Ukubelengiwa 30 - IBAYIBOLO 2024

Indaghilo izyakunena nizya chilapo

¹ U Mozesi akabapa abalongozi aba inko izya ba Izilayeli indaghilo izyakuti:

² Nanti umwanavuli akulapa ichilapo chimo kwa Mwene, pamo nanti ukulapa ukuti akwiza pakukwanilisya ichilapo chache, atakachinangannye ichilapo chache.

³ Nanti umulindu yuyo akwikala munyumba iya wise akulapa chimo kwa Mwene, pamo nanti akulapa ukuti akwiza pakukwanilisya ichilapo chache,

⁴ po uwise ivwa nizya chilapo icha mulindu yula, pamo chicho afinga, loli nanti uwise atakunena nachimochimo, po umulindu yula akwanilisye ichilapo chache.

⁵ Loli nanti uwise ivwa, po akumukanizya, umulindu yula atakwiza pakukwanilisya ichilapo chache, pamo ilayizyo lyache. U Mwene akwiza pakumuhobokela umulindu yula pachifukwa ichakuti uwise akamukanizya.

⁶ Nanti umukolo alapa, pamo alayizya umwakusita ukwinong'ona tasi, ukuti akwiza pakukwanilisya ichilapo, pamo ulufingo lwache, sona pisinda pache akusendwa,

⁷ po nanti umulume ivwa zinizi, loli atakunenapo nachimochimo, umukolo yula akwanilisye ichilapo chache.

⁸ Loli nanti umulume akumukanizya bo ivwa zinizi, kokuti umulume amusatuye umukolo yula kuchilapo chache, sona ku vivyo akanena umwakusita ukwinong'ona tasi, po u Mwene akwiza pakumuhobokela.

⁹ “Loli nanti umukolo umufwilwe pamo yuyo asokite akulapa ichilapo, kokuti akwanilisye ichilapo chache, pamo lufingo lwache.

¹⁰ “Nanti umukolo yuyo asendizwe akulapa ichilapo pamo akufinga ulufingo,

¹¹ po nanti umulume ivwa zinizi, loli atakunenapo nachimochimo sona atakumukanizya, kokuti akwanilisye ichilapo chache pamo ulufingo lwache.

¹² Loli nanti umulume akumukanizya bo ivwa zinizi, ukukwanilisya ichilapo chila, umukolo yula atabaghiye pakukwanilisya, u Mwene akwiza pakumuhobokela pachifukwa ichakuti umulume akamukanizya ukukwanilisya ichilapo chila.

¹³ Umulume ali na maka aghakusimikizya pamo aghakukanila ichilapo pamo ulufingo lula.

¹⁴ Loli nanti umulume atakunena nachimochimo pakabalilo kako akughivwa amazyu ghanagha, bo akumwitikizya ivilapo pamo ifingo zyosi zizyo akafinga. Abaghiye pakukwanilisya zyosi zizyo akafinga.

¹⁵ Loli nanti umulume akumukanizya, bo pachilapo akabalilo, bo ivwa zinizi, sona nanti chimo chibibi chamuwila umukolo yula pachifukwa icha chilapo chache, kokuti umulume weyuyo afundiwanje.”

¹⁶ Agha gho malamulo ghagho u Mwene akamupa u Mozesi aghakunena nizya mulume pamo umuchi, sona aghakunena nizya wise nu mwana wache umulindu, yuyo akwikala munyumba iya wise.