Ukubelengiwa 29 - IBAYIBOLO 2024

Ivyakwiyipa ivya palusekelo ulwa Mwaka Umupya

¹ Pisiku ilyakwanda ilya mwezi uwaseveni mubanje nulukomano uluzelu ulwa chiputo, sona mutakabombaye imbombo izya isiku ni siku. Pisiku lilalila mulizyanje amapati.

² Mubikaye inkambaku inyana poka nu dubi weka, sona nu twadubi seveni utwamwaka ghoka, tuto tute ni chilema nachimochimo ukuti chibanje chakwiyipa ichakocha kwa Mwene, chicho umunusi wache ghukumuhobosya u Mwene.

³ Mubikaye inkambaku yila poka ni chakwiyipa icha busu ubutinye ubwakukwana amakilogalamu matatu ubwakongannya na mafuta agha misyunguti, sona mubikaye udubi poka na makilogalamu mabili,

⁴ sona mubikaye umwana uwa ng'ozi wesi poka nu busu ubwakukwana ikilogalamu lyoka.

⁵ Mubikaye sona usabwe weka ukuti abanje chakwiyipa ichakupepesezya imbibi izya bantu.

⁶ Mubikaye vinivi ukonjelezya pa chakwiyipa ichakocha icha isiku ilyakwanda ilya mwezi, sona ni chakwiyipa icha isiku ni siku, poka ni chakwiyipa icha busu, sona ni chakwiyipa icha vinyo ukuyana nu lulaghilo lwache, ukuti chibanje chakwiyipa chicho umunusi wache ghukumuhobosya u Mwene.

Ivyakwiyipa ivya Isiku Ilyakupepesezya imbibi

⁷ Pisiku ilya 10 ilya mwezi uwaseveni mubanje nulukomano uluzelu ulwa chiputo, mutuzyanje pakulya. Mutakabombaye imbombo zyinyu izya isiku ni siku.

⁸ Mubikaye inkambaku yoka nu dubi weka, sona nu twadubi seveni utwa mwaka ghoka tuto tute ni chilema nachimochimo ukuti chibanje chakwiyipa ichakocha chicho umunusi wache ghukumuhobosya u Mwene.

⁹ Mubikaye inkambaku yila, poka ni chakwiyipa icha busu ubutinye ubwakukwana amakilogalamu matatu ubwakongannya na mafuta agha misyunguti, mubikaye sona udubi yula poka na makilogalamu mabili.

¹⁰ Mubikaye umwana uwa ng'ozi wesi poka nu busu ubwakukwana ikilogalamu lyoka.

¹¹ Mubikaye sona usabwe weka ukuti chibanje ichakupepesezya imbibi izya bantu, ukonjelezya pa chakwiyipa ichakocha icha isiku ni siku, poka ni chakwiyipa icha busu, sona ni chakwiyipa icha vinyo.

Ivyakwiyipa ivya pa Lusekelo ulwa Visakasa

¹² Pisiku ilya 15 ilya mwezi uwaseveni, mubanje nulukomano uluzelu ulwa chiputo, sona mutakabombaye imbombo zyinyu izya isiku ni siku. Mubanje nu lusekelo ulwa Mwene amasiku seveni.

¹³ Pisiku lilalila mubikaye ichakwiyipa ichakocha chicho umunusi wache ghukumuhobosya u Mwene. Mubikaye inkambaku 13, na basabwe babili, sona nu twadubi 14 utwa mwaka ghoka tuto tute ni chilema nachimochimo.

¹⁴ Mubikaye inkambaku yosi poka ni chakwiyipa icha busu ubwakukwana amakilogalamu matatu ubwakongannya na mafuta, mubikaye sona udubi wesi poka na makilogalamu mabili.

¹⁵ Mubikaye umwana uwa ng'ozi wesi poka nu busu ubwakukwana ikilogalamu lyoka.

¹⁶ Mubikaye sona usabwe weka ukuti chibanje chakwiyipa chakupepesezya imbibi, ukonjelezya pa chakwiyipa ichakocha icha isiku ni siku, poka ni chakwiyipa icha busu, sona ni chakwiyipa icha vinyo.

¹⁷ Pisiku ilyabubili mubikaye inkambaku 12, na basabwe babili, sona nu twadubi 14 utwa mwaka ghoka tuto tute ni chilema nachimochimo.

¹⁸ Mubikaye inkambaku na badubi, sona nu twadubi tula, poka ni chakwiyipa icha busu, ni chakwiyipa icha vinyo ukuyana nu bwinji ubwa vinyamana vila.

¹⁹ Mubikaye sona usabwe weka ukuti chibanje chakwiyipa ichakupepesezya imbibi, ukonjelezya pa chakwiyipa ichakocha icha isiku ni siku, sona ni chakwiyipa icha busu, poka ni vyakwiyipa vyabo ivya vinyo.

²⁰ Pisiku ilyabutatu mubikaye inkambaku 11, na badubi babili, sona nu twadubi 14 utwamwaka ghoka, tuto tute ni chilema nachimochimo.

²¹ Mubikaye inkambaku na badubi, sona nu twadubi tula, poka ni chakwiyipa icha busu, ni chakwiyipa icha vinyo ukuyana nu bwinji ubwa vinyamana vila.

²² Mubikaye sona usabwe ukuti chibanje chakwiyipa ichakupepesezya imbibi ukonjelezya pa chakwiyipa ichakocha icha isiku ni siku, ni chakwiyipa icha busu, sona ni chakwiyipa icha vinyo.

²³ Pisiku ilyafolo mubikaye inkambaku 10, na badubi babili, sona nu twadubi 14 utwa mwaka ghoka tuto tute ni chilema nachimochimo.

²⁴ Mubikaye inkambaku na badubi, sona nu twadubi tula, poka ni chakwiyipa icha busu, ni chakwiyipa icha vinyo ukuyana nu bwinji ubwa vinyamana vila.

²⁵ Mubikaye sona usabwe weka ukuti chibanje chakwiyipa chakupepesezya imbibi ukonjelezya pa chakwiyipa ichakocha icha isiku ni siku, poka ni chakwiyipa icha busu, sona ni chakwiyipa icha vinyo.

²⁶ Pisiku ilyafayivi mubikaye inkambaku nayini, na badubi babili, sona nu twadubi 14 utwa mwaka ghoka, tuto tute ni chilema nachimochimo,

²⁷ Mubikaye inkambaku na badubi, sona nu twadubi tula, poka ni chakwiyipa icha busu, ni chakwiyipa icha vinyo ukuyana nu bwinji ubwa vinyamana vila.

²⁸ Mubikaye sona usabwe ukuti chibanje chakwiyipa ichakupepesezya imbibi, ukonjelezya pa chakwiyipa ichakocha icha isiku ni siku ni chakwiyipa icha busu poka ni chakwiyipa icha vinyo.

²⁹ Pisiku ilyasikisi mubikaye inkambaku eyiti na badubi babili sona nu twadubi 14 utwa mwaka ghoka, tuto tute ni chilema nachimochimo.

³⁰ Mubikaye inkambaku na badubi, sona nu twadubi tula, poka ni chakwiyipa icha busu, ni chakwiyipa icha vinyo ukuyana nu bwinji ubwa vinyamana vila.

³¹ Mubikaye sona usabwe ukuti chibanje chakwiyipa ichakupepesezya imbibi, ukonjelezya pa chakwiyipa ichakocha icha isiku ni siku ni chakwiyipa icha busu poka ni chakwiyipa icha vinyo.

³² Pisiku ilyaseveni mubikaye inkambaku seveni na badubi babili, sona nu twadubi 14 utwa mwaka ghoka, tuto tute ni chilema nachimochimo.

³³ Mubikaye inkambaku na badubi, sona nu twadubi tula, poka ni chakwiyipa icha busu, ni chakwiyipa icha vinyo ukuyana nu bwinji ubwa vinyamana vila.

³⁴ Mubikaye sona usabwe weka ukuti chibanje chakwiyipa ichakupepesezya imbibi, ukonjelezya pa chakwiyipa ichakocha icha isiku ni siku, ni chakwiyipa icha busu, poka ni chakwiyipa icha vinyo.

³⁵ Pisiku ilya eyiti mubanje nulukomano ulupaghuliwa ulwa chiputo, sona mutakabombaye imbombo zyinyu izya isiku ni siku.

³⁶ Mubikaye inkambaku yoka nu dubi weka, sona nu twadubi seveni utwa mwaka ghoka tuto tute ni chilema nachimochimo pakuba ichakwiyipa ichakocha, chicho umunusi wache ghukumuhobosya u Mwene.

³⁷ Mubikaye sona ichakwiyipa icha busu ni chakwiyipa icha vinyo poka ni nkambaku nu dubi sona nu twadubi ukuyana nu bwinji ubwa vinyamana vila.

³⁸ Mubikaye sona usabwe ukuti chibanje chakwiyipa ichakupepesezya imbibi, ukonjelezya pa chakwiyipa ichakocha icha isiku ni siku ni chakwiyipa icha busu poka ni chakwiyipa icha vinyo.

³⁹ Ivi vyo vivyo mubaghiye pakubika kwa Mwene mumasiku amasaliwa agha lusekelo, ukonjelezya pa vyakwiyipa vyinyu ivya chilapo sona nivya bwighane bwinyu ukuti chibanje chakwiyipa ichakocha ni chakwiyipa icha busu ni cha vinyo sona ni chakwiyipa ichabupoka.

⁴⁰ Po u Mozesi akababuzya aba Izilayeli vyosi vivyo u Mwene akamulamula.