Ukubelengiwa 23 - IBAYIBOLO 2024

Amazyu aghakwanda agha Balamu

¹ Po u Balamu akamubuzya u Balaki akati, “Unzengele ivighemo seveni, sona unjanizizye inkambaku seveni na badubi seveni.”

² U Balaki akabomba vivyo u Balamu akamubuzya, po bosi babili bakabika inkambaku yoka nu dubi weka pachighemo chosi ukuti chibanje chakwiyipa.

³ Po u Balamu akamubuzya u Balaki akati, “Ungimilila papipi ni chakwiyipa chako, bo ane nabuka kula, lumo u Mwene angiza pakukomana nane. Nkwiza pakukubuzya zyosi zizyo amvumbuliye.” Po akabuka mwene pamwanya pighamba.

⁴ U Chala akakomana nu Balamu, po u Balamu akati, “Nakuyanizizya ivighemo seveni, sona pachighemo chosi nabikapo inkambaku yoka nu dubi weka ukuti chibanje chakwiyipa.”

⁵ U Mwene akamubuzya u Balamu amazyu, nukumutuma ukuti, “Nyokela kwa Balaki umubuzye amazyu ghanagha.”

⁶ Po akanyokela nukumwagha u Balaki, bo achili imiliye papipi ni chakwiyipa chache, poka na balongozi bosi aba ba Mowabu.

⁷ Po U Balamu akati, “U Balaki u mwene uwa ba Mowabu anyitizya, bo indi mu Siliya kumaghamba agha Siliya, kubufumilo bwizuba. Akati, ‘Zagha ungunile u Yakobo, zagha umusamule u Izilayeli.’

⁸ Nkimba ningamughuna bulibuli umuntu yuyo u Chala atamughunite? Nkimba ningamusamula bulibuli umuntu yuyo u Mwene atamusamuye?

⁹ Bo indi pamwanya pighamba nkubennya, nkubennya bo indi po pamwanya pighamba, nkubennya abantu babo bakwikala bene, babo batakwiyongannya poka na bantu aba inko izinji zyosi.

¹⁰ Nkimba wewenu angababelenga abaluko ulwa Yakobo, babo ubwinji bwabo buyanite nu lufumbi? Leka imfwe ukuyana namumo abantu abagholosu bakufwila, buleke ubumalilo bwane buyane nu bwabo!”

¹¹ U Balaki akamulalusya u Balamu akati, “Nkimba cho choni chicho wambombela? Nkakwitizya ukuti ungunile abalwani bane, loli wabasaya!”

¹² U Balamu akamula akati, “Nkimba intanganena zyene zizyo u Mwene ambuzya?”

Amazyu aghabubili agha Balamu

¹³ Po u Balaki akamubuzya u Balamu akati, “Twende tubukaye twebosi kubuzilo ubunji, kuko ungabennya aba Izilayeli akiza bulo. Ukwiza pakubennya banandi bulo, po palapala ungangunila abantu banaba.”

¹⁴ Po akabuka nawe kumughunda uwa Zofimu pamwanya pighamba ilya Pisiga. Palapala akazengapo ivighemo seveni nukubika inkambaku yoka nu dubi weka pachighemo chosi ukuti chibanje chakwiyipa.

¹⁵ U Balamu akamubuzya u Balaki akati, “Ungimilila papipi ni chakwiyipa chako, bo ane nabuka kula pakukomana nu Mwene.”

¹⁶ U Mwene akakomana nu Balamu, po akamubuzya amazyu akati, “Nyokela kwa Balaki umubuzye amazyu ghanagha.”

¹⁷ Po akanyokela nukumwagha u Balaki, bo achili imiliye papipi ni chakwiyipa chache, poka na balongozi bosi aba ba Mowabu. U Balaki akamulalusya u Balamu akati, “Nkimba u Mwene ati choni?”

¹⁸ Po u Balamu akati, “Wee Balaki, nyamuka, ivwa kuno! Wee mwana uwa Zipola, ivwa kuno!

¹⁹ U Chala te muntu uwakuti angatamanta, pamo te mwana uwa muntu uwakuti angandula inyinong'ono zyache. Nkimba anenitepo chimo ukusita pakuchibomba? Nkimba alayizizyepo chimo ukusita pakuchikwanilisya?

²⁰ Ampiye ilamulo ilyakuti imbasaye, po abasayite, ane ntangandulapo nachimochimo.

²¹ Nachimochimo ichighune akuchennyamo mwa Yakobo, atakuyennyamo nayimoyimo intamyo mwa Izilayeli. U Mwene u Chala wabo ali nabo, sona aba we mwene pakasi papabo.

²² U Chala akabefyamo mu Ijiputi, amaka ghache ghayanite nagha mpogho.

²³ Ghatalipo amayele naghamoghamo aghakumunanga u Yakobo, sona ivipandwa ivyakumuvulazya u Izilayeli. Nizya Yakobo nu Izilayeli abantu bakuti, ‘Ennya zizyo u Chala abomba!’

²⁴ Uluko ulwa Izilayeli lukunyamuka ngati nkalamu inkolo, lukunyamuka ngati nkalamu inyanavuli, yiyo yitakughona mupaka yileme ichinyamana chimo nukuchilya, yiyo yikungw'ela ibanda ilya chinyamana chicho yaghogha.”

²⁵ Po u Balaki akamubuzya u Balamu akati, “Nanti utakabaghuna abantu banaba, po utakabasaye napo panandi.”

²⁶ Loli u Balamu akamwamula u Balaki akati, “Nkimba ntakubuzizye ukuti nkwiza pakubomba zyene zizyo u Mwene ambuzya?”

Amazyu aghabutatu agha Balamu

²⁷ Po u Balaki akamubuzya u Balamu akati, “Twende tubukaye twebosi kubunji, lumo chingamuhobosya u Chala ukuti ungunile abantu banaba kulakula.”

²⁸ Po u Balaki akabuka nu Balamu pamwanya pighamba ilya Pewoli, papo bakayennya inkolongo muntende.

²⁹ U Balamu akamubuzya u Balaki akati, “Unzengele ivighemo seveni, sona unjanizizye inkambaku seveni na badubi seveni.”

³⁰ U Balaki akabomba vivyo u Balamu akamubuzya, po akabika inkambaku yoka nu dubi weka pachighemo chosi ukuti chibanje chakwiyipa.