Ukubelengiwa 24 - IBAYIBOLO 2024

¹ Bo u Balamu ennya ukuti chikamuhobosya u Mwene pakubasaya aba Izilayeli, atakabuka pakumulalusya u Mwene ichakubomba ukuyana namumo akabombelagha bwila. Loli akaghalabuka bulo nukwennya kunkolongo,

² po akabennya aba Izilayeli bazengite ivisakasa vyabo ukuyana nuluko lwabo. Po u Muzimu uwa Chala akamwikila,

³ sona akanda pakunena ukuti, “Agha gho mazyu agha Balamu umwana uwa Bewoli, amazyu agha muntu yuyo amaso ghangennya akiza.

⁴ Agha gho mazyu agha muntu yuyo akwivwa amazyu agha Chala, umuntu yuyo akumwennya u Chala Uwamaka Ghosi muchisetuka, umuntu yuyo akuwa pasi, loli amaso ghache mighuke.

⁵ Wee Yakobo, ivisakasa vyako vyiza nkani. Wee Izilayeli, inyumba zyako zikuboneka akiza nkani.

⁶ Abantu bako bali ngati gho makombe ghagho ghasatite, bali ngati gho maghunda agha mulubazu ulwalusoko, bali ngati we aloyi yuyo abyaliwe nu Mwene, bali ngati gho makwi agha mwale ghagho ghamelite mulubazu ulwa mizi.

⁷ Abene bakwiza pakuba ni vula inyinji Sona ivibyaliwa vyabo vikwiza pakuba na mizi aminji. U mwene wabo akwiza pakuba mukulu ukumuchila u Agagi sona ubumwene bwache bukwiza pakukweziwa.

⁸ U Chala akabefyamo mu Ijiputi. Abene bali na maka ngati mpogho. Bakwiza pakubamila bulo abalwani babo bakwiza pakumenyannya amafupa ghabo nukughalasa nu tulasilo twabo.

⁹ Mukwiza pakuba ngati nkalamu, inkalamu inkolo, nkimba wewenu angachela pakukulamusya? Musayiwa umuntu yuyo akubasaya, mughuniwa umuntu yuyo akubaghuna.”

¹⁰ U Balaki akamukalalila nkani u Balamu, po akakoma amanja nukumubuzya u Balamu ukuti, “Nkakwitizya ukuti ungunile abalwani bane, loli awe ubasayite katatu kosi.

¹¹ Losi ulu bwelagha! Ane nkakubuzya ukuti nkwiza pakukuchindika nkani, loli u Mwene akukanizya ukuti nkuchindike.”

¹² U Balamu akamwamula Balaki akati, “Intumi zizyo ukantumila, nkimba ntakazibuzya ukuti,

¹³ ‘Napapo ungampa inyumba iya bumwene inyizyule nu siliva nu golide, ane ntangabomba nachimochimo pa nemwene loli zyene zizyo u Mwene ambuzya?’ ”

Amazyu aghabumalilo agha Balamu

¹⁴ U Balamu akati, “Losi ulu nkubwela, loli bo ntabukite, leka nkusoke zizyo aba Izilayeli bakwiza pakubabombela abantu bako muntazi muno.”

¹⁵ Po akati, “Amazyu agha Balamu umwana uwa Bewoli, amazyu agha muntu yuyo amaso ghache mighuke.

¹⁶ Agha gho amazyu agha muntu yuyo akwivwa amazyu agha Chala. Ali nu bumanyi ubwa Chala Uwakumwanya Nkani, sona u Chala Uwamaka Ghosi yuyo akwennya ichisetuka. Sona akuwa pasi bo afughamiye, ghope amaso ghache mighuke.

¹⁷ Nkwennya muntazi, nkwennya uluko lwaba Izilayeli. Umwene yuyo ayanite nu lutondwa, akwiza pakuba wa munyumba iya Yakobo. Indisa iya bumwene yikwiza pakuba ya munyumba iya Izilayeli. Indisa yache yikwiza pakubakoma abalongozi aba Mowabu, sona yikwiza pakulupota uluko ulwa Seti.

¹⁸ Ichisu icha Edomu chikwiza pakufyuliwa, u Seyili, yuyo mulwani wache akwiza pakupotiwa, loli u Izilayeli akwiza pakwendelela ukuba wamaka.

¹⁹ Umulaghili akwiza pakuba wa munyumba iya Yakobo, yuyo akwiza pakubanangannya abantu abakusyalamo mukaya akakulu nkani.”

²⁰ U Balamu akabennya aba Amaleki, po akati, “Aba Amaleki bakaba luko lwamaka nkani pa vyisu vyosi, loli ubumalilo bwabo ko kuzimila bulo.”

²¹ U Balamu akabennya aba Keni, po akati, “Ubuzilo bwinyu ubwakwikalamo bute nintamyo, sona ivivumbo vyinyu vilukiwe pilyalabwe.

²² Loli amwe mwe ba Keni mukwiza pakunanganika bo aba Asiliya bakubalema pakuba bazya.”

²³ U Balamu akanena sona akati, “Mwee, nkimba wewenu angaba nubumi bo u Chala akubomba zinizi?

²⁴ Loli amabwato amakulu nkani ghakwiza pakufuma ku Sayipulasi, pakubapota aba Asiliya naba Ebeli, loli bope ubumalilo bwabo ko kuzimila bulo.”

²⁵ Po Balamu akanyamuka nukubwela, wepe nu Balaki akabwela.