Ukubelengiwa 28 - IBAYIBOLO 2024

Ivyakwiyipa ivya isiku ni siku

¹ U Mwene akamubuzya u Mozesi akati,

² “Ubalamule aba Izilayeli, sona ubabuzye uti, ‘Mwenelezye ukuti mukubika pakabalilo kache ivyakulya ukuti chibanje chakwiyipa ichakocha, chicho umunusi wache ghukumuhobosya u Mwene.’ ”

³ Ubabuzye sona uti, “Ichi cho chakwiyipa chicho mubikaye kwa Mwene utwana utwadubi tubili utwa mwaka ghoka tuto tute ni chilema nachimochimo ukuti tubanje chakwiyipa ichakocha icha isiku ni siku.

⁴ Pandabindabi mubikaye umwana uwa ng'ozi weka, sona pachamabwila mubikaye uyunji.

⁵ Mubikaye umwana uwa ng'ozi wesi poka ni chakwiyipa icha busu ubutinye ubwa ingano ubwakukwana ikilogalamu lyoka ubwakongannya na mafuta agha misyunguti aghakukwana ilita lyoka.

⁶ Ichi cho chakwiyipa ichakocha icha isiku ni siku chicho u Mwene akalamula pighamba ilya Sinayi ukuti chibanje chakwiyipa ichakocha, chicho umunusi wache ghukumuhobosya u Mwene.

⁷ Mubikaye ichakwiyipa icha vinyo ichakukwana ilita lyoka poka nu mwana uwa ng'ozi weka. Mupungulile uvinyo Mubuzilo Ubuzelu.

⁸ Mubikaye umwana uwa ng'ozi uwabubili yula pachamabwila, poka ni chakwiyipa icha busu ubutinye chila, sona ni chakwiyipa icha vinyo ngati cha pandabindabi. Ichi cho chakwiyipa ichakocha, chicho umunusi wache ghukumuhobosya u Mwene.”

Ichakwiyipa icha Isiku Ilyakutuzya

⁹ Pisiku Ilyakutuzya mubikaye utwana utwadubi tubili utwamwaka ghoka utusita chilema nachimochimo, poka ni chakwiyipa icha vinyo, sona ni chakwiyipa icha busu ubwakukwana amakilogalamu mabili ubwakongannya na mafuta agha misyunguti ukuti chibanje chakwiyipa icha busu, sona ni chakwiyipa icha vinyo.

¹⁰ Ichi cho chakwiyipa ichakocha icha Isiku Ilyakutuzya, pakonjelezya pa chakwiyipa ichakocha ni chakwiyipa icha vinyo icha isiku ni siku.

Ivyakwiyipa ivya isiku ilyakwanda ilya mwezi

¹¹ Pisiku ilyakwanda ilya mwezi mubikaye inkambaku inyana zibili nu dubi weka, sona nu twadubi seveni utwamwaka ghoka, tuto tute ni chilema nachimochimo ukuti chibanje chakwiyipa ichakocha kwa Mwene.

¹² Mubikaye poka ni nkambaku yila ichakwiyipa icha busu ubutinye ubwakukwana amakilogalamu matatu, ubwakongannya na mafuta. Mubikaye poka nu dubi yula ichakwiyipa icha busu ubutinye ubwakukwana amakilogalamu mabili ubwakongannya na mafuta,

¹³ sona mubike poka nu mwana uwa ng'ozi, ubusu ubutinye ubwakukwana ikilogalamu lyoka ubwakongannya na mafuta. Ichi cho chakwiyipa ichakocha chicho umunusi wache ghukumuhobosya u Mwene.

¹⁴ Pa nkambaku yoka mubikayepo ichakwiyipa icha vinyo uwakukwana amalita mabili. Mubikaye sona udubi poka ni chakwiyipa icha vinyo uwakukwana ilita lyoka nu hafu. Ichi cho chakwiyipa ichakocha icha Lusekelo ulwa Kupanta ukwa Mwezi pamwaka.

¹⁵ Ukonjelezya pa chakwiyipa ichakocha icha isiku ni siku, mubikaye usabwe weka kwa Mwene ukuti chibanje chakwiyipa ichakupepesezya imbibi.

Ivyakwiyipa ivya pa Lusekelo ulwa Chibama chicho chite ni chilungo

¹⁶ Pisiku ilya 14 ilya mwezi uwakwanda, pabanje Ulusekelo ulwa Pasa ulwa Mwene.

¹⁷ Pisiku ilya 14 ilya mwezi ghulaghula pabanje ulusekelo. Mulyanje ichibama chicho chite ni chilungo amasiku seveni.

¹⁸ Pisiku ilyakwanda ilya lusekelo mubanje nulukomano ulupaghuliwa, sona mutakabombaye imbombo izya isiku ni siku.

¹⁹ Mubikaye inkambaku inyana zibili nu dubi weka, poka nu twadubi seveni tuto tute ni chilema nachimochimo ukuti chibanje chakwiyipa ichakocha kwa Mwene.

²⁰ Mubikaye poka ni nkambaku yila ichakwiyipa icha busu ubutinye ubwakukwana amakilogalamu matatu ubwakongannya na mafuta agha misyunguti, sona mubikaye poka nu dubi amakilogalamu mabili.

²¹ Mubikaye poka nu mwana uwa ng'ozi weka ikilogalamu lyoka.

²² Mubikaye sona usabwe weka ukuti chibanje chakwiyipa ichakupepesezya imbibi. Bunubu mukwiza pakubika ichakwiyipa ichakupepesezya imbibi izya bantu.

²³ Mubikaye ivyakwiyipa vinivi pakonjelezya pa chakwiyipa ichakocha icha isiku ni siku chicho chikubikiwa pandabindabi.

²⁴ Bunubu mubikaye ivyakwiyipa vyinyu isiku ni siku mubusiku bosi seveni pakuba cha munusi umwiza uwa kumuhobosya u Mwene. Mubikaye ivyakwiyipa vinivi ukonjelezya pa chakwiyipa ichakocha ni chakwiyipa icha vinyo icha isiku ni siku.

²⁵ Pisiku ilyaseveni mubanje nulukomano ulupaghuliwa ulwa chiputo, sona mutakabombaye imbombo izya isiku ni siku.

Ivyakwiyipa ivya Lusekelo ulwa Nyinulo

²⁶ Pisiku ilyakwanda ilya Lusekelo ulwa Nyinulo, bo mukubika kwa Mwene ivikomwa vyinyu ivyakwanda pakutona, mubanje nulukomano ulupaghuliwa ulwa chiputo, sona mutakabombaye imbombo izya isiku ni siku.

²⁷ Loli mubikaye inkambaku inyana zibili nu dubi weka, sona nu twadubi utwamwaka ghoka tuto tute ni chilema nachimochimo ukuti chibanje chakwiyipa ichakocha kwa Mwene, Umunusi uwa chakwiyipa chinichi ghukumuhobosya u Mwene.

²⁸ Mubikaye poka ni nkambaku yoka ichakwiyipa icha busu ubutinye ubwakukwana amakilogalamu matatu ubwakongannya na mafuta agha misyunguti, sona amakilogalamu mabili poka nu dubi.

²⁹ Mubikaye poka nu twadubi tula ikilogalamu lyoka.

³⁰ Mubikaye sona usabwe weka ukuti chibanje chakwiyipa ichakupepesezya imbibi. Bunubu mukwiza pakubika ichakwiyipa ichakupepesezya imbibi izya bantu.

³¹ Mubikaye ivyakwiyipa vinivi poka ni chakwiyipa icha vinyo ukonjelezya pa chakwiyipa ichakocha, ni chakwiyipa icha busu icha isiku ni siku. Mwenelezye ukuti vyosi vinivi vitakabanje ni chilema nachimochimo.