Ukubelengiwa 21 - IBAYIBOLO 2024

Aba Izilayeli bakubapota aba Kenani aba mu Aladi

¹ Bo u mwene uwa ba Kenani wamu Aladi, yuyo akikalagha mu Negebu, ivwa ukuti aba Izilayeli bakwizila kuzila iya ku Atalimu, akalwa nabo ubwite nukubalema bamo pakuba bakayidi.

² Po aba Izilayeli bakalapa ichilapo kwa Mwene bakati, “Nanti bulo wababika munyobe zyitu abantu banaba, naloli tukwiza pakutunangannya utwaya twabo tosi utukulu nkani.”

³ U Mwene akivwa ukulaba ukwa ba Izilayeli, po akababika aba Kenani bala munyobe zyabo. Bakabanangannya nukutuzimizya utwaya twabo utukulu, po ubuzilo bula bakabwita ukuti Holima.

Nizya njoka iya mukuba

⁴ Aba Izilayeli bala bakepapo pighamba ilya Holi nukwenda izila iya ku Nyanja Inchesamu, ukuchizyungulila ichisu icha Edomu. Loli bo bali muzila, abantu bakakalala nkani.

⁵ Abantu bakanda pakwilumbusya nu Chala, sona nu Mozesi bakati, “Nkimba choni chicho mukatwefya mu Ijiputi ukuti tufwile munkolongo muno? Pakuti munkolongo mute ni chakulya pamo amizi? Ichakulya chicho tukulya muno chitukimite!”

⁶ Po u Mwene akabatumila aba Izilayeli injoka zizyo zili nubwanga pakubaluma, po aba Izilayeli abinji bakalumiwa nukufwa.

⁷ Abantu bala bakiza kwa Mozesi nukumubuzya ukuti, “Tukananga pakususannya nu Mwene poka nawe bulo. Iputa kwa Mwene ukuti efye injoka zinizi.” Po u Mozesi akabiputila abantu bala.

⁸ U Mwene akamubuzya u Mozesi akati, “Panga injoka iya mukuba nukuyipayika pikwi. Nanti umuntu wesi yuyo alumiwa, akuyennya injoka yila, akwiza pakupola.”

⁹ Po u Mozesi akapanga injoka iya mukuba nukuyipayika pikwi. Umuntu wesi yuyo alumiwa, nanti ayennya bulo injoka iya mukuba yila, akabanga nubumi.

Aba Izilayeli bakusama pighamba ilya Holi

¹⁰ Aba Izilayeli bala bakanyamuka ubulendo bwabo nukuzenga ivisakasa vyabo ku Oboti.

¹¹ Bakasamako ku Oboti nukuzenga ivisakasa vyabo ku Abalimu munkolongo, sona kubufumilo bwizuba umwakwenannya ni chisu icha Mowabu.

¹² Bakasamako sona kulakula nukuzenga ivisakasa vyabo mwikombe ilya Zeledi.

¹³ Pisinda pache bakaloboka ulusoko ulwa Alinoni, nukuzenga ivisakasa vyabo mulubazu ulwa ulusoko ulwa Alinoni, muchisu icha ba Mowabu munkolongo mumpaka iya chisu icha ba Amoli. Ulusoko ulwa Alinoni lukaba mpaka pakasi pachisu icha ba Mowabu, nicha ba Amoli.

¹⁴ Ichi cho chifukwa visimbiwe Mwibuku ilya bwite ilya Mwene ukuti, “Akaya akakulu nkani aka Wahebi kali muchigaba icha Sufa, sona na mumakombe agha Alinoni,

¹⁵ kuntende kwikombe lilyo lifikite mupaka mukaya aka Ali, nukulobokela kumpaka iya chisu icha ba Mowabu.”

¹⁶ Bo basama kulakula, bakabuka kubuzilo bubo bakatinji Beeli, pachiziba chicho u Mwene akamubuzya u Mozesi ukuti, “Ubabungannye poka abantu, po ane nkwiza pakubapa amizi.”

¹⁷ Po aba Izilayeli bakimba ulwimbo ulwakuti, “Wee chiziba we, bwibwitula amizi ghako, po aswe tukughalamuka nu lwimbo!

¹⁸ We chiziba chicho chikakumbiwa na bamwene, chicho abantu abamanyikwe bakachikumba, pakubombezya indisa zyabo izya bumwene, sona ni ndisa zyabo izyakwendela.” Aba Izilayeli bakasamamo munkolongo mula nukubuka ku Matana.

¹⁹ Po bakasamako ku Matana kula nukubuka ku Nahaliyeli, sona bakasamako ku Nahaliyeli nukubuka ku Bamoti.

²⁰ Bakasamako ku Bamoti nukufika mwikombe ilya ba Mowabu, bakendela izila iya pamwanya pighamba ilya Pisiga, papo bakayennya inkolongo.

Aba Izilayeli bakumupota u Sihoni nu Ogi

²¹ Po aba Izilayeli bakatuma intumi kwa mwene u Sihoni, uwa ba Amoli na mazyu aghakuti,

²² “Utwitikizye ukuti tudumusannyemo muchisu chako. Tutakwiza pakudumusannya mumaghunda ghinyu pamo mumaghunda ghinyu agha mampesya pamo ukungw'elamo muviziba vyinyu, awe. Tukwiza pakwenda bulo mumusebo umukulu, sona tutakwiza pakupaghukila kundilo pamo kumongo mupaka tudumusannye muchisu chako.”

²³ Loli u Sihoni atakabitikizya aba Izilayeli ukuti badumusannye muchisu chache. Loli u Sihoni akababungannya abasilikali bache bosi nukubuka munkolongo pakulwa ubwite naba Izilayeli ku Yahazi.

²⁴ Po aba Izilayeli bakamughogha nukuchifyula ichisu chache, ukwandila ko kulusoko ulwa Alinoni mupaka kulusoko ulwa Yaboki, sona mupaka kumpaka iya chisu, pachifukwa ichakuti impaka iya chisu icha ba Amoni yikaba ni linga.

²⁵ Aba Izilayeli bakatufyula utwaya tosi utukulu nkani utwa ba Amoli. Bakakafyula sona akaya aka Heshiboni, poka nutwaya twache tosi utupalamani nukwikala mulamula.

²⁶ Akaya akakulu nkani aka Heshiboni kakaba kaya aka Sihoni u mwene uwa ba Amoli, yuyo akalwa ubwite nu mwene uwakwanda uwa ba Mowabu. Akachifyula ichisu chache chosi mupaka kulusoko ulwa Alinoni.

²⁷ Ichi cho chifukwa abakwata inyimbo bakuti, “Zagha kukaya akakulu nkani aka Heshiboni ukuti akaya akakulu nkani, aka mwene uwamu Sihoni kazengiwe sona.

²⁸ Umoto ghukafumagha mukaya akakulu nkani aka Heshiboni, indimi izya moto zikafuma mukaya akakulu nkani aka Sihoni. Umoto ghukakalungulizya akaya aka Ali kako kakaba kaya akakulu nkani aka ba Mowabu. Umoto ghukaghazimizya amaghamba agha mulubazu ulwa lusoko ulwa Alinoni.

²⁹ Chighune kukwinyu amwe mwe ba Mowabu! Mwee bantu abakumwiputa u Kemoshi mwe, mwazimila. U Kemoshi abapela abana bache abalumendo pakuba bakuchimbilachimbila bulo. Abana bache abalindu abapela pakuba bazya u mwene u Sihoni uwa muchisu icha ba Amoli.

³⁰ Abaluko lwabo bazimila, ukwandila ku Heshiboni mupaka ku Diboni. Tukabazimizya mupaka ku Nofa, sona mupaka ku Medeba.”

³¹ Po aba Izilayeli bakikalana muchigaba icha ba Amoli.

³² U Mozesi akatuma abatendezi pakutendela akaya akakulu nkani aka Yazeli. Aba Izilayeli bakakafyula akaya kala, poka nutwaya tosi utupalamani nukubachimbizyamo aba Amoli, babo bakikalagha mulamula.

³³ Po aba Izilayeli bakanyokela, nukwendela kuzila iya ku Bashani. U Ogi u mwene uwamu Bashani, poka na basilikali bache bakabuka pakulwa nabo ubwite muchisu icha Edileyi.

³⁴ Loli u Mwene akamubuzya u Mozesi akati, “Utakamunyilaye pakuti namubika munyobe zyako, poka na basilikali bache bosi, sona ni chisu chache. Ubombe nawe vivyo ukamubombela u mwene u Sihoni uwa ba Amoli, yuyo akalaghilagha mu Heshiboni.”

³⁵ Po aba Izilayeli bakamughogha u Ogi, poka na bana bache abalumendo bosi, sona na bantu bache bosi, umwakuti atakabapo nayumoyumo umuntu uwakupona nukuchifyula ichisu chache.