Ukubelengiwa 27 - IBAYIBOLO 2024

Abana abalindu aba Zelofehadi

¹ Pakabalilo kalakala abana abalindu aba Zelofehadi umwana uwa Hefeli, umwana uwa Giliyadi, umwana uwa Makili, yuyo akaba uwa munyumba iya Manase, umwana uwa Yosefu, bakiza pantazi. Amatabwa agha balindu ghanagha ghakaba gho agha: U Mala nu Nowa nu Hogila nu Milika sona nu Tiliza.

² Abene bakiza pamulyango uwa Chisakasa icha Mwene nukwimilila pamaso pa Mozesi nu muputi Eleyazala, na balongozi, sona ni chilundilo nukuti,

³ “Utata witu akafwila munkolongo umusita bana abalumendo. Atakaba uwa kabukatila aka bakonki aba Kola, kako kakamusambukila Mwene, loli akafwa pachifukwa icha mbibi zyache.

⁴ Nkimba choni chicho itabwa ilya tata witu lizimile pakasi pa bamunyumba yache pachifukwa ichakuti akafwa umusita bana abalumendo? Utupe ichilingo chitu pakasi pa bakamu aba tata witu.”

⁵ U Mozesi akabuka ninongwa yabo pamaso pa Mwene.

⁶ Po u Mwene akamubuzya u Mozesi akati,

⁷ “Zizyo abana aba Zelofehadi bakunena zyanaloli. Ubape ichilingo chabo pakasi pa bakamu babo, sona ubape ichilingo icha wise pakuba chabo ni chabo.

⁸ “Ubabuzye aba Izilayeli uti, ‘Nanti umwanavuli afwa umusita umwana umulumendo, umwana wache umulindu apyane ichilingo.

⁹ Nanti ate nu mwana umulindu, abawamwabo bapyane ichilingo.

¹⁰ Nanti ate na bawamwabo, abawamwabo abawise bapyane ichilingo.

¹¹ Nanti uwise ate na bawamwabo, po umukamu wache uwa papipi nkani apyane ichilingo. Ulu lubanje lulaghilo lwaba Izilayeli ukuyana namumo u Mwene akamulamulila u Mozesi.’ ”

U Yoshwa akumupyana u Mozesi

¹² U Mwene akamubuzya u Mozesi akati, “Kwela pighamba ilya Abalimu ukuti uchennye ichisu chicho nabapa aba Izilayeli.

¹³ Bo wachennya, nawe bulo ukwiza pakufwa ukuyana namumo uwamwinyu u Aloni akafwila,

¹⁴ pachifukwa ichakuti mwebosi babili mukansambukila munkolongo iya Zini. Bo ichilundilo chikwilumbusya nane, amwe mukakana pakunchindika pamaso papabo ukuti ane ne muzelu.” (Agha ghakaba mizi agha Meliba mu Kadeshi munkolongo iya Zini.)

¹⁵ U Mozesi akiputa kwa Mwene akati,

¹⁶ “Wee Mwene Chala we mbwibwi iya bumi ubwa bantu bosi, umusale umuntu yumo ukuti achilongozyanje ichilundilo chinichi

¹⁷ pakubalongolela kubwite, nukubalamula ivyakubomba umwakuti abantu bako batakabanje ngati zyo ng'ozi zizyo zite nu mudimi.”

¹⁸ Po u Mwene akamubuzya u Mozesi akati, “Umusende u Yoshwa umwana uwa Nuni, umuntu yuyo ali nu Muzimu uwa Chala, nukubika inyobe papache.

¹⁹ Umwimike pamaso pa muputi u Eleyazala, napa chilundilo chosi, po umwimike pakuba wakupyana papako.

²⁰ Umupeko bumo ubulaghili bwako umwakuti ichilundilo chosi chimwivwilaye.

²¹ Imilile pamaso pa muputi u Eleyazala, yuyo akwiza pakubumanya ubwighane ubwa Mwene pakubombezya u Ulimu nu Tumimu. Umu momumo akwiza pakuchilongozezya ichilundilo chosi, nukumulamula u Yoshwa, poka ni chilundilo chosi icha ba Izilayeli.”

²² U Mozesi akabomba vivyo u Mwene akamulamula. Akamwimika u Yoshwa pamaso pa muputi u Eleyazala, sona napa chilundilo chosi.

²³ Po akabika inyobe papache, sona akamupa imbombo ukuyana namumo u Mwene akamulamulila ukwendela mwa Mozesi.