Ukubelengiwa 22 - IBAYIBOLO 2024

U mwene u Balaki akumwitizya umulaghuzi u Balamu

¹ Aba Izilayeli bakanyamuka ubulendo bwabo nukuzenga ivisakasa vyabo mumakombe agha Mowabu, kwisila ilya lusoko ulwa Yolodani, umwakwenannya nakaya akakulu nkani aka Yeliko.

² Bo u Balaki u mwene uwa ba Mowabu umwana uwa Zipola ivwa zyosi zizyo aba Izilayeli bakababombela aba Amoli,

³ aba Mowabu bakanyila nkani pachifukwa ichakuti aba Izilayeli bakaba binji nkani.

⁴ Aba Mowabu bakababuzya abalongozi aba ba Midiyani bakati, “Ichilundilo chinichi chikwiza pakunangannya ivintu vyosi vivyo vituzyunguliye ngati mumo inkambaku yikulyela isote.” Po u Balaki umwana uwa Zipola, yuyo akaba we mwene uwa ba Mowabu pakabalilo kalakala,

⁵ akatuma intumi pakumwitizya u Balamu umwana uwa Bewoli, yuyo akaba mu Petoli papipi nu lusoko ulwa Yufuleti muchisu icha Amawi nukumubuzya ukuti, “Abantu babo bakepa mu Ijiputi basata muchisu chosi chinichi, sona bazenga papipi bulo nane.

⁶ Losi ulu zagha ungunile abantu banaba, pakuti bamaka nkani ukunchila. Lumo ningabapota nukubachimbizyamo muchisu chane. Inzimenye ukuti nanti ukubasaya abantu, kokuti naloli abantu balabala bakusayiwa, sona nanti ukubaghuna abantu, kokuti naloli abantu balabala bakughuniwa.”

⁷ Po abalongozi aba ba Mowabu naba Midiyani bakabuka, sona bakapaya indalama izyakulaghulila. Bo bafika kwa Balamu bakamubuzya amazyu agha Balaki ghala.

⁸ U Balamu akababuzya akati, “Ilelo mughone kuno, po indabi nkwiza pakubabuzya zyosi zizyo u Mwene ambuzya.” Po abalongozi aba ba Mowabu bala bakaghona munyumba iya Balamu.

⁹ U Chala akiza kwa Balamu nukumulalusya ukuti, “Nkimba abantu babo bali munyumba yako bo bawenu?”

¹⁰ U Balamu akamula akati, “U Balaki umwana uwa Zipola u mwene uwa ba Mowabu antumila amazyu aghakuti,

¹¹ ‘Abantu babo bakepa mu Ijiputi basata muchisu chosi chinichi. Losi ulu zagha ungunile abantu banaba, pakuti bamaka nkani ukunchila. Lumo ningabapota nukubachimbizyamo muchisu chane.’ ”

¹² Loli u Chala akamubuzya u Balamu akati, “Utakabukaye nabo. Utakabaghunaye abantu banaba, pachifukwa ichakuti nabasaya.”

¹³ Po u Balamu akalamusya pandabindabi nukuzibuzya intumi izya Balaki zila ukuti, “Bwelagha pakuti u Mwene ankanila ukuti imbuke namwe.”

¹⁴ Po abalongozi aba ba Mowabu bala bakabwela nukumubuzya u Balaki ukuti, “U Balamu akana pakwiza naswe.”

¹⁵ U Balaki akatuma sona amakambala aghanji aminji nkani, ghagho ghakaba ghakuchindikiwa nkani ukubachila abakwanda bala.

¹⁶ Bakabuka kwa Balamu nukumubuzya ukuti, “U Balaki umwana uwa Zipola ati, ‘Chitakabepo nachimochimo ichakukukanizya pakwiza kukwane.

¹⁷ Ane nkwiza pakukulipila akiza nkani nukukubombela chosi chicho wambuzya. Zagha ungunile abantu banaba.’ ”

¹⁸ Loli u Balamu akabamula akati, “Napapo u Balaki angampa inyumba iya bumwene inyizule nu siliva nu golide, ane ntangabomba chimo ichikulu pamo ichinandi ichakuchila ilamulo ilya Mwene u Chala wane.

¹⁹ Ilelo mughone kuno ubusiku bunubu ukuyana namumo bakabombela abamwinyu bala, umwakuti imanye nanti zilipo zimo zizyo u Mwene akulonda pakumbuzya.”

²⁰ Ubusiku bulabula u Chala akamwizila u Balamu nukumubuzya ukuti, “Pachifukwa ichakuti abantu banaba biza pakukwitizya ukuti ubukaye nabo, bukagha poka nabo. Loli ubombaye bulo zyene zizyo nkukubuzya.”

U Balamu ni mpunda yache

²¹ Po pandabindabi u Balamu akabika ichakwikalila panyuma iya mpunda yache nukubuka poka na balongozi aba ba Mowabu bala.

²² Loli pope bulo u Chala akakalala nkani pachifukwa ichakuti u Balamu akabuka, po uwantumi uwa Mwene akimilila muzila ukuti amuzighe. U Balamu akakwela pampunda yache, sona akaba poka na bambombo bache babili.

²³ Bo impunda yila yamwennya uwantumi uwa Mwene amuzighiye muzila, alemite upanga munyobe, impunda yila yikapaghuka nukwinjila mumughunda. U Balamu akayisyempa ukuti yinyokele muzila.

²⁴ Po uwantumi uwa Mwene yula akimilila muzila infinye pakasi pa maghunda mabili agha mampesya, ghagho ghakaba ni vibumba imbazu zyosi zibili.

²⁵ Bo impunda yila yamwennya uwantumi uwa Mwene yula yikifyenyelekezya kulubumba, nukulukanya ulwayo ulwa Balamu kulubumba. U Balamu akayisyempa sona impunda yache.

²⁶ Po uwantumi uwa Mwene akalongolela nukwimilila sona muzila infinye yiyo yitakaba nukwakupaghukila, kundilo pamo kumongo.

²⁷ Bo impunda yila yamwennya uwantumi uwa Mwene, yikaghona pasi, bo u Balamu ali pamwanya. U Balamu akakalala nkani nukuyisyempa impunda yila ni ndisa.

²⁸ U Mwene akayighula impunda yila umulomo, po yikamulalusya u Balamu ukuti, “Nkimba nkunangiye choni, ukuti unsyempe katatu bunubu?”

²⁹ U Balamu akayamula impunda yila akati, “Wangoneka bulo utulo. Nanti nabanga nupanga munyobe ngali nakughogha losi ulu.”

³⁰ Impunda yikamwamula u Balamu yikati, “Ane ne mpunda yako, sona ne ukunkwela akabalilo kosi. Nkimba nkubombeyepo chimo ngati chinichi?” U Balamu akamula akati, “Awe.”

³¹ Po u Mwene akamwighula amaso u Balamu, nukumwennya uwantumi uwa Mwene imiliye muzila, bo alemite upanga munyobe. U Balamu akafughama.

³² Uwantumi uwa Mwene yula akamulalusya akati, “Nkimba choni chicho wayisyempite impunda yako katatu bunubu? Ane nizite pakukuzigha izila, pachifukwa ichakuti ubulendo bwako butakunhobosya.

³³ Impunda yikanyennya nukupaghuka katatu. Nanti yitakapaghukagha, ngali nakughogheye palapala, loli impunda yila ngali yapona.”

³⁴ U Balamu akamula akati, “Nananga. Ntakazyaghannya ukuti ukunzighila izila. Po nanti utakulonda ukuti imbukaye, nkwiza pakubwela.”

³⁵ Uwantumi uwa Mwene yula akamubuzya u Balamu akati, “Bukagha poka na bantu banaba, loli unenaye bulo zyene zizyo nkukubuzya.” Po u Balamu akabuka poka na makambala agha Balaki ghala.

U Balaki akumupokela u Balamu

³⁶ Bo u Balaki ivwa ukuti u Balamu akwiza, akabuka pakukomana nawe ku Ali, akaya akakulu nkani kako kakaba mulubazu ulwa lusoko ulwa Alinoni, lulo lukaba mpaka iya chisu icha ba Mowabu.

³⁷ U Balaki akamulalusya u Balamu akati, “Nkimba ntakakutumila amazyu ukuti wize? Nkimba choni chicho utakiza? Nkimba ukinong'onagha ukuti ntangakulipila akiza nkani?”

³⁸ U Balamu akamula akati, “Ilelo niza, te momumo? Ane inte na maka aghakunena ichintu ichinji bulo, loli nkwiza pakunena zyene zizyo u Chala ambuzya.”

³⁹ Po u Balamu akabuka poka nu Balaki nukufika kukaya akakulu aka Kiliyati Huzoti.

⁴⁰ U Balaki akabika ing'ombe ni ng'ozi ukuti chibanje chakwiyipa nukumupako inyama yimo u Balamu na makambala ghagho ghakaba poka nawe.

⁴¹ Indabi yache u Balaki akamusenda u Balamu nukukwela nawe amaghamba agha Bamoti Baala, kuko u Balamu akabennyanga aba Izilayeli akiza bulo.