilikali bosi, kokuti abasongo aba abasilikali ama 1,000, na basongo aba basilikali ama 100, bakiza kwa Mozesi.

⁴⁹ Bakamubuzya bakati, “Twababelenga abasilikali bosi babo bali pasi pabulaghili bwitu, sona atalipo nayumo yuyo asobelitepo.

⁵⁰ Po twiza ni vyakwiyipa kwa Mwene ngati ugolide ni vibangili ni mpete izya muvinama ni ndelebele sona na mambo ukuti chibanje chakwiyipa ichakupepesezya mbibi zyitu pamaso pa Mwene.”

⁵¹ U Mozesi nu muputi u Eleyazala bakapokela ugolide uwa balongozi bala poka ni vintu vyabo vyosi vivyo bakiza navyo.

⁵² Ubung'wamu ubwa golide yuyo abasongo aba basilikali amasabuzani bakabika, bukaba amakilogalamu 200.

⁵³ Abantu bosi bala bakabuka ku basilikali, umuntu wesi akasendapo ivyache nukubuka navyo.

⁵⁴ Po u Mozesi nu Eleyazala umuputi akapokela ugolide uwa basongo aba basilikali ama 1,000 na ma 100 nukumubika mu Chisakasa icha Mwene pakuba chakukumbukilapo aba Izilayeli pamaso pa Mwene.