Ukubelengiwa 25 - IBAYIBOLO 2024

Aba Izilayeli pa Pewoli

¹ Bo aba Izilayeli bali mwikombe ilya Shitimu, abanavuli bakanda pakulowa na bakolo aba mu Mowabu.

² Abakolo banaba bakabitizya abanavuli kulusekelo lwavyakwiyipa vivyo bakabika ku bachala babo. Abantu bakalya ivyakulya nukubachindika abachala babo.

³ Aba Izilayeli bope bakanda pakumwiputa u Baala waku Pewoli. Po u Mwene akabakalalila nkani aba Izilayeli.

⁴ U Mwene akamubuzya u Mozesi akati, “Ubasende abalongozi bosi aba bantu banaba, ubaghoghe pabuzelu pamaso papane, umwakuti ubukali ubwa Mwene butozoke paba Izilayeli.”

⁵ Po u Mozesi akabalamula abalongi aba Izilayeli akati, “Umuntu wesi uwa amwe abaghoghe abantu bosi babo bakamuchindika u Baala waku Pewoli.”

⁶ Po umu Izilayeli yumo akamwinjizya umukolo umu Midiyani muchisakasa chache, bo u Mozesi poka ni chilundilo chosi chikwennya, sona bo bakulila pamulyango uwa Chisakasa icha Mwene

⁷ Bo u Finehasi, umwana uwa Eleyazala, yuyo akaba mwizukulu uwa muputi u Aloni ennya, akepapo pachilundilo palapala. Akabuka pakusenda impalala

⁸ nukumukonka umu Izilayeli yula muchisakasa chache. Po akabalasa bosi babili, umu Izilayeli yula, poka nu mukolo yula. Bunubu ichiwaya chikamala pakasi papabo.

⁹ Loli ubwinji ubwa bantu bosi babo bakafwa ni chiwaya chila bakabapo 24,000.

¹⁰ U Mwene akamubuzya u Mozesi akati,

¹¹ “U Finehasi umwana uwa Eleyazala, umwizukulu uwa muputi u Aloni abwisya ubukali bwane paba Izilayeli, pakuti akaba nu lweke ukuyana namumo imbeleye, cho chifukwa intakabazimizya abantu banaba.

¹² Polelo umubuzye ukuti nkufinga nawe ulufingo ulwa mutende.

¹³ Nkufinga nawe poka na baluko lwache ulufingo ulwa buputi ubwa bwila na bwila, pakuti akaba nu lweke pakumwiputa u Chala wache, sona nukuti akabika ichakwiyipa ichakupepesezya imbibi izya bantu.”

¹⁴ Itabwa ilya mu Izilayeli yuyo akaghoghiwa poka nu mukolo umu Midiyani akaba we Zimuli umwana uwa Salu, yuyo akaba mulongozi uwa munyumba iya luko ulwa Simiyoni.

¹⁵ Itabwa ilya mukolo yula likaba we Kozibi umwana uwa Zuli, uwa luko ulwabumwene ubwa ba Midiyani.

¹⁶ U Mwene akamulamula u Mozesi akati,

¹⁷ “Bukagha pakulwa ubwite naba Midiyani nukubaghogha,

¹⁸ pachifukwa ichakuti bakabazimbula pa Pewoli, sona pachifukwa icha muyemba wabo u Kozibi, yuyo akafwa ni chiwaya pa Pewoli.”